ކުރީގެ ރައީސް ކަން ކުރެއްވި މުހައްމަދު ނަޝީދު އަވަހާރަކޮށްލަން ހަމަލާ ދިންތާ 3 އަހަރުވުމުން، އެ ހަމަލާގެ ތަހުގީގުތައް އަވަސްކޮށް، ޝަރީއަތްތައް ނިންމަން ރައްޔިތުންގެ މަޖިލީހުގެ ރައީސް މުހައްމަދު އަސްލަމް ގޮވައިލާފިއެވެ.
އަސްލަމް މިފަދައިން ގޮވާލާފައި ވަނީ ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުންނެވެ.
އެގޮތުން އަސްލަމް ވިދާޅުވީ، ނަޝިދަށް އަމާޒުކޮށް ދިން އެ ހަމަލާއާ ގުޅޭ ގޮތުން ކުރާ ތަހުގީގުތައް އަވަސްކޮށް ޝަރީއަތްތައް ނިމުމަކީ ވަރަށް ވެސް މުހިންމު ކަމެއް ކަމަށެވެ.
އަސްލަމް ވަނީ އެ ހަމަލާއާ ގުޅިގެން ރައްޔިތުންގެ މަޖިލީހުން ހެދި އިންކުއަރީއަށް ފަހު ހުށަހަޅާފައިވާ ހުށަހެޅުންތައް ތަންފީޒުކުރަން ވެސް ގޮވާލާފާއެވެ.
ނަޝީދަށް އަމާޒުކޮށް ދިން ހަމަލާގައި ދައުލަތުން ދައުވާ ކުރި ފަރާތްތަކުގެ ޝަރީއަތް އެންމެ ފަހުން ކޯޓުގައި ބާއްވާފައި ވަނީ މީގެ ދެ މަސް ކުރިން ކަން ފާހަގަކޮށްލެވެއެވެ.
