ސަރުކާރު ހިންގާ މައި ޕާޓީ، ޕީއެންސީގެ ކެނޑިޑޭޓަކު ކުރިމަތިލާފައިވަނިކޮށް ހުރާ ދާއިރާއަށް އަމިއްލަ ގޮތުން ކުރިމަތިލައްވާފައިވާ ޑރ. އަނާރާ ނައީމްގެ ކެމްޕެއިނުގައި ބައިވެރިވެވަޑައިގެންނެވުމަށް ރައީސް ޑރ. މުހައްމަދު މުއިއްޒު އެދާއިރާގެ ރަށްތަކަށް ވަޑައިގަންނަވަން ހަމަޖެހިއްޖެ އެވެ.
ހުރާ ދާއިރާއަށް ކޮންގްރެސް ޕާޓީގެ ޓިކެޓުގައި ނިކުންނަވަނީ އަބްދުﷲ ވާރިޘް އެވެ. އަނާރާ އަމިއްލަ ގޮތުން ނިކުންނަވަން ނިންމެވީ ޕީއެންސީ ޕްރައިމަރީގައި ބަލިވުމުންނެވެ. އެހެންނަމަވެސް ރައީސް މުއިއްޒު ތާއީދު ކުރެއްވީ އަނާރާ އަށެވެ. އަނާރާ އަކީ ރައީސް މުއިއްޒުގެ ވަރަށް ގާތް ބޭފުޅެކެވެ.
ޕާޓީގެ ކެނޑިޑޭޓު ހުންނަވަނިކޮށް އަމިއްލަ ކެނޑިޑޭޓުންނަށް ރައީސް މުއިއްޒު އާއި ސަރުކާރުގެ އިސް ވެރިން ކެމްޕެއިން ކޮށްދޭތީ ޕީއެންސީގެ އެތެރޭގައި ވަނީ ވަރަށް ބޮޑަށް މައްސަލަ ގޯސްވެފަ އެވެ. މިކަމަށް ފަރުވާލެއް ނެތި ސަރުކާރުން ގެންދަނީ ޕީއެންސީގެ ބައެއް ކެނޑިޑޭޓުން ބާކީ ކުރަމުންނެވެ.
ޗެނަލް 13 އަށް މައުލޫމާތު ލިބުނު ގޮތުގައި ހުރާ ދާއިރާގެ ރަށްތަކަށް ވަޑައިގެން އެރަށްތަކުގެ ބޮޑެތި ވިޔަފާރިވެރިންނާއި ނުފޫޒުގަދަ އާއިލާތަކަށް ފައިސާ ބައްސަވާނެ އެވެ. އެހެން ނަމަވެސް މިކަން ކުރިއަށް ގެންދާނީ އަނާރާގެ ކެމްޕެއިން ޓީމުން ހަދާފައިވާ ތަފާސް ހިސާބުތަކަށް ބަލައިގެން ކަމަށްވެސް މައުލޫމާތު ލިބެ އެވެ. މިއަދު ނޫނީ މާދަމާގެ ވަގުތެއްގައި ރައީސް މުއިއްޒު ހުރާ ދާއިރާއަށް ދަތުރުފުޅެއް ކުރައްވާނެ ކަމަށްވެ އެވެ.
ސަރުކާރަށް ނިސްބަތްވާ ބައެއް ކެނޑިޑޭޓުން ގެންދަނީ ފާޅުކަން ބޮޑު ގޮތެއްގައި ފައިސާ ބަހައި ވޯޓަށް ނުފޫޒު ފޯރުވަމުންނެވެ. މީގެ ކުރިން ލ. ފޮނަދޫ ދާއިރާއަށް ވާދަކުރައްވާ އަބްދުﷲ އަބްދުއްރަހީމް ތެލި ސެޓުތަކެއް ބެއްސެވި މައްސަލައެއް ސޯޝަލް މީޑިއާއަށް ވަނީ ތިލަވެފަ އެވެ.
