ޕީޕަލްސް ނެޝަނަލް ޕްރަންޓް (ޕީއެންއެފް) އުފައްދާ ޖަލްސާއަށް ފުލުހުން ހުރަސް އެޅުމުން އެމްޑީޕީއިން ކަންބޮޑުވުން ފާޅުކުރައްވައިފި އެވެ.

ޕީއެންއެފް އުފައްދާ ޖަލްސާ ފަށަން އޮތީ މރޭ 9:00 އަށެވެ. ނަމަވެސް ޖަލްސާއަށް މީހުން ދިޔައިރު ފުލުހުން ގޭޓު ބަންދުކޮށްގެން ގޭޓު ކުރިމަތީތިބުމުން އާންމު މެމްބަރުންނާ އަދި އިލެކްޝަން ކޮމިޝަންގެ މެމްބަރުންނަށް ވެސް ވަނީ ޖަލްސާއަށް ވަދެވޭ ގޮތް ނުވެފައެވެ.

މިކަމާ ގުޅިގެން އެމްޑީޕީގެ ޗެއަރ ޕާސަން ފައްޔާޒް އިސްމާއިލް އެކްސްގައި ކުރި ޕޯސްޓެއްގައި ވިދާޅުވީ އިލެކްޝަން ކޮމިޝަނަށާއި ޕްރައިވެޓް ސްކޫލަކަށާއި އަދި ފުލުހުންނަށް ނުފޫޒު ފޯރުވައިގެން ރައީސް އަބްދުﷲ ޔާމީންގެ ޕާޓީ އުފައްދާ ޖަލްސާއަށް ހުރަސް އެޅުމަކީ ނުހަނު ކަންބޮޑުވާ ކަމެއް ކަމަށެވެ.

ސަރުކާރަށް އެކަމާ ގުޅިގެން ފާޑުކިޔުން އަމާޒުކުރައްވާ ފައްޔާޒު ވިދާޅުވެފައިވަނީ ސިޔާސީ ވާދަވެރިން އުފެއްދުމުގެ ފުރުސަތު ދިނުމަށް ރައީސް ޑރ. މުހައްމަދު މުއިއްޒު ބިރު ގަންނަން ނުޖެހޭކަމަށެވެ. އަދި އެއީ ކުރިއަށް އޮތްތަނުގައި މި ސަރުކާރުގެ ސިޔާސަތަކަށް ވުމުގެ ބިރު އޮތް ކަމެއް ކަމަށްވެސް ފައްޔާޒް ވިދާޅުވިއެވެ.

ފައްޔާޒް ވަނީ ގާނޫނު އަސާސީ އާއި ގާނޫނުތަކާ ހިލާފު ނުވުމަށް ރައީސް މުއިއްޒުއަށާއި ސަރުކާރަށް ގޮވާލައްވާފައެވެ.

ރޭގެ ޖަލްސާއަށް ފުލުހުން ހުރަސް އެޅުމުން އެޕާޓީގެ މެމްބަރުން ވަނީ މުޒާހަރާ ކޮށްފައެވެ. އަދި ގަދަކަމުން އެތެރެއަށް ވަދެ ހޯލު ވަނީ ފުރާލާފަ އެވެ.