ރ. ދުވާފަރު ދާއިރާގެ ވޯޓު ފޮށިތައް އަލުން ގުނަންޖެހޭ އެއްވެސް ސަބަބެއް އަދި މިހާތަނަށް ބެލި ބެލުމުގައި ނެތް ކަމަށް އިލެކްޝަން ކޮމިޝަނުން ބުނެފިއެވެ.
ޗެނަލް 13 އަށް މައުލޫމާތު ދެމުން އީސީގެ މެމްބަރު ހަސަން ޒަކަރިއްޔާ ވިދާޅުވީ ދުވާފަރު ދާއިރާގެ ފޮށިތައް އަލުން ގުނައި ދިނުމަށް އެ ދާއިރާއަށްް ވާދަކުރެއްވި އަމިއްލަ ކެންޑިޑޭޓް އިބްރާހިމް އަބްދުއްރަހްމާން އެދިވަޑައިގެންފައިވީ ނަމަވެސް އެ ފޮށިތައް އަލުން ގުނަންޖެހޭ އެއްވެސް ހާލަތެއް އަދި ސަބަބެއް މިހާތަނަށް ބެލި ބެލުމުގައި ނެތް ކަމަށެވެ.
މި މައްސަލަ ހުށަހެޅުއްވި ކެންޑިޑޭޓާ މިކަމާ ގުޅޭ ގޮތުން އަދި ޖަވާބެއް ދެއްވާފައި ނުވާނެ ކަމަށާއި އަދިވެސް ފޮށި ގުނަންޖެހޭ އެއްވެސް ސަބަބެއް އޮތްތޯ ބެލުމަށްފަހު ގުނަން ޖެހުނަސް ނުޖެހުނަސް އެ ޖަވާބު އެ ފަރާތަށް ވީއެންމެ އަވަހަކަށް ދެއްވާނެ ކަމަށްވެސް ޒަކަރިއްޔާ ވިދާޅުވިއެވެ.
އެ ދާއިރާގެ އިންތިޚާބް ކާމިޔާބު ކުރެއްވީ ޕީއެންސީގެ ކެންޑިޑޭޓް މުހައްމަދު އަލީއެވެ.
ވަގުތީ ނަތީޖާތައް ދައްކާގޮތުން މުހައްމަދު އަލީއަށް ލިބިވަޑައިގަތީ 1074 ވޯޓެވެެ.
އަދި އަމިއްލަ ކެންޑިޑޭޓް އިބްރާހިމް އަބްދުއްރަހްމާނަށް 1070 ވޯޓު ލިބިފައިވާއިރު ދެ ބޭފުޅުންގެ ދެމެދުގައި އުޅެނީ އެންމެ ހަތަރު ވޯޓުގެ ތަފާތުކަން ފާހަގަކޮށްލެވެއެވެ.
