ޓްރާންސްޕޯޓު މިނިސްޓްރީގެ ސިޔާސީ މަގާމުތަކުގެ މުސާރައަށް އެކަނި 1.7 މިލިއަން ރުފިޔާ ޚަރަދު ކުރާކަން ހާމަވެއްޖެއެވެ

މިކަން ހާމަވެފަައިވަނީ، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ޓްރާންސްޕޯޓް މިނިސްޓްރީގެ މުވައްޒަފުންގެ މުސާރައިގެ ތަފްސީލު ހޯދަން އަމިއްލަ ފަރާތަކުން އެ މިނިސްޓްރީއަށް ހުށަހެޅުމުން، ފޮނުވި ޖަވާބުގެ ސިޓީއިންނެވެ.

ޓްރާންސްޕޯޓް މިނިސްޓްރީން ދިން ޖަވާބުން ފެންނަ ގޮތުގައި ޓްރާންސްޕޯޓް މިނިސްޓްރީގައި މިނިސްޓަރާ އެކު ޖުމުލަ 32 ސިޔާސީ ބޭފުޅުން އައްޔަންކޮށްފައިވެއެވެ.

އޭގެ ތެރެއިން މިނިސްޓަރު މުހައްމަދު އަމީނަށް މުސާރަ އާއި އިނާޔަތުގެ ގޮތުގައި 62،713 ރުފިޔާ ލިބިވަޑައިގަންނަވައެވެ.

މިނިސްޓްރީގެ ދެ ސްޓޭޓް މިނިސްޓަރުންގެ ތެރެއިން ޑރ. އިބްރާހިމް ޝިޔާމަށް 41،435 ރުފިޔާ ލިބިވަޑައިގަންނަވާއިރު، އަބްދުލް ލަތީފް މުހައްމަދަށް 43،500 ރުފިޔާ ލިބިވަޑައިގަންނަވައެވެ.

13 ޑެޕިއުޓީ މިނިސްޓަރުން ތިއްބަވާއިރު އޭގެ ތެރެއިން ކޮންމެ ބޭފުޅަކަށް މުސާރައިގެ ގޮތުގައި 30،240 ރުފިޔާ ލިބިވަޑައިގަންނަވަ އެވެ.

ހަމަ އެހެންމެ ޓްރާންސްޕޯޓް މިނިސްޓްރީގައި ސީނިއާ ޕޮލިޓިކަލް ޑިރެކްޓަރުންގެ ގޮތުގައި 9 ބޭފުޅުން އަދި ޕޮލިޓިކަލް ޑިރެކްޓަރުންގެ ގޮތުގައި 7 ބޭފުޅުން ތިއްބަވާއިރު، އެ ބޭފުޅުންގެ މުސާރައަށް މަހަކު 345،935 ރުފިޔާ ހަރަދުވެއެވެ.

އެހެންކަމުން ސިޔާސީ މަގާމުތަކުގައި ތިއްބެވި 32 ބޭފުޅުންގެ މުސާރައަށް ޓްރާންސްޕޯޓް މިނިސްޓްރީން މަހަކު 886،703 ރުފިޔާ ހަރަދު ކުރެ އެވެ. އެއީ އެ މިނިސްޓްރީގެ މުވައްޒަފުންގެ މުސާރައަށް ކުރާ ހަރަދުގެ 50 ޕަސެންޓެވެ.

އެ މިނިސްޓްރީގައި ތިއްބަވާ ސިޔާސީ ބޭފުޅުންނާއި މުވައްޒަފުންގެ މުސާރައަށް މަހަކު 1،763،609 ރުފިޔާ ހަރަދުވެއެވެ.

ސިޔާސީ ގޮތުން މަތި ލުއި ޚަރަދު ކުޑަ ސަރުކާރެއް ގާއިމުކުރާނެ ކަމުގެ ވައުދާ އެކު ރައީސް މުއިއްޒު ސަރުކާރު އައި ނަމަވެސް މި ސަރުކާރުގައި މިހާތަނަށް 13 ހާހަށް ވުރެ ގިނަ ސިޔާސީ މަގާމު އުފައްދާފައިވާކަމަށް ރައީސް އޮފީހުގެ ޗީފު ސްޕޯކްސް ޕާސަން ހީނާ ވަލީދު ވިދާޅުވެފައިވެއެވެ. ނަމަވެސް ރައީސް މުއިއްޒު ކުރިން ވިދާޅުވެފައިވަނީ ސިޔާސީ މަގާމުތައް 700 އަށް ވުރެ ގިނަ ނުކުރައްވާނެ ކަމަށެވެ.