ރައްޔިތުންގެ މަޖިލިސް އިންތިހާބުގެ ވޯޓުލުން ކުރިއަށް ދަނިކޮށް އއ. ރަސްދޫއާއި، އެއަތޮޅު ތޮއްޑޫއަށް ފަޅެއް ދީފި އެވެ.
އެ ދެރަށަށް ދިނީ އއ އަތޮޅުގެ އުތުރުން އޮންނަ ފަޅުގެ ބައެކެވެ. ރައީސް ޑރ. މުހައްމަދު މުއިއްޒުގެ ގަރާރަކުން އެފަޅު ދިންއިރު އެ ގަރާރު ސަރުކާރުގެ ގެޒެޓުގައި ޝާއިއުކުރީ މިއަދު ހެނދުނު 11:28 ގަ އެވެ.
ރަސްދޫއާއި ތޮއްޑޫގެ އިހުތިސާސް ތެރޭގައި ހިމަނާފައިވަނީ ތޮއްޑޫގެ ދެކުނަށް 11.4 ކިލޯމީޓަރު ދުރުގައި އޮތް ފަޅެކެވެ.
ގަރާރުގައި ބުނާ ގޮތުން އެ ފަޅުގެ އުތުރުން އެންމެ އިރުމަތިން 200 ހެކްޓަރުގެ ސަރަހައްދެއް ތޮއްޑޫއަށް ދީފައިވެ އެވެ. އެއާ ޖެހިގެން އޮތް 200 ހެކްޓަރުގެ ސަރަހައްދު ރަސްދޫގެ އިހުތިސާސްގައި ވަނީ ހިމަނައިފަ އެވެ.
މި ފަޅު ތޮއްޑޫގެ އިހުތިސާސްގެ ތެރޭގައި ހިމަނަން އެރަށު ކައުންސިލުން ރައީސަށް ދެންނެވީ އިންތިހާބުގެ ކެމްޕެއިން ތެރޭގަ އެވެ. ކައުންސިލުން އެގޮތަށް އެދުނީ އެފަޅަކީ ތޮއްޑޫއާއި އެންމެ ކައިރިން އެރަށަށް ލިބޭނެ ފަޅުކަމަށް ވުމުންނެވެ.
އިންތިހާބު ބޯމަތިވެފައި ވަނިކޮށް ނިމިދިޔަ ހަފްތާގައި އެކަނިވެސް ރައީސް މުއިއްޒު ވަނީ ހަ ރަށެއްގެ އިހުތިސާސް ބޮޑުކުރަން ގަރާރު ނެރުއްވައިފަ އެވެ. މިއަދު އެ ގަރާރު ގެޒެޓުގައި ޝާއިއު ކުރިއިރު ވޯޓުލުން ކުރިއަށް ދާތީ މިއަދަކީ ސަރުކާރު ބަންދު ދުވަހެއްގެ ގޮތުގައި ވަނީ ކަނޑައަޅައިފަ އެވެ. އާންމުކޮށް މިފަދަ ގަރާރުތައް ޝާއިއުކުރަނީ ސަރުކާރު ބަންދު ނޫން ދުވަސްތަކުގަ އެވެ.
