ރައީސް ޑރ. މުހައްމަދު މުއިއްޒު އައްޑޫ ސިޓީއަށް ވަޑައިގެންނެވުމުން "ބްރިޖު ރައީސޭ" ކިޔައި އެއްވާ މީހުން ލައްވައި ގޮވުމަށް ރައީސް އޮފީހުން ސަރުކާރު އެކްޓިވިސްޓުންނަށް އަންގައިފި އެވެ.

ކުރިއަށް އޮތް މަޖިލިސް އިންތިހާބުގެ ކެމްޕެއިނުގައި ރައީސް މުއިއްޒު އައްޑޫ ސިޓީއަށް ވަޑައިގެންނެވީ މިއަދު އެވެ. މި ދަތުރުގައި ޕީއެންސީ ޓިކެޓުގައި ވާދަކުރައްވާ ކެނޑިޑޭޓުންގެ ކެމްޕެއިން ޖަލްސާގައި ރައީސް ބައިވެރިވެވަޑައިގަންނަވަން ވަނީ ހަމަޖެހިފަ އެވެ.

ރައީސް އައްޑޫއަށް ވަޑައިގެންނެވުމުގެ ތިން ދުވަސް ކުރިން ސަރުކާރަށް ނިސްބަތްވާ ސިޔާސީ އެކްޓިވިސްޓުންތަކެއް އެ ސިޓީއަށް ވަނީ ފޮނުވައިފަ އެވެ. ރައީސް މުއިއްޒު އައްޑޫ ސިޓީއަށް ވަޑައިގެންނެވުމުން "ބްރިޖު ރައީސް" ގެ ނަމުން މުހާތަބުކޮށް ސަލާން ކުރަން އެއްވާ ރައްޔިތުން ލައްވައި އަޑުގަދަ ކުރަން ރައީސް އޮފީހުން އެންގި ކަމަށް މައުލޫމާތު ލިބެ އެވެ.

ބައެއް ވަޒީރުންނާއި ކުންފުނިތަކުގެ ވެރިންނާއިއެކު ރައީސް އައްޑޫ ސިޓީ ގަމަށް މިއަދު ހަވީރު ވަޑައިގެންނެވިއިރު މަރުހަބާ ކިޔަން ދިޔައީ މަދު ރައްޔިތުންތަކެކެވެ. އެ ރައްޔިތުން ރައީސް މުއިއްޒުއާއި ސަލާމް ކުރަމުން ދިޔައިރު ބްރިޖު ރައީސްގެ ނަމުން މުހާތަބުކޮށް ގެންދިޔައީ އަޑުގަދަ ކުރަމުންނެވެ.

ރައީސް ޑރ. މުއިއްޒުގެ ސަރުކާރުން ވަނީ ހިތަދޫ އާއި ހުޅުމީދޫ ގުޅުވައިލަން ބްރިޖެއް އަޅަން އިއުލާން ކޮށްފަ އެވެ. އެކަން ކުރަން މިސުރުގެ ކުންފުންޏަކާއި ހަވާލު ކުރީ މިދިޔަ މަހު އެވެ. މިމަޝްރޫއު މިހާ އަވަހަށް ކުންފުންޏަކާއި ހަވާލުކޮށްފައި މިވަނީ މަޖިލިސް އިންތިހާބުގެ ކެމްޕެއިންގައި އެވާހަކަ ދެއްކުމުގެ ބޭނުމުގަ އެވެ.

އައްޑޫ ސިޓީއަކީ މީގެ ކުރިން އެމްޑީޕީގެ ސުޕަ މެޖޯރިޓީ އޮންނަ އަތޮޅެކެވެ. އެހެންނަމަވެސް މިދިޔަ ރިޔާސީ އިންތިހާބުގައި ރައީސް އަބްދުﷲ ޔާމީން އިސްވެ ހުންނަވައި ހިންގެވި ކެމްޕެއިނުގައި ޕީޕީއެމް ޕީއެންސީން ވަނީ އެމްޑީޕީއާއިއެކު އޮތް ފަރަގު ކުޑަކޮށްފަ އެވެ.

ރާއްޖޭގައި ކަނޑު ހުރަސްކޮށް ދެރަށެއް ގުޅުވައިލި ބްރިޖެއް އެންމެ ފުރަތަމަ އެޅުއްވީ ރައީސް ޔާމީން އެވެ. ރާއްޖޭގެ ތާރީހު ބަދަލުކޮށްދިން ސިނަމާލެ ބްރިޖަކީ މާލެ ސަރަހައްދުގެ މުޅި އިގްތިޞާދު ބަދަލުކޮށްދިން ބިޔަ މަޝްރޫއެކެވެ.