ފުވައްމުލައް ސިޓީގައި ދެ ސައިކަލެއް ޖެހި ހިނގި އެކްސިޑެންޓެއްގައި އަނިޔާވި އެކަކަށް އައިސީޔޫގައި ފަރުވާދެމުން އަންނަ ކަމަށް ފުލުހުން މިއަދު ބުނެފިއެވެ.

އެ އެކްސިޑެންޓުގައި، ޖުމުލަ ތިން މީހަކަށް އެކިވަރުގެ އަނިޔާތައް ލިބުނު ކަމަށާއި އެ ތަނުން އެކެއްގެ ހާލު ސީރިއަސްވެ، އައިސީޔޫގައި ފަރުވާ ދެމުން އަންނަ ކަމަށް ފުލުހުން ބުންޏެވެ.

ފުވައްމުލައް ސިޓީގައި ރޭ ނުރައްކާތެރި ދެ އެކްސިޑެންޓެއް ހިނގާފައިވާ ކަމަށްވެސް ފުލުހުން ހާމަކޮށްފައިވެއެވެ.

ފުލުހުން ބުނީ، ދެވަނަ އެކްސިޑެންޓު ހިނގީ ފުވައްމުލަކުގެ އެއާޕޯޓު ސަރަހައްދުން ދުއްވާފައިި ދިޔަ ސައިކަލެއް، ކަނޑައިގެން ގޮސްފައި ހުރި ގިޑިގެއަކުން ނައްޓައިގެން ދާން އުޅުމުގެ ތެރޭގައި ކަމަށެވެ.

މި އެކްސިޑެންޓުގައި ސައިކަލު ކައްސާލައިގެން ވެއްޓި، ސައިކަލު ދުއްވި މީހާގެ ބޮލަށް އަނިޔާވިއެވެ.

ފުލުހުން އިތުރަށް ބުނީ، މި އެކްސިޑެންޓު ހިނގިއިރު މަގުތައް އޮތީ ވަރަށް އަނދިރިކޮށް ކަމަށާއި އެކަމުގެ ސަބަބުން ދުއްވާ އުޅަނދުފަހަރަށް ވެސް ދަތިތަކާ ކުރިމަތިވީ ކަމަށެވެ.