ރ. އަތޮޅުގައި އޮންނަ ކުޑަކުރަތު ރިސޯޓުން ފުރައިގެން މާލެ އަންނަން ދަތުރުކުރަމުން ދިޔަ ލޭންޑިން ކްރާފްޓެއް ނުވަތަ ކޮޅުވެއްޓިއެއް ބަންޑުން ޖަހާލާ މީހަކު މަރުވެއްޖެއެވެ.
އެމްއެންޑީއެފުން މައުލޫމާތު ހާމަކޮށްފައިވާ ގޮތުގައި "ލިއޯ ޕާލް" ލޭންޑިން ކްރާފްޓު ބަންޑުން ޖަހާލި ހާދިސާ ހިނގާފައިވަނީ ރޭ ފަތިހުގެ ވަގުތެއްގައި ކަމަށާ ކޮޅު ވެއްޓި ބަންޑުން ޖަހާލި ވަގުތު އެ އުޅަނދުގައި ފަސް މީހުން ތިބި ކަމަށެވެ. އޭގެ ތެރެއިން އެކަކު ވަނީ އުޅަނދު ބަންޑުން ޖަހާލި ވަގުތު ގެއްލިފައި ކަމަށާ އެމީހާ ފެނުނީ ހޯދަމުން ދަނިކޮށް އެމްއެންޑީއެފްގެ ޑައިވަރުން ކަމަށް ވެސް މައުލޫމާތު ދިފައިވެއެވެ.
ކޮޅުވެއްޓީގެ ދަށުން ކަނޑުއަޑީގައި އެމީހާ އޮއްވާ ފެނުނުއިރު މީހާގެ ހަރަކާތް ވަނީ ހުއްޓިފައިކަމަށާ ކ.ކާށިދޫ ސިއްހީ މަރުކަޒަށް މިހާރު އެ މީހާވަނީ ގެންގޮސްފައި ކަމަށް އެމްއެންޑީއެފުން ވަނީ ހާމަކޮށްފައެވެ. ބާކީ ތިބި ހަތަރު މީހުން ސަލާމަތް ކުރީ ކަނޑުވެފައި ތިއްބައެވެ.
މިކަމާ ގުޅިގެން އިތުރު ތަފްސީލެއް އެމްއެންޑީއެފުން އަދި ހާމަކޮށްފައިނުވެއެވެ.
ކަނޑުމަތީގެ ހިތާމެރި ހާދިސާއެއް ހިނގާފައި މިވަނީ މުޅި ރާއްޖެއަށް މޫސުން ގޯސްވެ އެކި ވަގުތުތަކަށް މޫސުމީ ސަމާލުވެސް ނެރެމުންދާ ދަނޑިވަޅެއްގައެވެ.
