ޔަހޫދީ އިސްރާއީލުން ފަލަސްތީނުގައި ހިންގަމުން އަންނަ ހަނގުރާމަ ހުއްޓާލައި، އެގައުމުގެ މިނިވަން ދައުލަތެއް ގާއިމު ކުރުމަށް ރާއްޖެއިން ގޮވާލައިފިއެވެ.

އިއްޔެ ފެށި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ އެންމެ އިސްވެރިންގެ 15 ވަނަ ސަމިޓުގައި ރާއްޖޭގެ ފަރާތުން ފަލަސްތީނާ އެއްކޮޅަށް ވަކާލާތުކުރުމަށް ބައިވެރިވެވަޑައިގެންފައިވަނީ ރާއްޖޭގެ އިސްލާމިކް މިނިސްޓަރ، ޑރ. މުހައްމަދު ޝަހީމް އަލީ ސައީދުއެވެ.

ސަމިޓުގައި ތަޤްރީރު ކުރައްވަމުން މިނިސްޓާރ ޝަހީމް ވަނީ ފަލަސްތީނުގައި ހިންގަމުން އަންނަ ހަނގުރާމަ ހުއްޓާލައި ފަލަސްތީނުގެ މިނިވަން ދައުލަތެއް ގާއިމު ކުރުމަށް ގޮވާލާފައެވެ.

އަދި ބައިނަލްއަގުވާމީ ޖިނާއީ ކޯޓުގައި އިސްރާއީލާއި ދެކޮޅަށް ހުށަހަޅާފައިވާ މައްސަލައަށް ރާއްޖޭން ތާއިދުކޮށް، އިސްރާއީލާއި ދެކޮޅަށް ވަކާލާތު ކުރާނެ ކަމަށް ވިދާޅުވެފައެވެ.

ފަލަސްތީނު މިނިވަން ކުރުމަށް އިތުރަށް މަސައްކަތް ކުރަން ޖެހޭ ކަމަށާއި އިސްރާއީލުގެ އަމަލުތަކަށް އެފަރާތްތަކުން ޖަވާބުދާރީ ކުރުވަން ޖެހޭ ކަމަށް ވެސް މިނިސްޓާރ ޝަހީމް ވަނީ ފާހަގަކުރައްވާފައެވެ.