ރ. ފައިނުގައި ބުރާސްފަތި ދުވަހުގެ ރޭ ހިނގި ނުރައްކާތެރި އެކްސިޑެންޓުގައި އަނިޔާވި ދެ ދަރިވަރުންނާއި ޓީޗަރަށް އައިޖީއެމްއެޗްގެ އައިސީޔޫގައި ފަރުވާ ދޭން ފަށައިފި އެވެ.

މި އެކްސިޑެންޓު ހިނގީ ފައިނު ސްކޫލުގައި ކިޔަވަމުންދާ ދެ ދަރިވަރަކު ސައިކަލެއްގައި ދަނިކޮށް، އެ ވަގުތު ދުވަން ނުކުމެ އުޅުނު ސްކޫލުގެ ޕްރިންސިޕަލާއި އިސްލާމް ޓީޗަރުގެ ގައިގައި ޖެހިގެންނެވެ. ޕްރިންސިޕަލްގެ ހާލު ރަނގަޅު ނަމަވެސް، ދަރިވަރުންނާއި ޓީޗަރުގެ ހާލު ސީރިއަސް އެވެ.

އައިޖީއެމްއެޗް އިން ބުނީ، ބުރާސްފަތި ދުވަހު ހިނގި އެ އެކްސިޑެންޓުގައި އަނިޔާވެގެން ވެންޓިލޭޓަރުގެ އެހީގައި ފަރުވާ ދެމުން އަންނަނީ، ފައިނު ސްކޫލުގެ 49 އަހަރުގެ އިސްލާމް ޓީޗަރަށާއި ސައިކަލުގެ ފަހަތުގައި އިން އެ ސްކޫލުގެ ގްރޭޑް ނުވައެއްގައި ކިޔަވަމުންދާ 14 އަހަރުގެ ކުއްޖާގެ އިތުރުން ގްރޭޑް 10 މި އަހަރު ނިންމި 16 އަހަރުގެ ކުއްޖާއަށް ކަމަށެވެ.

ހޮސްޕިޓަލުގެ މީޑިއާ އޮފިޝަލް ބުނީ އެ ހޮސްޕިޓަލަށް ގެނައި ދެ ކުދިންނާއި ޓީޗަރުގެ ހާލު ވަރަށް ސީރިއަސް ކަމަށެވެ.

ފުލުހުން ވަނީ، އެކްސިޑެންޓުވި ސައިކަލު ޓޯކޮށް، މައްސަލަ ތަހުގީގު ކުރަމުންދާ ކަމަށް ބުނެފަ އެވެ.