އޮކްސިޖަން ހުސްވެގެން ފަރުވާ ނުދެވި ތ.ތިމަރަފުށި ހެލްތް ސެންޓަރުގައި މީހަކު ނިޔާވެއްޖެއެވެ.

މިރޭގެ ވަގުތެއްގައި ނިޔާވެފައިވަނީ ތ.ކިނބިދޫ 65 އަހަރުން މަތީގެ މީހެއް ކަމަށް މަޢުލޫމާތު ލިބިފައިވެއެވެ. މި އަންހެންމީހާ ފުއްޕާމޭގެ މައްސަލަޖެހި ނޭވާލުމަށް އުނދަގޫވެ ވޭމަންޑޫ ހޮސްޕިޓަލްގައި 03 ދުވަސް ވަންދެން އޮކްސިޖަންގ ގައި ބާއްވާފައި އޮތް ކަމަށްވެސް މަޢުލޫމާތު ލިބިފައިވެއެވެ.

ބަލި މީހާ މަރުވެފައިވަނީ ވޭމަންޑޫ ހޮސްޕިޓަލް އިން ގުޅާފައި ހުރި އޮކްސިޖަން ފުޅީގައި މައްސަލަ ޖެހިގެން ތިމަރަފުށީ ހެލްތް ސެންޓަރ އިން ބޭނުންކުރި އޮކްސިޖަން ފުޅީގެ ގޭސް ހުސްވެގެން އެއާޕޯޓަށް އެމްބިއުލާންސްގައި ދިޔަ މަގުމަތީގައެވެ.

ތިމަރަފުށި ހެލްތް ސެންޓަރަށް ޙާލު ބޮޑުވެ މާލެއަށް ގެންދިޔުމަށް ބަލިމީހާ ގެނެސްފައިވަނީ މިރޭ 08 ޖެހި އިރު ކަމަށް ތިމަރަފުށިން މަޢުލޫމާތު ހިއްސާކުރި ފަރާތުން ހާމަކޮށްފައިވެއެވެ. ޙާލު ބޮޑު ބަލިމީހެއް ގެންނަ ކަން ތިމަރަފުށި ހެލްތް ސެންޓަރ ޙަވާލުވެގެން ހުރި ތ.ތިމަރަފުށި / އަސްރަފީގެ، އަޙްމަދު ނަސީރަށް އެގި ހުރެ، އޭނާ ވަނީ މަޖިލިސް އިންތިޚާބުގައި ސަރުކާރަށް ލިބުނު ކާމިޔާބީ ފާހަގަކުރުމުގެ ގޮތުން ވޭމަންޑޫގައި އޮތް ހަވާ އެރުވުމުގެ އިވެންޓަށް ގޮސްފައެވެ. އަހްމަދު ނަސީރު މި ކޭސްއަށް އެޓެންޑް ވި އިރު 21:30 ވެއްޖެ ކަމަށް މަޢުލޫމާތު ލިބެއެވެ. ރައްޔިތުންގެ ޚިދުމަތްކުރުމުގައި ޒިންމާދާރު މަޤާމެއް ޙަވާލުވެގެން ހުރި ފަރާތެއް ޙާލުބޮޑު ބަލިމީހެއްގެ ފަރުވާއަށް ގަސްތުގައި ވަނީ އިޙުމާލުވެފައެވެ.

ރައްޔިތުންނަށް ކަށަވަރު ކޮށްދޭނެ ކަމަށް ސަރުކާރުން ކެނޑިނޭޅި ބުނަމުންދާ ތަރައްޤީ އާއި ހަލުވި ސްޕީޑަކީ މީހެއްގެ ފުރާނަ ސަލާމަތްކުރުމަށް މަސައްކަތް ކުރުން ނޫންކަން މިއަދު ސާފެވެ. ސަރުކާރު ހޭބޯނާރާ ހަވާ އެރުވުމުގައި އަވަދިނެތި އުޅޭ އިރު ރައްޔިތުންގެ ހާލު އިހުސާސްވާ ކަމާއިމެދު ޝައްކެވެ.