ނިލަންދޫ ދާއިރާގެ ރައްޔިތުންގެ މަޖިލީހުގެ ގޮނޑިއަށް ވާދަކުރައްވާ ރައީސް ޑރ. މުހައްމަދު މުއިއްޒުގެ ކޮއްކޯފުޅު ފާތިމަތު ސައުދާއަށް ވޯޓު ހޯދައިދިނުމަށް އެދާއިރާގެ ގިނަ ބަޔަކަށް ވަޒީފާތައް ބަހާފައިވާކަން ހާމަވެއްޖެ އެވެ.

ސައުދާގެ ކެމްޕެއިން ކަންކަން ރޭވުމުގެ ގޮތުން ވަޓްސްއެޕްގައި ވަނީ "ސައު24" ގެ ނަމުގައި ގްރޫޕެއް ހަދައިފަ އެވެ. އެގްރޫޕުގައި ސަރުކާރުގެ ސީނިއާ އޮފިޝަލުން ތިބިއިރު މިއަދު ވަނީ އެގްރޫޕުގެ ސްކްރީން ޝޮޓުތަކެއް ލީކުވެފަ އެވެ.

އެ ގްރޫޕުގައި ހެލްތު މިނިސްޓަރު ޑރ. އަބްދުﷲ ހަލީލު ވިދާޅުވެފައިވަނީ މީހަކަށް ވަޒީފާއެއް ދިނުމުން އޭނާގެ މުޅި އާއިލާ އެއްކޮށް ކެމްޕެއިނަށް ނިކުންނަންޖެހޭނެ ކަމަށެވެ. އެހެންނަމަވެސް އެނޫން ބަޔަކުވެސް ތިބޭނެ ކަމަށާއި އެގުރޫޕުގައި މަޝްވަރާ ކުރާނީ އެފަދަ މީހުންނަށް އަޅާނެ ފިޔަވަޅުތަކާއި ގުޅޭގޮތުން ކަމަށް ހަލީލު ވިދާޅުވި އެވެ.

މީގެ އިތުރުން އިންތިހާބު ނިމުމުން މަގާމުތަކަށް ބަދަލު ގެންނާނެ ކަމަށާއި ސައުދާ އިންތިހާބު ނުވެއްޖެނަމަ ވަޒީފާތަކުގައި ތިބި މީހުންނާއި އެމީހުންގެ އާއިލާތަކަށް ގެއްލުން ދޭނެކަމަށްވެސް ގްރޫޕުގައި ހަލީލު ވަނީ ވިދާޅުވެފަ އެވެ.

ސައުދާގެ ޓީމުން ދަނީ އޭނާގެ ކެމްޕެއިންގައި ހަރަކާތްތެރިވާ މީހުންނާއި އެމީހުންގެ އާއިލާތައް ގާތުން ބަލަމުންނެވެ. އަދި އިންތިހާބަށްފަހު އެމީހުންނަށް ދީފައިވާ ވަޒީފާތައް އަތުލައި ސަރުކާރުން ބޭނުންވާ ބަޔަކަށް އަނެއްކާވެސް އެވަޒީފާތައް ދޭން މިހާރު ވަނީ ނިންމައިފަ އެވެ.

ސަރުކާރު މުވައްޒަފުންނަށް ބިރުދައްކަން މިނިސްޓަރު ހަލީލު މަސައްކަތް ކުރާކަން މީގެ ކުރިންވެސް ވަނީ ހާމަވެގެން ގޮސްފަ އެވެ. މީގެ އިތުރުން އަމިއްލަ ގޮތުން ވާދަކުރާ ކެނޑިޑޭޓުންނަށް ގުޅައި އެމީހުންގެ ތާއީދު ޕީއެންސީގެ ކެނޑިޑޭޓުންނަށް ދޭންވެސް ހަލީލު ދަނީ މަޖުބޫރު ކުރަމުންނެވެ.