ދިވެހިރާއްޖޭގެ އެކި ހިސާބުތަކަށް މޫސުމް ގޯސްވެ މޯލްޑިވްސް މީޓިއަރޮލޮޖިކަލް އޮފީހުން ރީނދޫ އެލާޓް ނެރެފިއެވެ.

މެޓް އޮފީހުން މިއަދު ދެ ރީނދޫ އެލާޓްއެއް ނެރެފައިވާއިރު، އެއީ ހއ. އަތޮޅުން ފެށިގެން ވ. އަތޮޅަށް އަދި ގއ. އަތޮޅުން ފެށިގެން އައްޑޫ ސިޓީއަށް ރީނދޫ އެލާޓް ނެރެފައެވެ. ހއ. އަތޮޅުން ފެށިގެން ވ. އަތޮޅަށް އެލާޓު ނެރެފައި ވަނީ، މިރޭ 9:30 އާ ހަމައަށެވެ. އަދި ގއ. އަތޮޅުން ފެށިގެން އައްޑޫ ސިޓީއަށް އެލާޓު ނެރެފައި ވަނީ މިރޭ 10:30 އާ ހަމައަށެވެ.

މާދަމާ ހެނދުނު 06:00އާ ހަމައަށް ހުޅަނގާއި ހުޅަނގު އުތުރުން، އުތުރުގެ އަތޮޅުތަކަށް ގަޑިއަކު ތިން މޭލާއި 13 މޭލާ ދެމެދުގެ ބާރުމިނެއްގައި ވައި ޖެހޭނެއެވެ. އަދި އެހެން ހިސާބުތަކަށް ގަޑިއަކު އަށް މޭލާއި 18 މޭލާ ދެމެދުގެ ބާރު މިނެއްގައި ވައިޖެހޭނެއެވެ. ދެކުނުގައި ރާޅުގެ އުސްމިން އުޅެނީ ދެ ފޫޓާއި ފަސް ފޫޓާ ދެމެދުގައެވެ.

މެޓް އޮފީހުން ބުނީ ބޯކޮށް ވާރޭ ވެހުނު ނަމަވެސް އުތުރަށް ކަނޑުތައް އާދައިގެ ވަރަކަށް މަޑުވާނެ ކަމަށެވެ. އަދި ވިލާގަނޑުގައި އެހެން ހިސާބުތަކަށް ކަނޑު ގަދަވާނެ ކަމަށެވެ.