ތިމަރަފުށީގައި، އިހުމާލުން މީހަކު ނިޔާވި މައްސަލަ ބަލާ ކަމަށް ބުނެފިއެވެ.
65 އަހަރުގެ ދިވެހި އަންހެނަކު ވޭމަންޑޫ ހޮސްޕިޓަލްގައި 03 ދުވަސް ވަންދެން އޮކްސިޖަން ގެ އެހީގައި ނޭވާލައްވަމުން ގެންދިއުމަށް ފަހު އިތުރު ފަރުވާއަށް މާލެ ގެނައުމަށް ދިޔަ މަގުމަތީގައި ވަނީ ނިޔާވެފައެވެ. އެގޮތުން އެ މީހާ ނިޔާވެފައިވަނީ ސިއްހީ އިހުމާލުން ކަމަށް ރިޕޯޓުކޮށްފައިވެއެވެ.
ބަލި މީހާ މަރުވެފައިވަނީ ވޭމަންޑޫ ހޮސްޕިޓަލް އިން ގުޅާފައި ހުރި އޮކްސިޖަން ފުޅީގައި މައްސަލަ ޖެހިގެން ތިމަރަފުށީ ހެލްތް ސެންޓަރ އިން ބޭނުންކުރި އޮކްސިޖަން ފުޅީގެ ގޭސް ހުސްވެގެން އެއާޕޯޓަށް އެމްބިއުލާންސްގައި ދިޔަ މަގުމަތީގައެވެ.
ތިމަރަފުށި ހެލްތް ސެންޓަރަށް ޙާލު ބޮޑުވެ މާލެއަށް ގެންދިޔުމަށް ބަލިމީހާ ގެނެސްފައިވަނީ އެރޭ 08 ޖެހި އިރު ކަމަށް ތިމަރަފުށިން މަޢުލޫމާތު ހިއްސާކުރި ފަރާތުން ހާމަކޮށްފައިވެއެވެ.
ޙާލު ބޮޑު ބަލިމީހެއް ގެންނަ ކަން ތިމަރަފުށި ހެލްތް ސެންޓަރ ޙަވާލުވެގެން ހުރި ތ.ތިމަރަފުށި / އަސްރަފީގެ، އަޙްމަދު ނަސީރަށް އެގި ހުރެ، އޭނާ ވަނީ މަޖިލިސް އިންތިޚާބުގައި ސަރުކާރަށް ލިބުނު ކާމިޔާބީ ފާހަގަކުރުމުގެ ގޮތުން ވޭމަންޑޫގައި އޮތް ހަވާ އެރުވުމުގެ އިވެންޓަށް ގޮސްފައެވެ.
އަހްމަދު ނަސީރު މި ކޭސްއަށް އެޓެންޑް ވި އިރު 21:30 ވެއްޖެ ކަމަށް މަޢުލޫމާތު ލިބެއެވެ. ނަސީރު ހާމަކުރާ ގޮތުގައި އެ ރަށު ހޮސްޕިޓަލުގެ އެމްބިއުލަންސްގެ އޮކްސިޖަން ފުޅި ހުރީ ރަގަޅަށް ކަމަށާ ބަލިމީހާއަށް ދެވެން ހުރި ހުރިހާ ފަރުވާއެއް އެކޮޅުން ދީފައިވާ ކަމަށެވެ. ނަމަވެސް ވޭމަންޑޫއިން ހާމަކުރާ ގޮތުގައި އެކަމުގައި ކަން ހިނގާ ދިޔަ ގޮތާ މެދު ބަހެއް ބުނާނީ ކަން ހިނގާ ދިޔަ ގޮތް ބެލުމަށް ފަހު ކަމަށާ މިހާރު ގެންދަނީ އެ މައްސަލަ ބަލަމުން ކަމަށެވެ.
މިކަމާ ގުޅިގެން ހެލްތު މިނިސްޓްރީއިން އަދި ވަކި އެއްޗެއް ބުނެފައި ނުވެއެވެ. ނަމަވެސް އިހުމާލުން ފުރާނައެއް ގެއްލިގެން ދިއުމުން އިދާރާތައް ހަނު އޮތުމަކީ ބަލައިގަނެވޭނެ ކަމެއް ނޫން ކަމަށް ގިނަ ބަޔަކު ދަނީ ބުނަމުންނެވެ.
