ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަން ދެބައިވީއިރު މުޅި ގައުމު ހަލަބޮލިކޮށްލި ވާހަކައަކީ ރާއްޖޭގައި އިންޑިއާ ސިފައިން ގާއިމްވެ ތިބޭ ވާހަކަ އިންނެވެ. މިކަން ވެގެން ދިޔައީ ދިވެހިންގެ ގިނަ ބައެއްގެ ކަންބޮޑުވުމަކަށެވެ. ދިވެހިންގެ މިނިވަންކަން ގެއްލިގެން ގޮސްދާނެކަމުގެ ބިރުވެރިކަން އުފެދި ރައްޔިތުން މިކަމާއި ދެކޮޅަށް އޭރު އަޑު އުފުލަންވެސް ފެށި އެވެ.

އޭރު އިދިކޮޅުގައި އޮތީ ރައީސް އަބްދުﷲ ޔާމީން ލީޑު ކުރައްވަމުން ގެންދެވި ޕީޕީއެމް، ޕީއެންސީ އެވެ. ރައީސް ޔާމީން ޖަލު ބަންދުގައި ހުންނެވުމުން އެމަނިކުފާނުގެ އިރުޝާދާއިއެކު އިދިކޮޅުގެ ސަފުތައް ލީޑުކުރައްވަމުން ގެންދެވީ މިހާރު ވެރިކަމުގެ އިސް ސަފުގައި ތިއްބެވި ބޭފުޅުންނެވެ. ހަގީގަތަށް ދަންނަވާނަމަ މިދިޔަ އަހަރު ބޭއްވި ރިޔާސީ އިންތިހާބުގައި އޭރުގެ އިދިކޮޅުގެ މުޅި ކެމްޕެއިން ބިނާވެފައި އޮތީ އިންޑިއާ އައުޓުގެ ނަމުގައި ކުރިއަށް ގެންދިޔަ ހަރަކާތަށެވެ. ހުރިހާ ޕޯޑިއަމްތަކެއްގައިގެން މިހާރުގެ ރައީސް ޑރ. މުހައްމަދު މުއިއްޒުވެސް ދައްކަވަމުން ގެންދެވީ އިންޑިއާ ސިފައިން ރާއްޖެއިން ބޭލުމުގެ ވާހަކަ އެވެ.

އިންޑިއާ އައުޓު ކެމްޕެއިން ހޫނުވެ ބައިނަލްއަގުވާމީ މީޑިއާތަކުން، ހާއްސަކޮށް އިންޑިއާގެ މީޑިއާތަކުން މިކެމްޕެއިންގެ ވާހަކަ ދައްކަން ފެށުމުން އޭރުގެ ސަރުކާރަށްވެސް ޕްރެޝަރު ބޮޑުވި އެވެ. އެހެންވެ ރައީސުލްޖުމްހޫރިއްޔާގެ ހާއްސަ ގަރާރަކުން އިންޑިއާ އައުޓު ކިޔުން މުޅިން މަނާކުރި އެވެ. އަދި އެފަދަ ބެނާތައް އާންމު ތަންތަނުގައި ދެމުމާއި އެޝިއާރު ލިޔެ ނުވަތަ އަޑުގަދަ ކުރާއިން ގޮވާނަމަ އެކަން ހުއްޓުވުމުގެ ބާރު ފުލުހުންނަށް ދިނެވެ. މިއީ ދިވެހި ރައްޔިތުންގެ ކުރިމަތީގައި ރައީސް ޞާލިހުގެ އަގު އިތުރައް ވެއްޓިގެން ދިޔަ ކަމެކެވެ.

ކޮންމެއަކަސް ރައީސް މުއިއްޒު ވެރިކަމަށް ވަޑައިގެންނެވުމުގެ ކުރިން އިންޑިއާ ސިފައިން ރާއްޖެއިން ބައިލާނެކަމަށް ވައުދުވެވަޑައިގެންނެވި އެވެ. އަދި އެއްވެސް ބޭނުމެއްގައި ރާއްޖޭގެ އެއްވެސް ސަރަހައްދެއްގައި އިންޑިއާ ސިފައިންނަށް ނުތިބެވޭނެކަމަށްވެސް އެމަނިކުފާނު ވިދާޅުވި އެވެ. ވެރިކަމަށް ވަޑައިގެން މާ ގިނަ ދުވަހެއް ނުވެ މިމަސައްކަތް ފެއްޓިކަމަށް ސަރުކާރުން ބުންޏެވެ. އެހެންނަމަވެސް މިކަމަކީ ބޮޑު ގައުމަކާއިއެކު ރާއްޖެއިން އޮތް ގުޅުމަށްވެސް ބުރޫއަރައިފާނެ ކަމެއްކަމުން އިންޑިއާ ސިފައިން ބޭލުމުގެ މަސައްކަތް ފެށީ އެއްބަސްވުންތަކެއްވެސް ތައްޔާރު ކުރެވިގެންކަމަށް ރައީސް މުއިއްޒު ވިދާޅުވި އެވެ.

އޭގެ ފަހުން ދެން އިވެންފެށީ އިންޑިއާ ސިފައިން އެކި ބެޗުތަކަށް ބަހާލައިގެން ރާއްޖެއިން ފޮނުވައިލަމުންދާކަމުގެ ވާހަކަތަކެވެ. ކޮންމެ މަހަކު ބެޗެއް ބާލަމުން މިމަހު 10 ގެ ނިޔަލަށް ހުރިހާ ސިފައިން ރާއްޖެއިން ފައިބާނެކަމަށް ރައީސް ވިދާޅުވި އެވެ. މި މައްސަލަގަނޑުގެ ތެރެއިން ރާއްޖެއާއި އިންޑިއާ އާއި ދެމެދު ދައުލަތުގެ އެންމެ މަތީ ފެންވަރުގެ މަޝްވަރާތަކެއް ފެށިއްޖެ އެވެ. އިންޑިއާގެ ފޮރިން މިނިސްޓަރާއިއެކު ދިވެހި ދައުލަތުން އެކި ފަހަރުމަތިން ބައްދަލުކުރަންވެސް ފަށައިފި އެވެ. އެހެންކަމުން އަޑި ނޭނގޭ ކަންތައްތަކެއް ހިނގަމުން ދާކަމަށް ހީވާން ފަށައިފި އެވެ.

އެންމެ ފުރަތަމަ ކަމަކީ ރައީސް ޞާލިހުގެ ސަރުކާރުގައި އިންޑިއާ އައުޓު ކިޔުމާއި ދެކޮޅަށް އޭރު ނެރުނު ގަރާރެވެ. މި ގަރާރު އަދިވެސް ބާތިލެއް ނުކުރެ އެވެ. އޭރު އިދިކޮޅުގައި އޮވެ ރައީސް އޮފީހުގެ ސްޕެޝަލް އެޑްވައިޒަރުގެ ގޮތުގައި މިހާރު ހުންނެވި ލ. ފޮނަދޫ ދާއިރާގެ އިންތިހާބީ މެމްބަރު އެންމެ އަޑު ހަރުކޮށް ވިދާޅުވީ އެ ގަރާރަކީ ގާނޫނާއި ހިލާފު ގަރާރެއް ކަމަށެވެ. އެހެންނަމަވެސް އަދި އަދަށް ދާންދެންވެސް ރައީސް މުއިއްޒު އެގަރާރު ބާތިލުކުރުމުގެ ވާހަކަ ނަންގަނެފައިވެސް ނުވެ އެވެ. މިއީ އިންޑިއާ ސިފައިން ބޭލުމުގެ މައްސަލައިގައި ރައީސް މުއިއްޒުގެ އިހްލާސްތެރިކަމާއިމެދު ސުވާލު އުފެދޭ ކަމެކެވެ.

އިންޑިއާ ސިފައިން ރާއްޖެއިން ބޭލުމުގެ ވާހަކަ ދައްކަމުން ދަނިކޮށް އެހެން ވާހަކައެއްވެސް ފެންމަތިވެއްޖެ އެވެ. އިންޑިއާ ސަލާމަތީ ބާރުތަކުގެ މަދަނީ ބޭފުޅުން ރާއްޖޭގައި ތިބުމުގެ ހުއްދަ ދެވޭނެ ވާހަކަ އެވެ. މިޖެހުނީ ކޮންތާކު ހެއްޔެވެ؟ ރައީސް ޞާލިހުވެސް ވެރިކަމުގައި ހުންނަވައި ތަކުރާރުކޮށް ވިދާޅުވަމުން ގެންދެވީ ހަތިޔާރުއެޅި އިންޑިއާ ސިފައިން ނުތިބޭނެ ކަމަށެވެ. އެހެންނަމަވެސް ހެދިފައިވާ އެއްބަސްވުންތަކެއްގެ ދަށުން އިންޑިއާ ސަރުކާރުން ރާއްޖެއަށް ފޮނުވާފައިވާ ހާއްސަ ވަފުދުގައި ހިމެނޭ ބޭފުޅުން ތިބޭނެ ކަމަށެވެ. މިސަރުކާރުގެ ރާގުވެސް މިހާރު ހުރީ މި ބީދައިންނެވެ. އިންޑިއާ ސިފައިން ޔުނީފޯމު އަޅައިގެން ނުތިބޭނެ ކަމަށާއި ތިބޭނީ މަދަނީ އޮފިޝަލުންކަމަށް މިދަނީ ބުނަމުންނެވެ.

ހަގީގަތަށް ދަންނަވާނަމަ ރައީސް މުއިއްޒު މިއުޅުއްވަނީ އިންޑިއާ ސިފައިން ބާލާކަށެއް ނޫނެވެ. މިއުޅެނީ އިންޑިއާ ސިފައިން އަޅައިގެން ތިބި ޔުނީފޯމު ބާލާށެވެ. ޔުނީފޯމު ބޭލުމަކުން އެމީހުން މިތަނުގައި ތިބޭ މަގްސަދާއި އިންޑިއާ ސަރުކާރުގައި އެމީހުންގެ ރޯލަށް ބަދަލު އަންނާނެ ހެއްޔެވެ؟ މަދަނީއޭ ބުނެ މިމައްސަލަ ނިންމައިލުމުން އެއީ ރައީސް މުއިއްޒުގެ ވައުދު ފުއްދުނީކަމަށް ބެލެވިދާނެ ހެއްޔެވެ؟