ކޮންމެ ދައުރެއްގައި ވެސް މަޖިލީހަށް އިންތިޚާބްވާ އަންހެން މެމްބަރުން މަދުކަމަށް ވިދާޅުވެ އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީޤް ކަންބޮޑުވުން ފާޅުކޮށްފިއެވެ.

ފުއާދު މިފަދައިން ވިދާޅުވީ މި މަހުގެ 21 ވަނަ ދުވަހު ބޭއްވުނު 20 ވަނަ ރައްޔިތުންގެ މަޖިލިސް އިންތިޚާބް ގެ ދާއިމީ ނަތީޖާ އިއުލާންކުރެއްވުމަށް އީސީން ބޭއްވި ރަސްމިއްޔާތުގައި ވާހަކަދައްކަވަމުންނެވެ.

އެގޮތުން ފުއާދު ވިދާޅުވީ، ދައުރަކަށް ވުރެ ދައުރެއް މަޖިލީހަށް އިންތިހާބުވާ އަންހެން މެމްބަރުންގެ އަދަދު މަދު ކަމަށެވެ.

އެގޮތުން 93 ދާއިރާއަކަށް ބޭފުޅުން ކުރިމަތިލީއިރު، އެ ދާއިރާތަކުގެ ތެރެއިން އަންހެން ބޭފުޅުން ހޮވިފައިވަނީ ތިން ދާއިރާއަކަށް ކަމަށް ފުއާދު ވިދާޅުވިއެވެ.

ފުއާދު ވިދާޅުވި ގޮތުގައި 19 ވަނަ މަޖިލީހުގައި ތިބީ ހަތަރު އަންހެން މެމްބަރުންނެވެ.

އަދި އޭގެ ކުރިން 18 ވަނަ އަހަރުގެ މަޖިލީހުގައި ތިއްބެވީ ފަސް މެމްބަރުން ކަމަަށާއި އޭގެ ކުރިން 6 އަންހެން މެމްބަރުން ތިބި ކަމަށް ފުއާދު ވިދާޅުވިއެވެ.

ވިހި ވަނަ ރައްޔިތުންގެ މަޖިލީހުގެ އިންތިހާބުގައި 93 ދާއިރާއަކަށް މެމްބަރުން ކުރިމަތިލެއްވި އިރު، ޖުމްލަ 369 ކެންޑިޑޭޓުން ވާދަކުރެއްވިއެވެ. އެއީ 326 ފިރިހެން ކެންޑިޑޭޓުން 43 އަންހެން ކެންޑިޑޭޓުންނެވެ.