ހުޅުމާލޭގައި މިރޭ ހިނގާފައިވާ މާރާމާރީއެއްގައި ދެ މީހަކަށް އަނިޔާވެ ހުޅުމާލެ ހޮސްޕިޓަލްގައި ފަރުވާ ދެމުން ދާކަމަށް މޯލްޑިވްސް ޕޮލިސް ސަރވިސް އިން ބުނެފިއެވެ.
މި މާރާމާރީ ހިނގާފައިވަނީ ދިވެހި ކުދިންތަކަކާއި ބިދޭސީ ބައެއްގެ ދެމެދުގައި ކަމަށާއި މި ކަމާއި ގުޅޭ މަޢުލޫމާތު ފުލުހުންނަށް ރިޕޯޓް ކޮށްފައިވަނީ މިރޭ 21:00 ހާއިރު ކަމަށެވެ.
މި މާރާމާރީ އާއި ގުޅިގެން ދިވެހި ފިރިހެނެއް ހައްޔަރުކޮށްފައިވާ ކަމަށް ފުލުހުން މަޢުލޫމާތު ދެއެވެ. މީގެ އިތުރުން، މި މައްސަލާގައި ބައިވެރިވި އިތުރު މީހުންތައް ދެނެގަތުމުގެ މަސައްކަތް މިހާރު ކުރަމުންދާކަމަށްވެސް ފުލުހުން ބުނެފައިވެއެވެ. މިރޭގެ މާރާމާރީގައި 18 އަހަރުން ދަށުގެ އެއްވެސް ކުޑަކުއްޖެއް ނުހިމެނޭކަމަށް މަޢުލޫމާތު ލިބިފައިވެއެވެ.
މައްސަލަ ތަހުޤީގު ކުރެވެމުންދާ ވަރަކަށް އިތުރު މަޢުލޫމާތު ހިއްސާ ކުރަމުން ގެންދާނެ ކަމަށްވެސް ފުލުހުން ހާމަކޮށްފައިވެއެވެ.
