މިއަދަކީ މިވާހަކަ ދައްކަން އެންމެ ރަނގަޅު ދުވަހެވެ. ޓޫރިސްޓު ރިސޯޓެއް ތަރައްގީކުރަން ވ. އާރަށް ކުއްޔަށް ދޫކުރުމުގެ މުއާމަލާތުގެ މައްސަލައިގައި ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް އުފުލައިފައިވާ ދެ ދައުވާ އަކީ ފެށުނީއްސުރެ "ސިޔާސީ ދައުވާ" އެއްކަމަށް އެމަނިކުފާނަށް ތާއިދު ކުރާ ގިނަ ފަރާތްތަކުން އައީ ބުނަމުންނެވެ. މިކަން ކުރީ ސީދާ ސިޔާސީ ބޭނުމެއްގައެވެ.

މިއީ ހާމަޔަށް އޮތް ބޮޑު ސިއްރަކަށް ވާއިރު މިކަން ކުރީ ކޮން ބައެއްކަން ހާމަކުރަން އެބަޖެހެޔެވެ. އެގޮތުން މިކަން ކުރީ (މޯލްޑިވިއަން ޑިމޮކްރެޓިކް ޕާޓީ) އެމްޑީޕީންނެވެ. ކުރީގެ ރައީސް އިބްރާހިމް މުހައްމަދު ޞާލިހެވެ. 2023 ވަނަ އަހަރުގެ ރިޔާސީ އިންތިޚާބުގެ ރޭހަށް ރައީސް ޔާމީން ނިކުމެދާނެތީ ކުރެވެން އޮތް ހުރިހާ ކަމެއް އެމީހުން ކުރިއެވެ.

ކަންކަން މިހެން ހުރި އިރު، އެމަނިކުފާނަކީ މައުޞޫމް ބޭފުޅަކަށް ވާތީވެ، ދިވެހިރާއްޖޭގެ ހައިކޯޓްގައި މައްސަލަ އިސްތިއުނާފް ކުރަން އެމަނިކުފާނު ނިންމެވިއެވެ. އަޑުއެހުންތައް ފަށާ،ވަކި ހިސާބަކުން ހައި ކޯޓްގައި އޮތް މައްސަލަ މަޑު ޖައްސާލައިގެން އުޅޭ މަންޒަރު ފެނުނެވެ.

ބޭނުންވި ގޮތައް ކަންތައްވެ ނިމިއްޖެއެވެ. ކްރިމިނަލް ކޯޓުން އިއްވި 11 އަހަރުގެ ޖަލު ހުކުމްގެ ސަބަބުން 2023 ވަނަ އަހަރުގެ ރިޔާސީ އިންތިޚާބްގައި އެމަނިކުފާނަށް ވާދަނުކުރެވޭ ކަމަށް ބުނެ ދިވެހިރާއްޖޭގެ ސުޕްރީމް ކޯޓުން ރައީސް ޔާމީންގެ ކެންޑިޑަސީ ބާތިލްކުރިއެވެ. އެ ކޯޓުން އެ ހޭވި ހަޑިއެއްގެ ސަބަބުން ގެއްލިގެން ދިިޔައީ އެމަނިކުފާނުގެ އިންތިޚާބީ ހައްގާއި އެމަނިކުފާނަށް ވޯޓުލާން ތިބި އެތަކެއް ރައްޔިތުންގެ ހައްގުތަކެވެ.

އެމަނިކުފާނަށް ރިޔާސީ އިންތިޚާބްގައި ވާދަނުކުރެވުމުން، ޕީޕީއެމް/ޕީއެންސީން އިންތިޚާބަށް ނެރުނީ އަދުގެ ރައީސް ޑރ.މުހައްމަދު މުއިއްޒެވެ. އެހިސާބުން ހީވީ ރައީސް ޔާމީނަށް އިންސާފު ލިބެން މާ ދުވަހެއް ދެން ނުނަގާނެކަމަށެވެ. ރައީސް މުއިއްޒު އިންތިޚާބް ކާމިޔާބު ކުރެއްވުމުން ރައީސް ޔާމިނަށް އޮތް ތާއިދު ކުރީގެ ވެރިޔާ ރައީސް އިބޫއަށް ވެސް އެނގުމުން ރައީސް ޔާމިން ގެޔަށް ބަދަލުކޮށް ލުޔެއް ދެއްވިއެވެ.

މިނިވަންކުރައްވާނެ ކަމަށް ވިދާޅުވެ ވެރިކަމަށް އައީ ރައީސް ޔާމީނަށް ވޯޓު ދެއްވަން ތިބި އާންމު ރައްޔިތުންގެ ވޯޓުންނެވެ. އެ ރައްޔިތުންގެ އިތުބާރު ހޯދައިގެންނެވެ. ވެރިކަމަށް އައުމަށްފަހުވެސް އެތަކެއް ދުވަހެއް ފާއިތުވެގެން ދިޔައީ ރައީސް ޔާމިންގެ ފަރާތްޕުޅުން ދިވެހިރާއްޖޭގެ ހައިކޯޓަށް ހުށަހަޅާފައިވާ އިސްތިއުނާފް މައްސަލައިގެ ހުކުމް އިއްވުމުގެ އަޑުއެހުން ތާވަލް ނުވެވިއެވެ.

ކަންތައް މިހާ ހިސާބަށް ގޮސް އޮއްވާ އެމްޑީޕީން މައްސަލަ ޖޭއެސްސީއަށް ހުށަހަޅާނެ ކަމަށް ބުނިތާ ދެދުވަސް ނުވެ، އިސްތިއުނާފް މައްސަލައިގެ ހުކުމް އިއްވުމުގެ އަޑުއެހުން 18 އޭޕްރިލް 2024 ވީ ބުރާސްފަތި ދުވަހުގެ މެންދުރު 13:00 ގައި ހައި ކޯޓްގައި ތާވަލް ކުރެވުނެެވެ. އެމްޑީޕީގެ ނުފޫޒު އަދިވެސް ޝަރުޢީ ދާއިރާގައި އެބައޮތް ކަމަށް ސަރުކާރުން ދައުވާ ކުރަމުން އައި އިރު، މިކަން ކުރީ ސަރުކާރުން ކަމަށް ގިނަ ފަރާތްތަކުން ބުނެެއެވެ.

މިއަދު ހުކުމް އިއްވުމުގެ އަޑުއެހުން ފެށިގެން ފަނޑިޔާރުންގެ ބެންޗުން ރަޢުޔު އިއްވަމުން ގެންދެވި އިރު ފަނޑިޔާރުން ފާހަގަކުރަމުންދިޔައީ ދަށު ކޯޓުން އިއްވާފައިވާ ހުކުމް ގޯސްކަމަށެވެ. އެގޮތުން ދެ ނޭވާ ދޭތެރެއިން " ދަށު ކޯޓުގެ ހުކުމުގައިވާ ގޯހަކީ.. ދަށު ކޯޓުގެ ފަނޑިޔާރު އިއްވާފައިވާ ހުކުމަކީ ގާނޫނު އިމުގެ ބޭރުން އިއްވާފައިވާ ހުކުމެއް.." މިފަދައިން ދިޔައީ ބުނަމުންނެވެ.

ވ. އާރަށުގެ ހިޔާނާތުގެ މައްސަލައިގައި ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް އިއްވި 11 އަހަރުގެ ޖަލު ހުކުމް ބާތިލުކޮށް، އަލުން ބަލަން ކްރިމިނަލް ކޯޓަށް ފޮނުވަން މިއަދު މިވަނީ ހައި ކޯޓުން ހުކުމްކޮށްފިއެވެ.

އެންމެ ފަހުން މައްސަލަ ނިމުނީ ރައީސް ޔާމީނާ އެއްކޮޅަށެވެ. ތިމަން މަނިކުފާނަކީ މައުޞޫމް ބޭފުޅެކޭ އެތައް ފަހަރެއްގެ މަތިން ވިދާޅުވިއެވެ. މިއަދު އެކަން ސާބިތުވެއްޖެއެވެ.