ސްޕޯޓްސް ކޮމިޝަނަރގެ މަގާމުގައި ހުރި މުހައްމަދު ތޮލާލަށް އެ މަގާމު ހަމަޖެއްސީ މެޑަމް ސާޖިދާ މުހައްމަދުގެ ނުފޫޒުންކަމަށް ޗެނަލް13އަށް މައުލޫމާތު ލިބިއްޖެއެވެ.

މުލިއާގޭގެ ސްޓޭޓު މިނިސްޓަރުގެ މަގާމުގައި ކުރިން ހުންނެވި، ރައީސް އޮފީހުގެ މިނިސްޓަރު އާދަމް ރަމީޒުގެ ހަނގު އަނބިކަނބަލުން ޝަމްނާޒު ސަލީމް މުލިއާގޭގެ މައުލޫމާތުތަކެއް ލީކުކޮށްލުމުން އޭނާއާ މެދު ފިޔަވަޅު އަޅާފައިވަނިކޮށް، ނަން ހާމަނުކުރުމަށް އެދި ރައީސް އޮފީހުގެ އޮފިޝަލަކު ވަނީ ކަން ހިނގާދިޔަގޮތް ޗެނަލް13އަށް ކިޔައިދީފައެވެ.

އެގޮތުން ކުރިން ސްޕޯޓްސް ކޮމިޝަނަރަކަށް އައްޔަން ކުރަން ނިންމާ އެ މަގާމާ ހަވާލުވުމަށް އައުމަށް އަންގާފައިވަނީ ރައީސް މައުމޫން އަބްދުލްގައްޔޫމަށް ބޮޑު ބޭބެ ވިދާޅުވާ ޝައްމޫނު ހަމީދަށެވެ. ޝައްމޫނު އޭގެ އަނެއް ދުވަހު މަގާމާ ހަވާލުވާން ދިއުމަށް ތައްޔާރުވެގެން ހުންނަވަނިކޮށް ވަނީ އޭނާއަށް އެ މަގާމު ނުލިބޭކަން ފަހުން ވަނީ އަންގާފައެވެ.

ކަން މިހެން ހިނގާފައިވާއިރު ޝަމްނާޒަކީ ޝައްމޫނުގެ އަނބިކަބަލުންގެ ވަރަށް ގާތް މިތުރަކަށް ވެފައި ޝަމްނާޒްވަނީ ކަމުގެ ތަފްސީލު ޝައްމޫނުގެ އާއިލާއަށް ކިޔައިދީފައެވެ.

އެގޮތުން ޝަމްނާޒު ހާމަކޮށްފައިވާގޮތުގައި ޝައްމޫނަށް މަގާމު ދިނުމަށް ނިންމާ މަގާމުގެ ސިޓީވެސް ޓައިޕުކުރި ކަމަށާ ނަމަވެސް މެޑަމް ސާޖިދާ ބޭނުންފުޅުވެގެން އެ މަގާމު ތޮލާލަށް ދިނީ ކަމަށެވެ.

އެކަމާ ގުޅިގެން ޝަމްނާޒު ސަސްޕެންޝަންގައި ބެެހެއްޓުމަށްފަހު މިހާރުވަނީ އޭނާގެ އެދުމުގެ މަތިން ތިމާވެއްޓާ ވުޒާރާއަށް ބަދަލުކޮށްފައެވެ.

ތޮލާލަށް ސްޕޯޓްސް ކޮމިޝަނަރކަން ދިން ނަމަވެސް ތޮލާލު ބޭނުންވެ ހުށަހަޅާފައި އޮތީ އިލެކްޝަންސް ކޮމިޝަނަށް ދާން ކަމަށް ވެސް މައުލޫމާތުވަނީ ލިބިފައެވެ.

މެޑަމް ސާޖިދާގެ ނުފޫޒު ސަރުކާރު ތެރެއަށް ވަދެ މަގާމުތަކާ ގުޅިގެން މީގެ ކުރިންވެސް ތަޅާފޮޅުމާ ދެބަސްވުން އުފެދިފައިވާ ކަމަށް މައުލޫމާތުލިބިފައިވެއެވެ.