ރާއްޖޭގައި ގާއިމްވެފައި ތިބި އިންޑިއާގެ ސިފައިން ބޭލުމަށް އެ ގައުމާއެކު ހަދާފައިވާ އެއްބަސްވުން, ގައުމީ ސަލާމަތަށް ނުރައްކާ އޮތް ކަމަށް ބުނެ ފޮރުވައިފިއެވެ.

މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން އެއްބަސްވުން ހޯދުމަށް އޮންލައިން ނޫހެއް ކަމަށްވާ "އަދަދު" އިން ފޮރިން މިނިސްޓްރީގައި އެދުމުން އެ މިނިސްޓްެރީން ވަނީ އެކަން ހާމަކުރެވެން ނެތް ކަމަށް ބުނެ ޖަވާބުދެއްވާފައެވެ.

އެއީ މައުލޫމާތު ހާމަކޮށްފިނަމަ ގައުމީ ސަލާމަތައް ނުރައްކާވަފަދަ ކަމެއް ކުރިމަތިވެދާނެ ކަމަށް ބަލައި މައުލޫމާތު ސިއްރުކުރުމުގެ ބާރު ދައުލަތުގެ އިދާރާތަކަށް ލިބިދޭ މާއްދާ އަކަށް ވާތީ ކަމަށް އެ ވުޒާރާއިން ވަނީ ބުނެފައެވެ.

އިންޑިޔާ ސިފައިން އަނބުރާ ފޮނުވައިލުމަށް ދެ ގައުމުން ކުރި މަޝްވަރާގެ ތެރެއިން އެއްބަސްވެފައިވަނީ އިންޑިއާއިން އެދުނު ގޮތަށް އެ އުޅަނދުތައް އޮޕަރޭޓުކުރަން ތިބި ސިފައިންގެ ބަދަލުގައި މަދަނީން ނުވަތަ ޓެކްނިކަލް މީހުން ގެނައުމަށެވެ.

އެގޮތުން އިންޑިޔާ ސިފައިންގެ ޔުނީފޯމް ބޭލުމަށްފަހު މަދަނީން ކަމަށް ބުނެ ގެނައި ފަރާތްތަކުގެ ވަނަވަރުވެސް ސަރުކާރުން ވަނީ ފޮރުވާފައެވެ.

އިންޑިޔާ ސިފައިންގެ ސީދާ އަދަދު ސަރުކާރަށް ހާމަކުރެވިފައި ނެތް އިރު އެ ސިފައިން އަދިވެސް އެއްކޮށް މި ގައުމުން ފޮނުވާލެވިފައި ނުވެއެވެ.

އިންޑިޔާ ސިފައިން މިގައުމުން ފޮނުވާލުމަކީ ރައީސް ޑރ މުހައްމަދު މުއިއްޒު ރިޔާސީ އިންތިޚާބްގެ ކެމްޕެއިންގައި އެންމެ އަޑު ހަރުކޮށް ވިދާޅުވި އެއް ވާހަކައެވެ.

ނަމަވެސް އެކަން އެމަނިކުފާނަށް ކުރެވިފައި ނުވާތީ ގިނަ ބަޔަކު އަންނަނީ ފާޑުކިޔުން އަމާޒުކުރަމުންނެވެ.