ހެލްތު މިނިސްޓްރީގައި ތިބި ސިޔާސީ މީހުންގެ މުސާރައަށް އެކަނި 6 ލައްކަ ރުފިޔާ މަހަކު ހޭދަވާކަން ހާމަވެއްޖެއެވެ.

މި ސަރުކާރަކީ އެންމެ ޚަރަދު ކުޑަކޮށް އެންމެ މަތި ލުއިކޮށް ހިންގާނެ ކަމުގެ ވައުދާ އެކު އައި ސަރުކާރެއް ނަމަވެސް ސަރުކާރު އައި ފަހުން ސިޔާސީ މަގާމުތަކަށް މީހުން އައްޔަންކުރަމުން ދިޔައީ ބަޑިތަކުރު ވިހޭރޭ އަލަފަތް ވެސް ތިޔާގީ ނުވާހާ ހަލުވި ކަމާއެކުއެވެ.

އެއާ އެކު ގިނަ ފާޑުކިޔުންތަކެއް ސަރުކާރަށް އާމާޒުވާން ފެށުމުން ސިޔާސީ މަގާމުތަކުގެ ތަފްސީލާ އަދި އަދަދުވެސް ރައީސް އޮފީހުގެ ސައިޓުގައި ހާމަކުރުން ހުއްޓާލިއެވެ.

އެހެންކަމުން އެކަމުގެ ތަފްސީލު ހާމަކޮށްދިނުމަށް އެދި ރައީސް އޮފީހަށާ އަދި ތަފާތު މިނިސްޓްރީތަކަށް އެކި ނޫސްވެރިން އެދިފައިވެއެވެ.

އެގޮތުން މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން މި މަހުގެ ދެ ވަނަ ދުވަހު ހެލްތް މިނިސްޓްރީގެ ސިޔާސީ މަގާމުތަކުގެ މައުލޫމާތު ހޯދުމަށް "ދައުރު" ނޫހުން އެދިފައިވެއެވެ.

އެ ސިޓީގެ ޖަވާބުގައި ހެލްތު މިނިސްޓްރީއިން ފޮނުވި ޖަވާބުން ހާމަވާ ގޮތުގައި ހެލްތު މިނިސްޓްރީގެ ސިޔާސީ މަގާމުތަކުގައި 25 ބޭފުޅުން އެބަތިއްބެވެ. އޭގެ ތެރޭގައި ހިމެނެނީ ވަޒީރާ ހަތަރު ސްޓޭޓު މިނިސްޓަރުންނާ ފަސް ޑެޕިއުޓީ މިނިސްޓަރުންނާ ސީނިއާ ޕޮލިޓިކަލް ޑިރެކްޓަރުންގެ ގޮތުގައި ފަސް ބޭފުޅަކާ ޕޮލިޓިކަލް ޑިރެކްޓަރުންގެ ގޮތުގައި ހަތަރު ބޭފުޅެއްގެ އިތުރުން މިނިސްޓަރުގެ ޕީއޭގެ ގޮތުގައި އެއް ބޭފުޅެކެވެ.

އެ 25 ބޭފުޅުންގެ މުސާރައިގެ ތަފްސީލަށް ބަލާއިރު:

• މިނިސްޓަރު ޑރ. އަބްދުﷲ ހަލީލަށް 66،000ރ. މުސާރައަށް ލިބޭ

• ސްޓޭޓް މިނިސްޓަރުގެ ގޮތުގައި އައްޔަންކޮށްފައި ވަނީ ހަތަރު ބޭފުޅުން؛ އެ މަގާމުގެ މުސާރައަކީ، 43،500ރ.

• ޑެޕިއުޓީ މިނިސްޓަރުގެ ގޮތުގައި ފަސް ބޭފުޅަކު އައްޔަންކޮށްފައިވޭ؛ އެ މަގާމުގެ މުސާރައަކީ، 31،500ރ.

• ސީނިއާ ޕޮލިޓިކަލް ޑިރެކްޓަރުންގެ ގޮތުގައި ފަސް ބޭފުޅަކު އައްޔަންކޮށްފައިވޭ؛ އެ މަގާމުގެ މުސާރައަކީ، 25،500ރ.

• ޕޮލިޓިކަލް ޑިރެކްޓަރުންގެ ގޮތުގައި ހަތަރު ބޭފުޅަކު އައްޔަންކޮށްފައިވޭ؛ އެ މަގާމުގެ މުސާރައަކީ، 20،500ރ.

• މިނިސްޓަރުގެ ޕާސަންލް އެސިސްޓެންޓް؛ އެ މަގާމުގެ މުސާރައަކީ، 20،500ރ.

މި މުސާރަތަކާއެކު 25 ބޭފުޅުންގެ މުސާރައަށް މަހަކު،627،500ރ. ހަރަދުވެއެވެ.

"ދައުރު"ން އެދިފައި ވަނީ، 17 ނޮވެމްބަރު 2023އިން ފެށިގެން މި މަހު 2 ވަނަ ދުވަހުގެ ނިޔަލަށް އެ މިނިސްޓްރީއަށް އައްޔަންކޮށްފައި ތިބި ސިޔާސީ ބޭފުޅުންގެ އަދަދާއި އެމީހުންގެ މުސާރަތައް ހޯދުމަށެވެ.