ފެނަކައިން ވަޒީފާއަށް ނަގާފައިވާ އެއްހާހަށްވުރެ ގިނަ މުވައްޒަފުން ކޮންޓްރެކްޓް ހަމަވުމުން ދޫކޮށްލާފައިވާ ކަމަށާއި މަޝްރޫތައް ހަމައަކަށް އެޅުމުން އެ މުވައްޒަފުން އަލުން ވަޒީފާއަށް ނަގާނެ ކަމަށް ފެނަކައިގެ މެނޭޖިންގ ޑިރެކްޓަރު މުއާޒް މުހައްމަދު ރަޝީދު ވިދާޅުވެއްޖެއެވެ.

މުއާޒް މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީގެ ބައްދަލުވުމުގައިއެވެ.

އެ ކޮމިޓީއަށް ފެނަކައިގެ ވެރިން ހާޒިރުކޮށް އެޗްއާރް ޕޮލިސީއާއި ހިލާފަށް މުވައްޒަފުން ވަކިކޮށް މުވައްޒަފުން ނަގަމުންދާ މައްސަލައެއްގައި މައުލޫމާތު ވަނީ ސާފުކޮށްފައެވެ.

އެކަމަށް ޖަވާބުދެއްމުން މުއާޒް ވިދާޅުވީ މިދިޔަ އަހަރުގެ ޖެނުއަރީ 1 ން ފެށިގެން ސެޕްޓެމްބަރު 9 އަކާ ހަމަޔަށް 2،105 މުވައްޒަފުން ވަޒީފާއަށް ނަގާފައިވާ ކަމަށާއި އެ މުއްދަތުގެ ކުރިން ފެނަކައިގައި ތިބީ 4،825 މުވައްޒަފުން ކަމަށެވެ. އެއީ ރިޔާސީ އިންތިޚާބްގެ ކެމްޕެއިން ދުވަސްވަރުކަންވެސް ފާހަގަކޮށްލެވެއެވެ.

އެ މުއްދަތުގައި ނަގާފައިވާ މުވައްޒަފުންގެ ތެރެއިން ގިނަ މުވައްޒަފުންނަކީ ހުއްޓިފައިވާ މަޝްރޫތަކަކަށް ނަގާފައިވާ މުވައްޒަފުންތަކެއް ކަމަށާއި އެތަނުން 1،780 މުވައްޒަފުންގެ ކޮންޓްރެކްޓް ހަމަވުމުން ދޫކޮށްފައިވާ ކަމަށް ވެސް މުއާޒް ވަނީ ވިދާޅުވެފައެވެ.

އެހެންކަމުން އެއްވެސް މުވައްޒަފަކު ހިއުމަން ރިސޯސް ޕޮލިސީއާ ހިލާފަށް ވަކި ނުކުރާ ކަމަށް މުއާޒް ވަނީ ވިދާޅުވެފައެވެ.