ނިމިގެން މިދިޔަ 20 ވަނަ ރައްޔިތުންގެ މަޖިލީހުގެ އިންތިހާބުގައި 93 ދާއިރާ ގޮނޑީގެ ތެރެއިން އަންހެނުންނަށް ކާމިޔާބުވެފައިވަނީ އެންމެ 3 ގޮނޑިއެވެ. 90 ގޮނޑި ކާމިޔާބުކޮށްފައިވަނީ ފިިރިހެން މެމްބަރުންނެވެ. އެހެނިހެން ދާއިރާގައި ގިނަ އަދަދަކަށް އަންހެނުން މަސައްކަތް ކުރި ނަމަވެސް ބަސް ބުނާ ފެންވަރުގެ މިފަދަ މަޤާމުތަކަށް ވާސިލްވުން އަންހެނުންނަށް ދަތިތަކަކާ ކުރިމަތިލާންޖެހެޔެއެވެ.

މަޖިލީހުގައި މިހާރު ތިއްބެވި މެންބަރުންނާއި މި ފަހަރުގެ އިންތިހާބު ކާމިޔާބުކުރެއްވި އަންހެން ކެންޑިޑޭޓުންނަކީ ސިޔާސީ ޕާޓީތަކުގެ އިސްކޮށް ހަރަކާތްތެރިވާ، ތައުލީމާއި ތަޖުރިބާހުރި އަންހެނުންކަން ފާހަގަކޮށްލެވެއެވެ.

މިފަހަރުގެ މަޖިލިސް އިންތިހާބުގައި ވާދަކުރި އަންހެން ކެންޑިޑޭޓުންނަށް ނަޒަރު ހިންގާލިޔަސް ގިނައީ ތައުލީމީ ގޮތުން ގާބިލް އަދި ތަޖުރިބާކާރު ފަރާތްތަކެވެ. އެހެންނަމަވެސް ތައުލީމާއި ތަޖުރިބާގެ ގޮތުން ބެލިޔަސް ފެންވަރު ދަށް ފިރިހެން ކެންޑިޑޭޓުން، މިސާލަކަށް ބަލާލާއިރު، ފޮނަދޫ ދާއިރާއަށް އިންތިޚާބްވެ ވަޑައިގެން އަބްދުއްރަހީމް އަބްދުﷲ އަށް ވެސް މިވަނީ ގޮނޑި ކާމިޔާބުވެފައެވެ.އަދުރޭމެން ކަހަލަ ނުކިޔަވާ ބޭފުޅުންނަށް މިފަދަ ފުރުސަތުތައް ލިބިގެންދިޔައީތީ ވެސް ހައިރާންވާ މީހުން ގިނައެވެ.

ރާއްޖޭގައި އަންހެނުންގެ ބޮޑު އާބާދީއެއް އޮންނަ އިރު މިއީ ވިސްނާލުން ވަރަށް މުހިންމު ކަމެކެވެ. 2009 ވަނަ އަހަރު މަޖިލީހަށް 5 އަންހެނުން ހޮވިފައިވާއިރު، 2019 ވަނަ އަހަރު 4 އަންހެނުން ވަނީ އިންތިހާބުވެފައެވެ.

މަޖިލީހުގައި އަންހެނުންގެ ނިސްބަތް ދުވަހަކުން ދުވަހަކަށް ދަނީ ދަށުވަމުންނެވެ.މަޖިލިސް މެންބަރުންގެ އަދަދު އިތުރުވަމުންދާއިރު އުންމީދުކޮށްގެން އެންމެންވެސް ތިބީ އަންހެނުންގެ ނިސްބަތް ވެސް އެއާކު އިތުރުވެގެންދާނެކަމަށެވެ. ނަމަވެސް ކަންތައް މިވީ އެހެންނެއްް ނޫނެވެ. އެހެންކަމުން މިއީ ފިޔަވަޅު ނާޅައިފި ނަމަ އަންހެނުންގެ އަޑު މުޅިން މަޖިލީހުން ކެނޑިދާނެ ކަމުގެ ނިޝާނެކެވެ.

އިންތިޚާބަށްފަހު ބޭއްވިގެން ދިޔަ 19 ވަނަ މަޖިލިސްގެ ޖަލްސާގައި އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވަނީ ރައްޔިތުންގެ މަޖިލީހުގެ 33 އިންސައްތައަކީ އަންހެނުންކަމަށް ކަނޑައެޅުމަށް ޤާނޫނު އަސާސީ އަށް އިސްލާހެއް ހުށަހަޅާފައެވެ.

އަންހެނުންގެ ދައުރު މަޖިލީހުގައި ހަނިވުން ނިމުމަކަށް ގެނައުމަށް މިހާރަށް ވުރެ ސީރިއަސް މަސައްކަތްތަކެއް ކުރަންޖެހޭނެކަމަށް ގިނަ ފަރާތްތަކުން ގަބޫލުކުރެއެވެ. މިހެންބުންޏަސް އަޅުގަނޑު މިބުނަނީ ފިރިހެން މެމްބަރުން މަދުކުރަންޖެހެޔެކޭ ނޫނެވެ. އެހެންނަމަވެސް ރާއްޖޭގައި ގާބިލް އަންހެނުން ތިބޭއިރު އެމީހުންނަށް އެ ފުރުސަތުތައް ފަހިކޮށްދިނުމަކީ އަހަރެމެން އެންމެގެ މައްޗައް އޮތް ޒިންމާއެއް ކަން ޔަގީނެވެ.

ނިކަން ވިސްނާލަބަލާށެވެ. މިއީ އަމިއްލަ ޒަމީރާވެސް އުފައްދަން ޖެހޭ ސުވާލެކެވެ.މަޖިލީހަށް އަންހެނުން މަދުވަމުންދަނީ ކީއްވެހެއްޔެވެ؟