ތިން ރަށެއްގެ ކައުންސިލުން ހުސްވެފައިވާ ގޮނޑިތަކަށް ކުރިމަތިލުމުގެ ފުރުސަތު އިލެކްޝަންސް ކޮމިޝަން (އީސީ) އިން ހުޅުވާލައިފިއެވެ.

އެގޮތުން ކުރިމަތިލުމަށް ހުޅުވާލާފައިވަނީ ކުޑަހުވަދޫ ކައުންސިލްގެ ރައީސްގެ މަޤާމަށާއި ގަމު ކައުންސިލްގެ މެމްބަރުގެ ގޮނޑިއަށް އަދި މުލަކު ކައުންސިލްގެ އަންހެނުންނަށް ޚާއްސަކޮށްފައިވާ ގޮނޑި އަށެވެ.އީސީ އިން ބުނީ މި ތިން ގޮނޑި ހުސްވެފައިވާތީ އެ ގޮނޑިތަކަށް މެމްބަރުން އިންތިޚާބު ކުރުމަށް ބައި އިލެކްޝަން ބާއްވާނީ ޖޫން މަހުގެ 15 ދުވަހުގައި ކަމަށެވެ.

މި ބައި އިލެކްޝަންގައި ވާދަކުރަން 18 އަހަރު ފުރިފައިވާ ކޮންމެ ދިވެހި ރައްޔިތަކަށްވެސް ކުރިމަތިލެވޭނެއެވެ.  އަދި ސާބިތު ދަރަންޏެއް އޮތް މީހެއްނަމަ އެ މީހާއަކީ ހުކުމާ އެއްގޮތަށް ދަރަނި ދައްކަމުންދާ މީހަކަށް ވާން ޖެހޭނެއެވެ. ލޯކަލް ކައުންސިލްތަކުގެ އިންތިޚާބުގެ ޤާނޫނު ބުނާ ގޮތުން އެ މަޤާމުތަކަށް ކުރިމަތިލާ މީހަކީ މައްޗަށް ޖިނާއީ ކުށެއް ސާބިތުވެ ހުކުމެއް ތަންފީޒު ކުރާ މީހަކަށް ވެގެން ނުވާނެއެވެ.

މި ތިން ރަށުގެ އިތުރުން، މ. މަޑުއްވަރީ ކައުންސިލް ރައީސް، ހއ. އުތީމު، ނ. ލަންދޫ، ނ. ވެލިދޫ ކައުންސިލް މެންބަރު އަދި ހއ. ތަކަންދޫ އާއި ރ. އިންނަމާދޫ ކައުންސިލްގެ އަންހެނުންނަށް ހާއްސަ ގޮނޑިއަށް މެންބަރުން އިންތިޚާބު ކުރުމަށް މެއި 4 ވަނަ ދުވަހު ބައި އިލެކްޝަން ބޭއްވުމަށް ވެސް އިލެކްޝަންސް ކޮމިޝަނުން ވަނީ ނިންމަވާފައެވެ.