މިއަދު ކުރިއަށް ދާ ރައްޔިތުންގެ މަޖިލީހުގެ އިންތިހާބުގެ ވޯޓު ލުމުގައި، 2 ޖެހުމާއި ހަމައަށް 1,48,894 އަށްވުރެއް ގިނަ މީހުން ވޯޓު ލައިފިއެވެ.

އިލެކްޝަންސް ކޮމިޝަނުން އާންމުކުރި ތަފާސް ހިސާބުތައް ދައްކާ ގޮތުން ހެނދުނު 8:00 ގައި ވޯޓުލުން ފެށުމާއިއެކު ވޯޓުލުމުގެ ހައްގު ލިބިގެންވާ މީހުންގެ 52 އިންސައްތަ މީހުން ވަނީ ވޯޓު ލައިފަ އެވެ.

އޭގެ ތެރޭގައި ހިމެނެނީ 70,896 އަންހެނުންނާއި 77,998 ފިރިހެނުންނެވެ.

މިއަދު ކުރިއަށް ދަނީ 20 ވަނަ ރައްޔިތުންގެ މަޖިލީސް އިންތިހާބު ކުރުމުގެ ވޯޓުލުމެވެ.

ވޯޓުލުން ކުރިއަށް ދާނީ ހަވީރު 5:30 އާއި ހަމައަށެވެ.

އެވަގުތާއި ހަމައަށް ކިޔުގައި ތިބޭ ފަރާތްތަކަށް ވޯޓު ލުމުގެ ފުރުސަތު ދިނުމަށްފަހު ވޯޓުލުން ނިންމައިލާނެ ކަމަށް އިލެކްޝަންސް ކޮމިޝަން އިން ވަނީ ބުނެފައެވެ.