ދިވެހިރާއްޖޭގެ އެކި ހިސާބުތަކަށް މިހާރު ކުރަމުންދާ ވިއްސާރަ އާއި ގުޅިގެން ރައްކާތެރިވެ ތިބުމަށް އަންގައި މޫސުމާއިބެހޭ ގައުމީ އިދާރާ މޯލްޑިވްސް މީޓިއޮރޮލޮޖިކަލް ސެންޓަރު (މެޓް) އިން މިއަދު ރީނދޫ އެލަރޓް ނެރެފިއެވެ.

މެޓް އިން ރީނދޫ އެލަރޓް ނެރެފައިވަނީ ހއ އަތޮޅުން ފެށިގެން ލާމު އަތޮޅާއި ހަމައަށެވެ. މި އިދާރާއިން ހާމަކޮށްފައިވާ ގޮތުން އޭޕްރީލް 13 ވަނަ ދުވަހުގެރޭ 20:00 އިން ފެށިގެން މެންދަމު 00:00 ހަމައަށް މި ސަރަޙައްދަށް ބޯކޮށް ވާރޭ ވެހުމާއިއެކު ގުގުރާ، މޫސުން ގޯސްވާނެ ކަމަށް ލަފާކުރެވޭކަމަށެވެ.

ރާއްޖެއަށް މިހާރު ކުރަމުންދާ ވިއްސަރާއިގެ ސަބަބުން މާލެ އާއި އެކި ރަށްތަކުގައި ފެން ބޮޑުވެ ބައެއް ގެތަކަށް ފެން ވަނުމުގެ ސަބަބުން އެކި ގެއްލުންތަކާއި ކުރިމަތިވަމުންދެއެވެ. މިކަމާއި ގުޅިގެން ރައްޔިތުންގެ ރައްކާތެރިކަން ކަށަވަރުކޮށް ރައްޔިތުންނަށް އެހީތެރިވުމުގެ މަސައްކަތް މޯލްޑިވްސް ޕޮލިސް ސަރވިސް، ފަޔަރ އެންޑް ރެސްކިއު ސާވިސްއިން އިން ދަނީ ކުރަމުންނެވެ. މިފަދަ ދަނޑިވަޅެއްގައި މަގުތަކުގައި ބާރު ސްޕީޑްގައި އުޅަނދުތައް ނުދުއްވުމަށާއި ޒަރޫރީ ދަތުރުތައް ނޫނީ ނުކުރުމަށް ފުލުހުންވަނީ އިލްތިމާސްކޮށްފައިވެއެވެ.

މޫސުމާ ބެހޭ ޤައުމީ އިދާރާއިން މޫސުން އިތުރަށް ގޯސްވެދާނެތީ މޫސުމަށް ސަމާލުވުމަށްވަނީ އަންގާފައިވެއެވެ.

މީގެ އިތުރުން، ގއ އަތޮޅުން ފެށިގެން އައްޑޫ ސިޓީ އާއި ހަމައަށް ވައިޓް އެލަރޓްވެސް ވަނީ ނެރެފައިވެއެވެ.