ޕީއެންސީގެ ޓިކެޓުގައި ތިމަރަފުށީ ދާއިރާއަށް ވާދަކުރައްވާ އިބްރާހިމް ސަނާހު (ސަންޓޯ) އަށް ރައީސް ޑރ. މުހައްމަދު މުއިއްޒުއާއި ސަރުކާރުން ކުރި ތާއީދު އަނބުރާ ގެންނަވާފައިވަނިކޮށް ސަރުކާރަށް ނިސްބަތްވާ ސިޔާސީ އެކްޓިވިސްޓުން ސަންޓޯއަށް ތާއީދުކުރާކަން ހާމަކޮށްފި އެވެ.

ތިމަރަފުށީ ދާއިރާއަށް އަމިއްލަ ގޮތުން ވާދަކުރައްވާ އަހުމަދު ރިޔާޒުގެ ކެމްޕެއިން ޖަގަހައެއް ޕީއެންސީގެ ހަރަދުގައި އިއްޔެ ވަނީ ހުޅުވައިފަ އެވެ. ރިޔާޒަކީ އެމްއެންޕީގެ ނައިބު ރައީސް އަބްދުﷲ ރިޔާޒުގެ ކޮއްކޮ އެވެ. އިއްޔެ ރިޔާޒުގެ ޖަގަހަ ހުޅުވުމަށް ބޭއްވި ރަސްމިއްޔާތުގައި ފިޝަރީޒް މިނިސްޓަރު އަހުމަދު ޝިޔާމް އާއި ހެލްތު މިނިސްޓަރު ޑރ. އަބްދުﷲ ހަލީލުވެސް ބައިވެރިވެވަޑައިގެންނެވި އެވެ.

ނުސީދާކޮށް ސަރުކާރުން މިވަނީ ސަންޓޯއަށް ކުރި ތާއީދު އަނބުރާ ގެނަސްފައިވާކަން އިއުލާން ކޮށްފަ އެވެ. މިކަމާއި ގުޅިގެން ރައީސް މުއިއްޒު ސީދާ ބަހެއް ވިދާޅުވެފައި ނުވިނަމަވެސް މައުލޫމާތު ލިބޭ ގޮތުގައި ދެ ވަޒީރުން ރިޔާޒުގެ ޖަގަހަ ހުޅުވުމަށް ވަޑައިގެންނެވީ މުއިއްޒު އަންގަވައިގެންނެވެ.

މިކަން ހިނގާ ދިޔުމަށްފަހު އެޗްޑީސީގެ ސީއީއޯ އަހުމަދު އިބްރާހިމް (ޕޮކަންޑި) ވަނީ އޭނާގެ ތާއީދު އޮތީ ސަންޓޯއަށްކަން ހާމަކޮށްފަ އެވެ. އަދި ސަރުކާރުގެ ސިޔާސީ މަގާމުތަކުގައި ތިއްބެވި އެހެން ބައެއް އެކްޓިވިސްޓުންވެސް ވަނީ ސަންޓޯއަށް އޮތް ތާއީދު ހާމަކޮށްފަ އެވެ.

ސަންޓޯއަކީ މިސަރުކާރު ވެރިކަމަށް ގެނައުމަށް އެންމެ ބޮޑު މަސައްކަތެއް ކޮށްދިން ދިޔަރެސް ނޫހުގެ ފައުންޑާ އެވެ. ރައީސް މުއިއްޒު އިއްޔެ ލާމަށް ވަޑައިގެން ނުސީދާކޮށް ވަނީ ސަންޓޯއަކީ އަމިއްލަ މަސްލަހަތު އިސްކުރައްވާ ކެނޑިޑޭޓެއް ކަމަށް ވިދާޅުވެފަ އެވެ. އަދި އެފަދަ ކެނޑިޑޭޓުން ދޫކޮށްލުމަށްވެސް ރައީސް އިލްތިމާސް ކުރެއްވި އެވެ.

ސަރުކާރު ތެރޭގައި އުފެދިފައިވާ ހިޔާލު ތަފާތުވުންތަކުގެ ތެރެއިން ފާހަގަވަނީ ޕީއެންސީ މެމްބަރުންގެ މެދުގައި ރައީސް މުއިއްޒުގެ ބަސް ނުވިކޭ ކަމެވެ. އެގޮތުން ވަކި ކަމެއްގައި ރައީސް ގޮތް ނިންމަވާފައި ވިނަމަވެސް ސިޔާސީ އެކްޓިވިސްޓުން ގެންދަނީ އެނޫން ގޮތަކަށް ކަން ކުރަމުންނެވެ.

ރައީސް އަބްދުﷲ ޔާމީން ޕީއެންސީގެ ރިޔާސީ ޓިކެޓު ޑރ. މުއިއްޒުއަށް އެރުވުމާއި ހަމައަށް މުއިއްޒު އަކީ މާބޮޑު ތާއީދެއް އޮތް ބޭފުޅެއް ނޫނެވެ. މާލޭގެ މޭޔަރުކަމަށް ވާދަކޮށްވެސް މުއިއްޒު އިންތިހާބުވެ ވަޑައިގެންނެވީ ރައީސް ޔާމީންގެ ތަރައްގީގެ މަޝްރޫއުތައް ކެމްޕެއިން ތެރޭގައި ޕްރޮމޯޓު ކޮށްގެންނެވެ. ވެރިކަމަށް ވަޑައިގެންނެވީވެސް ރައީސް ޔާމީންގެ ނަންފުޅު ބޭނުން ކުރައްވައިގެންނެވެ.