ރޯދަމަސްތަކުގައި ކަރަންޓާއި ފެން ބިލު އެހެން މަސްތަކާއި ޚިލާފަށް ބޮޑުވެގެން ދާ މައްސަލައަކީ ކޮންމެ އަހަރަކުވެސް ދިމާވަމުންދާ މައްސަލައެކެވެ. މިއަހަރު މި މައްސަލައަށް ހައްލު ހޯއްދަވައިދެއްވާނެކަމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވިދާޅުވެފައިވީ ނަމަވެސް ބިލުތައް ބޮޑުވުމުގެ ޝަކުވާ ރައްޔިތުން އަނެއްކާވެސް އަންނަނީ ކުރަމުންނެވެ.
މިގޮތުން މިހާތަނަށް ފޮނުވައިފައިވާ ކަރަންޓް ބިލްތައް، އެހެން މަސްތަކާއި އަޅާ ބަލާއިރު ހަތަރު ގުނަ ބޮޑު ކަމަށް ބުނެ ވަރަށް ގިނަ ފަރާތްތަކުން ސޯޝަލް މީޑިއާގައި ނުރުހުން ފާޅުކުރަމުންދެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޔުޓިލިޓީ ކުންފުނިތަކުން ފާހަގަކޮށްފައިވަނީ އާންމުން ރޯދަމަހުގައި ކަރަންޓް އަދި ފެން ބޭނުންކުރާ މިންވަރު އެހެން މަސްތަކަށްވުރެ އިތުރުވުމުގެ ސަބަބުން ބިލު ބޮޑުވެފައިވާ ކަމަށެވެ.
ނަމަވެސް ރައީސް މުޢިއްޒު ވަނީ ކިތަންމެ ލޯޑު ބޮޑުވިއަސް ބިލުތަކަށް އިތުރު އެއްޗެއް ނުނަގާނެކަމަށާއި، ސްޓެލްކޯއިން ފެނުގެ ޚިދުމަތް ދޭ ރަށްތަކަށް ދޭން ނަގާ 30/- ގެ ޗާޖުވެސް އުވާލައްވާނެކަމުގެ ޔަގީންކަން ދެއްވާފައެވެ.
އެހެންނަމަވެސް އެހެން ވަޢުދު ތަކެކޭ އެއްގޮތަށް މިފަހަރުވެސް ރައީސް ވިދާޅުވި ބަހުގެ އެއްވެސް އިތުބާރެއްނެތެވެ.
