ސޯޝަލް މީޑިޔާގައި ބޭނުންކުރާ ހޭޝްޓެގެއް ފެނިގެން ހިތުގައި ވަރަށް ބައިވަރު ސުވާލުތަކެއް އުފެދުނެވެ. ހޭޝްޓެގް ގައި ވަނީ "މުއިއްޒު ސްޕީޑް" މިފަދައިންނެވެ. ސްޕީޑޭ ކިޔާތީ ދެން މިއީ ކާރެއް ބާއޭ ވެސް ހިތައްއެރިއެވެ.

ސްޕީޑްގެ ވާހަކަ ދައްކާއިރު، ފާހަގަކޮށްލަންޖެހޭ ދެތިން ކަމެއް އެބަހުއްޓެވެ. އެގޮތުން ސަރުކާރުން ކުރަން ބުނި އެތައްކަމެއް އަދިވެސް ހުރީ ނުކޮށެވެ. 2023 ވަނަ އަހަރުގެ ރިޔާސީ އިންތިޚާބަށް ކެމްޕެއިން ކުރުއްވި އިރު ޕީޕީއެމް/ޕީއެންސީގެ ލީޑާރޝިޕްވެސް އަދި ޙުދު ރައީސް މުއިއްޒުވެސް ވަނީ ރައްޔިތުންނަށް ފޮނި ހުވަފެންތަކެއް ދައްކަވާފައެވެ.

އެގޮތުން އެންމެ ފުރަތަމަ މި ބަލާލަނީ އިންޑިޔާ ސިފައިންގެ ވާހަކައަށެވެ. ދިވެހިރާއްޖޭގެ އެކި ކަންކޮޅުތަކުގައި ގާއިމްވެފައި ތިބި އިންޑިޔާގެ ސިފައިން އެ ގައުމަށް އަނބުރާ ފޮނުވާލާނެ ކަމަށް ކެމްޕެއިން ދުވަސްވަރު އަޑުން ނަންގަވާ ވިދާޅުވިއެވެ. އެއްވެސް ދިވެހިރައްޔިތެއް އެހެން ގައުމެއްގެ އަސްކަރިއްޔާގެ ބަޔަކު މި ގައުމުގައި ތިބެން ނޭދޭނެތީ އެކަން ކުރުމަށް ހާއްސަ އިސްކަމެއް ދެއްވާނެ ކަަމަށް ވަރަށް ވެސް ގަބޫލުކުރެވޭ ޓޯނެއްގައި ރައީސް މުއިއްޒު ވިދާޅުވިއެވެ.

ވެރިކަން ލިބުމާއެކު އެވާހަކަ ދެއްކުންވެސް މަޑުޖައްސާލިއެވެ. އިންޑިޔާ ސިފައިންގެ އަދަދު ހާމަކުރައްވާނެ ކަމަށް ވިދާޅުވެފައި ހާމަކުރި އިރު އަދަދު ވިދާޅުވީ އެކިފަހަރު އެކިގޮތަށެވެ. އެމްޑީޕީގެ ވެރިކަަމަށް ޖޯކުޖެހި ވެރިންނަށްވެސް ހަމަވީ އެވަރެވެ. ދެން އިންޑިޔާ ސިފައިން ފޮނުވާލާނެ ވާހަކައެވެ. ސީދާ ތާރިހު ބުނަން ބުނީމާ ވިދާޅުވި ތާރިހު އަންނާކަށް މާ ގިނަ ދުވަހެއް ދެނެއް ނެތެވެ. އިންޑިޔާ ސިފައިންގެ ފުރަތަމަ ބެޗް ފޮނުވާލިކަމަށް ވިދާޅުވިއިރު މަދަނީންގެ ގޮތުގައި އެ ގައުމުން ގެނައި ބަޔަކީވެސް ކޮން ބައެއް ކަމެއް ސަރުކާރުން ހާމައެއް ނުކުރެވެ. ހަމަގައިމުވެސް އޮޓޯ ރިކްޝާ ދުއްވާ ބަޔަކު ނުގެންނާނެކަން މި ގައުމުގެ ކިރު ބޯ ތުއްތު ކުއްޖަކަށްވެސް އެނގޭނެއެވެ. "މުއިއްްޒު ސްޕީޑް" ގައި މިކަން ނުކުރައްވަނީ ކިީއްވެހެއްޔެވެ؟

ކުރީގެ ރައީސް އިބްރާހިމް މުހައްމަދު ޞާލިހް ނެރުއްވި އިންޑިޔާ އައުޓް ގަރާރް ބާތިލް ކުރުމުގައި މުއިއްޒު ސްޕީޑް ނުގެންގުޅުއްވަނީ ކީއްވެހެއްޔެވެ؟ އޭރުގައި އެއި ގައިރު ގާނޫނީ ގަރާރެއް ކަމަށް ވިދާޅުވި ބޭފުޅުން ސަރުކާރުގެ އިސް ފަޑީގައި ތިއްބެވި އިރު މިއަދު އެ ގަރާރު ޓޯޓަލީ ފައިން ހެއްޔެވެ؟

ދެން އޮތް އަނެއް ވާހަކައަކީ ކުރީ ސަރުކާރުން ހެދި ގޮތް ނޭނގޭ އެއްބަސްވުންތަކެވެ. ވެރިކަން ލިބުމާއެކު ހާމަކުރައްވާނެކަމަށް ވިދާޅުވި އިރު ވެރިކަމަށް 5 މަސްވެއްޖެއެވެ. ހާމަނުކުރެވުނުތާ އެވާހަކަ މުއިއްޒު ސްޕީޑްގައި ދައްކާލުން ކިހިނެެއްހެއްޔެވެ؟

ކީރިތި ރަސޫލާއަށް ފުރައްސާރަކޮށް އެމްޑީއެން ރިޕޯޓް ނެރުނު މީހުންނަށް އެކަށީގެންވާ ހައްގު އަދަބު ދެއްވާނެ ސަރުކާރަކީ މި ސަރުކާރުކަމަށް އޭރު ކެމްޕެއިން ދުވަސްވަރު ދައުވާކުރިއެވެ. މިހާރު އެވާހަކަތައް ނުދައްކަނީ ކީއްވެހެއްޔެވެ؟ އެ ފަރާތްތަކަށް މުއިއްޒު ސްޕީޑްގައި އަދަބު ދޭން ބޭނުން ނުވަނީ ހެއްޔެވެ؟

ވިއްކާލި ކަނޑުގެ ވާހަކަ ދައްކާ ނުލައި މި ރިޕޯޓް ފުރިހަމައެއް ނުވާނެކަން ޔަގީނެވެ. ކުރީގެ ރައީސް އިބްރާހިމް މުހައްމަދު ޞާލިހްގެ ސިއްރު ސިޓީފުޅަކުން، ރާއްޖޭގެ ހާއްސަ އިގްތިޞާދީ ކަނޑުގެ ސަރަހައްދެއް މޮރީޝިއަސް އަށް ވިއްކާލުމުން، ވެރިކަމަށް އައުމަށްފަހު އެ ކަނޑު އަނބުރާ ދިވެހިންނަށް ހޯދައިދެއްވާނެ ކަމުގެ ފުރިހަމަ ޔަގީންކަން ސަރުކާރުން ދިނެވެ. މަސައްކަތް ކުރަމުންގެންދާ ކަމަށް ވެރިކަމުގެ ފުރަތަމަ ބާބުގައި ވިދާޅުވިއެވެ. މިހާރު އެ މަސައްކަތް ހުރި ހިސާބު ހާމަކުރުން ސަރުކާރަށް މުހިންމު ނޫންކަން ހާމަނުކުރާތީވެސް ސާފެވެ. މުއިއްޒު ސްޕީޑްގައި ދިވެހީންނަށް ގެއްލުނު ކަނޑު ހޯދައިދެއްވުން ކިހިނެއްހެއްޔެވެ؟

މުއިއްޒު ސްޕީޑްގައި ކުރެވޭނެ ބައިވަރު ކަންތައް މިހުރީއެވެ. ނަމަވެސް ބޭބީ ނާސަރީ ކުދިން ބްލޮކްސް ބޭނުންކޮށްގެން ގެޔެއް ހަދާލާ ގޮތައް މަސައްކަތެއް ފަށާފައި މުއިއްޒު ސްޕީޑޭ ވިދާޅުވާތީ އަންނަނީ ހިންޏެވެ.

ބަޔަކު ކިޔާތީ އަޑުއިވުނެވެ. މިއީ ކާރެއްވެސް ނޫނެވެ. ސަރުކާރެއް ވެސް ނޫނެވެ. މިއީ ބޭކާރެކެވެ.