އަވައްޓެރި އިންޑިއާއާ މެދު ޒާތީ ގޮތުން ޖައްސާލާ އެ ގައުމުގެ ކަންކަމަށް ފާޑުވިދާޅުވަމުން ގެންދަވާ، ޔޫތު މިނިސްޓްރީގެ ނައިބު މަރިޔަމް ޝިއުނާ، އިންޑިއާގެ ދިދައިގެ ހުރުމަތް ކަނޑާލައިގެން ފާޑުކިޔުން އަމާޒުވެއްޖެއެވެ.
އެކްސްގައި ޝިއުނާ ވަނީ އެމްޑީޕީގެ މަޖިލިސް އިންތިހާބުގެ ސްލޯގަން "މިސްރާބު ހަމަ މަގަށް" އަށް ޖޯކު ޖަހައި އެ ސްލޯގަންގައި އިންނަ ސަމުގާގެ ބަދަލުގައި އިންޑިއާ ދިދައިގައި އިންނަ ޕިން ވީލު ލާ "މިސްރާބު އަނގަ ވަތަށް" މިހެން ޖަހާ އެ ސްލޯގަންގެ އަސްލު އޮޅުވާލާފައެވެ.
މިކަމާ ގުޅިގެން އިންޑިއާ ރައްޔިތުން ގެންދަނީ އެކްސްގައި ނުރުހުން ފާޅުކޮށް ޝިއުނާ މަގާމުން ވަކިކުރަން ޖެހޭ ކަމަށް ގޮވަމުންނެވެ.
މީގެ އިތުރުން ތަކުރާރު ސަރުކާރުގެ އިސްވެރިން އިންޑިއާ އާ މެދު އެގޮތަސް އަމަލުކުރަމުން ދާއިރު، އިންޑިއާ ރާއްޖެއަށް ފޯރުކޮށްދޭ އަސާސީ ތަކެތީގެ ކޯޓާ އިތުރުކޮށްދިނީ އިހަކަށް ދުވަހު ކަމަށާ ނަމަވެސް ދިވެހިންގެ ވެރިން އެކަމަށްވެސް ޝުކުރު އަދާނުކުރާ ކަމަށް ބުނެ ގިނަ އިންޑިއާ ރައްޔިތުންވަނީ އެކްސްގައި ނުރުހުން ފާޅުކޮށްފައެވެ.
އިންޑިއާގެ ދިދައަށް ހަޖޫޖަހައިގެން ނައިބު ވަޒީރު ޝިއުނާ، މީސް މީޑިޔާގައި ހޫނު ފެނަށް ވެއްޓިފައިވާއިރު، އެ ވުޒާރާގެ އިތުރު ދެ ނައިބަކާ އަދި ޝީއުނާވެސް މީގެ ކުރިންވެސް ވަނީ އިންޑިއާއަށް ކުޑައިމީސްވާހެން ޓްވީޓުކުރުމުން މަގާމުން ސަސްޕެންޑްކޮށްފައެވެ.
ނަމަވެސް ތަކުރާރުކޮށް ނައިބު ވަޒީރު ޝިއުނާ އިންޑިއާ ޖައްސާލައިގެން އުޅޭއިރުވެސް ސަރުކާރުން އޭނާ މުސާރަ ހިނގާ ގޮތަށް ސަސްޕެންޑުކުރުން ފިޔަވަޅެއްގެ ގޮތުގައި ބަލައިނުގަންނާނެކަމަށް ޑިޕްލޮމެޓިކު ފަނުންވެރިން ގެންދަނީ ބުނަމުންނެވެ.
މިކަމާ ގުޅިގެން ރައީސް އޮފީހުގެ ބަހެއް ހޯދާލަން ކުރި މަސައްކަތް އަދި ވަނީ ކާޟިޔާބުވާ ގޮތް ނުވެފައެވެ.
