އުމުރުން ދުވަސްވީ މީހެއްގެ އަތް ބިންދައިގެންގޮސް ފަރުވާއަށް ފުވައްމުލަކު ސިޓީ އިން މާލެ ގެނައުމަށް އެއާ އެމްބިއުލާންސް ހަމަނުޖެހިގެން ނުގެނެވިފައިހުރިކަން ހާމަވެއްޖެއެވެ.

އަތް ބިންދައިގެން ގޮސްފައިވަނީ އުމުރުން 53 އަހަރުގެ އަންހެނެއްގެއެވެ. އަތް ބިންދައިގެން ދިއުމާއެކު ފުވައްމުލަކު ސިޓީގެ ހޮސްޕިޓަލަށް ދެއްކުމުން އެ ހޮސްޕިޓަލް އިން ފަރުވާދެވެން ނެތްކަމަށާއި ވީއެންމެ އަވަހަކަށް މާލެ ދިޔުމަށް ވަނީ ބުނެފައެވެ.

އާސަންދަ ހަމަޖެހިފައިވީ ނަމަވެސް މާލެ އަންނާނެ ގޮތެއް ވަނީ ނެތިފައެވެ.

ޗެނަލް 13 އަށް މައުލޫމާތު ދެމުން ބަލި މީހާގެ އާއިލާ އިން ބުނީ އިއްޔެ ހަވީރު 5:30 ން ފެށިގެން ބަލި މީހާއަށް އެެއްވެސް ފަރުވާއެއް ދެވިފައިނުވާކަމަށެވެ. އަދި މާލެ އައުމަށް މޯލްޑިވިއަންގެ ފްލައިޓް އަކުން ދެ ޖާގަ ހަމަނުޖެހޭކަށެވެ. އެހެންކަމުން އެއާ އެމްބިއުލާންސް ހަމަޖައްސައިދިނުމަށް ސަރުކާރުގައި އެދިފައިވާކަމަށެވެ.

އެއާއެކު އެންސްޕާގެ ސީއީއޯ އަދި ރައީސް އޮފީހުގެ އިސްތަރުޖަމާނު ހީނާ ވަލީދު ވެސް ވަނީ އެއާރ އެމްބިޔުލާންސް ހަމަޖައްސައިދުނަމަށް އެދިފައެވެ، ނަމަވެސް އެއާރ އެމްބިއުލާންސް ހަމަ ޖައްސައިދެވެނީ ބަލި މީހާގެ އެއްވެސް ވަރަކަށް ހޭނެތުމުން ކަމަށާއި އަތް ބިންދައިގެން ގޮސްފައިވާ އަންހެން މީހާއަށް އިށީނދެ އިނދެވޭ އިރު އެއާ އެމްބިއުލާންސް ހަމަޖައްސައިދެވެން ނެތް ކަމަށް މެޑިކަލް ޓީމުން ހީނާއަށް ވަނީ އަންގާފައިކަން ވެސް ވަނީ ހާމަވެފައެވެ.

އެއާރ އެމްބިއުލާންސް އަކީ ހެއި ނެތިފައިވާ ފަރާތްތަކަށް އެކަނި ބޭނުން ކުރަން ހަމަޖައްސާފައިވާ އެއްްޗެއް ކަމަށް މީގެ ކުރިން ހާމަކޮށްފައިނުވެއެވެ.

ސަރުކާރުގެ އިސް ފަރާތްތަކުގެ އެދުމުގެ ދަށުންވެސް އެއާ އެމްބިޔުލާންސް ހަމަޖައްސައިދެއްވާފައިނުވާކަން ވަނީ ފާހަގަވެފައެވެ.

މޯލްޑިވިއަންގެ އެމެޖަންސީ ސީޓެއް ހަމަޖައްސައި ދިނުމަށް އެދުމުން މޯލްޑިވިއަންގެ ފްލައިޓްތަކުގައި އެމަޖެންސީ ސީޓްތަކެއް ނުހުންނަ ކަމަށް ވެސް ވަނީ ބުނެފައެވެ. އަދި ބަލި މީހާ މާލެ ގެނެވޭނީ މާދަމާގެ ފަތިހުގެ ފްލައިޓަކުން ކަމަށް މޯލްޑިވިއަނުން ވަނީ ބުނެފައި ކަމަށް ވެސް އާއިލާއިން މައުލޫމާތުދެއެވެ.

ބަލި މީހާގެ އާއިލާއިން އިތުރަށް ބުނީ ފުވައްމުލަކު ސިޓީގެ ހޮސްޕިޓަލް ހިންގުމާއި ހަވާލުވެ ހުންނެވި "ފަތުހުﷲ" ނަމަަކަށް ކިޔާ ފަރާތަކުން އެ ކޭސްއަށް އެއްވެސް ވަރަކަށް އެޓެންޑްވެފައިނުވާކަމަށެވެ.

ފުވައްމުލަކު ފަދަ އާބާދީ ބޮޑެތި ސިޓީތަކުގެ ހޮސްޕިޓަލް އިން ފަރުވާ ނުދެވޭ ކަންކަމީ ވަރަށް ވެސް ދެރަ ކަމެއްގެ ގޮތުގައި ގިނަ ބަޔަކު އަންނަނީ ސިފަކުރަމުންނެވެ.