ސަރުކާރު ހިންގާ މައި ޕާޓީ ޕީޕަލްސް ނެޝަނަލް ކޮންގްރެސް، ޕީއެންސީގެ ކެމްޕެއިން އޮފީހެއްގައި ހުޅުޖެހި ކަމުގެ ތުހުމަތުގައި މީހަކު ހައްޔަރުކޮށްފި އެވެ.
އެގޮތުން މިއަދު ހައްޔަރު ކުރީ ކުޅުދުއްފުށީ ސިޓީއަށް ނިސްބަތްވާ މީހެކެވެ. ފުލުހުން ބުނި ގޮތުގައި ހައްޔަރު ކުރީ 31 އަހަރުގެ ދިވެހި ފިރިހެނެކެވެ.
އޭނާ ހައްޔަރުކުރީ މިއަދު 14:55 ގައި ކަމަށާއި، ހައްޔަރުކުރީ ކޯޓު އަމުރެއްގެ ދަށުން ކަމަށް ވެސް ފުލުހުން ބުންޏެވެ.
މައުލޫމާތު ލިބޭ ގޮތުގައި ހުޅުޖެހިކަމަށްވަނީ ކުޅުދުއްފުށީގައި ހުރި ކެމްޕެއިން އޮފީހެއްގަ އެވެ. އަދި އެއީ ނިމިދިޔަ މަޖިލިސް އިންތިހާބުގައި ކުޅުދުއްފުށި ދެކުނު ދާއިރާއަށް ޕީއެންސީން ވާދަކުރެއްވި ފަރުހަތު މުހައްމަދަށް ކެމްޕެއިން ކުރުމަށް ހެދި ޖަގަހައެއްކަމަށް މައުލޫމާތު ލިބެ އެވެ.
ފަރުހަތު ވާދަކުރެއްވީ އެމްޑީޕީ ކެނޑިޑޭޓު އަލީ ވަހީދު އާއެވެ. އިންތިހާބުން ފަރުހަތު މޮޅުވީ 92 ވޯޓުގެ ތަފާތަކުންނެވެ.
އިންތިހާބު ނިމުމާއި ގުޅިގެން ޕީއެންސީގެ މެމްބަރުން ހުށަހަޅާފައިވާ މިފަދަ މައްސަލަތަކަށް ފުލުހުން ދަނީ ފިޔަވަޅު އަޅަމުންނެވެ.
