ސިއްހަތަށް ނުރައްކާވާ މިންވަރަށް ރާއްޖޭގެ ބައެއް ހިސާބުތަކުގައި ވައި ތަޣައްޔަރުވެއްޖެއެވެ.

މޯލްޑީވްސް މީޓިއޮރޮލޮޖިކަލް ސެންޓަރ (މެޓް) އޮފީހުން ހާމަކޯށްފައިވާ ގޮތުގައި ރާއްޖޭގެ އިރުމަތިން ޖެހެމުންދާ ވައިގެ ސަބަބުން އުތުރާއި މެދުރާއްޖެތެރޭގެ ވައި ނުސާފުވެ، ހަމަލޮލަށް ފެންނަ ދުރުމިން ވަރަށް ބޮޑަށް ދައްވެފައިވާ ކަމަށެވެ.

ސާފު ދުވަހެއްގައި 10 ކިލޯމީޓަރަށް ވުރެ ދުރު ފެނުނު ނަމަވެސް، ވޭތުވެދިޔަ 24 ގަޑިއިރު، ހާއްސަކޮށް މެދު ރާއްޖެތެރޭގެ ސަރަހައްދަށް މި މިންވަރު ފަސް ކިލޯމީޓަރަށް ދަށްވެފައިވާ ކަމަށްވެސް މެޓު އޮފީހުން އެކްސްގައި ކުރި ޕޯސްޓުގައިވެއެވެ.

ވައި ނުސާފުވާ މިންވަރު ބަލާލެވޭ "އައިކިޔު އެއާ ވިޝުއަލް އެޕް" އިން ދައްކާ ގޮތުން ރާއްޖޭގެ ވައިސާފް މިންވަރު ހުރީ 165 ގަ އެވެ. މިއީ ވައި ނުސާފުވުމުގެ ސަބަބުން އެންމެންގެ ހިތަށާއި ފުއްޕާމެއަށް އަސަރުކޮށްފާނެ މިންވަރެކެވެ. އަދި ފުއްޕާމެއާއި ހިތުގެ ބަލި މީހުންނަށް ނުރައްކާތެރި މިންވަރެކެވެ.

މޫސުމާބެހޭ އިދާރާއިން ބުނީ ސާފު ދުވަހެއްގައި 10 ކިލޯ މީޓަރަށް ވުރެ ދުރު ފެނުނު ނަމަވެސް ވޭތުވެދިޔަ 24 ގަޑިއިރު މެދު ރާއްޖެތެރޭ ސަރަހައްދަށް މިމިންވަރު 5 ކިލޯ މީޓަރަށް ދައްވެފައިވާކަމަށެވެ.

ދުރު ފެންނަ ނިސްބަތް ބަދަލުވުމުގައި ވައިގެ މިސްރާބާއި ބާރުމިން އަދި ވިއްސާރަވުން މުހިއްމު ދައުރެއް އަދާ ކުރާ ކަމަށްވެސް މެޓުން ވަނީ ބުނެފައެވެ.

ރާއްޖޭގެ އުތުރުން އަންނަ ވައިގެ ސަބަބުން ސިއްހަތަށް ނުރައްކާ ފަދަ ހާލަތެއް އޮތްއިރު ރާއްޖޭގެ އެންމެ އަވައްޓެރި އިންޑީއާއަކީ ރާއްޖޭގެ އުތުރުން އޮންނަ އެންމެ ޕޮލިއުޝަން ގިނަ ގައުމެވެ. އެގައުމުގައި ސާފު ވައި ލިބުމަކީ ދަތިކަމަށްވެފައި އޭގެ ޝިކާރައަކަށް ދިވެހިން މިދަނީ ވަމުންކަން ފާހަގަކޮށްލެވެއެވެ.