ޕީއެންއެފްގެ ޖަލްސާ ހުއްޓުވަން އެސްއޯ ފުލުހުން ދިޔަ މައްސަލައިގެ ތަހުގީގު ރިޕޯޓު ރައީސް އޮފީހުން ދިރާސާ ކުރެއްވުމަށްފަހު އެމަނިކުފާނަށް ނޭނގި އެސްއޯ ނެރުނުކަމަށް ބުނެ ފުލުހުންގެ ބޮލުގައި އިލްޒާމް އަޅުވައި މީގެ ފަހުން އެސްއޯ ނެރެވޭނީ ސީޕީގެ ހުއްދައާއެކު ކަމަށް ބުނެފިއެވެ.
ބުދަ ދުވަހުގެ ރޭ ވަރަށް ލަސްވެފައިވަނިކޮށް ހޯމްލޭންޑް މިނިސްޓްރީން ވަނީ ނޫސްބަޔާނެއް ނެރެފައެވެ.
އެގޮތުން އެ ނޫސްބަޔާނުގައި އެއްވެސް ފަރާތަކަށް ފިޔަވަޅު އަޅުއްވާ ވާހަކަ ބުނެފައިނުވެއެވެ.
ކޮމިޝަނާ އޮފް ޕޮލިސްގެ ސީދާ ހުއްދައާއެކު މެނުވީ ސްޕެޝަލް އޮޕަރޭޝަންސް ފުލުހުން އެއްވެސް މައްސަލައަކަށް ނުނެރެން ފުލުހުންގެ އިދާރާއަށް އަންގާފައިވާނެ ކަމަށް އެ ބަޔާނުގައި ވަނީ ބުނެފައެވެ.
އަދި ޕީއެންއެފް ޖަލްސާ ހުއްޓުވުމަށްޓަކައި އެސްއޯ ފުލުހުން ނެރުނު މައްސަލައާ ގުޅިގެން މައިގަނޑު ފަސް ކަމެއް ކުރުމަށް ހޯމްލޭންޑް މިނިސްޓްރީ މެދުވެރިކޮށް ސަރުކާރުން ފުލުހުންނަށް ވަނީ އަންގާފައެވެ.
ޖަލްސާއަށް ނުފޫޒު ފޯރުވީ ސީދާ ރައީސް މުއިއްޒު އަންގަވައިގެން ކަމަށް ގިނަ ފަރާތްތަކުން ބުނަމުން އަންނަނިކޮށް ރައީސް މުއިއްޒު މިވަނީ އެމަނިކުފާނަށް ނޭނގި މިކަން ހިނގި ކަމަށް ބުނެ ފުލުހުންގެ ބޮލުގައި ބޮޑު ތުހުމަތެއް އަޅުވާފައެވެ.
