ރޯދަ މަހުގެ ކަރަންޓް ބިލް ބޮޑުކަމަށް ބުނެ ޝަކުވާތައް ގިނަވުމާއެކު، ނިމިދިޔަ މަހުގެ ބިލުން ޑިސްކައުންޓްދޭން ނިންމައިފިއެވެ.

އެގޮތުން ބިލަށް ޑިސްކައުންޓް ދޭން ނިންމި ކަމަށް ބުނެފައިވަނީ ސްޓެލްކޯގެ މެނޭޖިން ޑިރެކްޓަރ، ހުސެއިން ފަހުމީ އެކްސްގައި ކުރެއްވި ޕޯސްޓެއްގައެވެ.

އެގޮތުން ފަހުމީ ވިދާޅުވީ މިހާރު ފޮނުވާފައިވާ ބިލްތައް މި ބަދަލާ އެއްގޮތަށް އަދާހަމަކުރުމަށްފަހު، ވީއެންމެ އަވަހަކަށް ކަސްޓަމަރުންނަށް ފޮނުވިގެންދާނެ ކަމަށެވެ.

ނިމިދިޔަ ރަމަޟާން މަހު ބޭނުން ކުރި ކަރަންޓް ނުވަތަ އެމަހުގެ ބިލުން ޑިސްކައުންޓް ދިނުމަށް ނިންމާފައިވާއިރު، ނިމިދިޔަ އޭޕްރިލް މަހުގެ 28 ވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައި ސަރުކާރުން ވަނީ ރޯދަ މަހަށް ރައްޔިތުންނަށް ލުޔެއް ދިނުމުގެ ގޮތުން ދިން ޑިސްކައުންޓުގެ ދަށުން ހުރިހާ ކަރަންޓު އަދި ފެން ބިލްތަކުން ޑިސްކައުންޓުގެ ގޮތުގައި ޖުމްލަ 20 މިލިޔަން ރުފިޔާ ކަނޑާފައިވާނެކަން ހާމަކޮށްފައެވެ.

ނަމަވެސް ގޭގެޔަށް ކަރަންޓް ބިލް ފޮނުވާފާއިވާއިރު ކަރަންޓް ބިލް އެހެންޔާ އަރާވަރަށް ވުރެ ބޮޑު ކަމަށް ބުނެ ބިލް ތަކުގެ ފޮޓޯ އާއެކު ގިނަ ފަރާތްތަކުން ދިޔައީ ސޯޝަލް މީޑިޔާގައި އާންމުކުރަމުންނެވެ.