ރާއްޖޭގެ ހަރަދުތައް ދެކޮޅު ނުޖެހި ގައުމު ސޮވަރިން ޑިފޯލްޓަކަށް ހިނގައިދާނެކަމުގެ އިންޒާރުދީފައިވަނިކޮށްވެސް އިންޒާރަކަށް ބެލުމެއް ނެތި ސިޔާސީ މަގާމުތައް އުފައްދާ ބަހަމުން ދިއުމަކީ ކޮންމެ އިންތިހާބަކާ ދިމާކޮށް ރައީސް ޑރ. މުހައްމަދު މުއިއްޒުގެ ސަރުކާރުގެ އަތްމަތީ ކަމަށް ވަނީ ހަދާފައެވެ.

އެގޮތުން ނިމިދިޔަ މަޖިލިސް އިންތިހާބާ ދިމާކޮށް ވެސް އެތައް މަގާމެއް އުފައްދާ އެތައް ބަޔަކަށް ސިޔާސީ ގޮތުން ވަނީ މަގާމުތައް ބަހާފައެވެ. ޝަރުތަކީ ހަމައެކަނި ވޯޓުކޮޅެއް ހޯދައިދިނުމެވެ. މިކަން ދޮގު ނުކުރެވޭނެއެވެ.

ކަންކަން މިހެން ހުރިއިރު ނިމިދިޔަ ސަރުކާރުގެ މަތި ބަރުކަމާ ފަލްކާ މަތީގައި ސިޔާސީ މަގާމުތައް އަތުރާލާފައި ހުންނަ ގޮތުގެ ވާހަކަ ދައްކަމުން އައި ސަރުކާރަކުން ފެންނަމުން ދަނީ ހަމަ އެކަންކަން ތަކުރާރުކުރާ މަންޒަރެވެ. އިންތިހާބުތަކަށް ނުފޫޒު ފޯރުވުމަށް މަގާމުތަކުގެ ބޭނުން ނަހަމަ ގޮތުގައި ހިފާ ސިޔާސީ މަގާމުތަކަށް މީހުން އައްޔަންކުރާނީ ވެސް އެ ބީދައިންކަން ނިމިގެން މަޖިލިސް އިންތިހާބުން ނުހަނު ރަގަޅަށް ހާމަވެފައިވާއިރު، ރައީސް މުހައްމަދު މުއިއްޒުގެ ސަރުކާރުގެ މަތި ބަރުކަމުގެ ވާހަކައަކީ މިހާރު ކޮންމެ ހޮޅުއައްޓެއްގައި ކޮންމެ ކޮފީ މޭޒެއްގައި ކޮންމެ ސުފުރާއެއްގެ މަތީގައި ދައްކަމުން އަންނަ ވާހަކައެކެވެ.

ސަރުކާރު ހިންގުމަށް ސިވިލް ސާވިސް މުވައްޒަފުންގެ ބޭނުން ހިއްޕަވަން ޖެހިވަޑައިގަންނަކަމަށް އިރެއްގައި ވަކާލާތު ކުރެއްވި ނަމަވެސް އެއްވެސް މިނިސްޓްރީއެއްގައި 10، 12 ޕޮލިޓިކަލް ޑިރެކްޓަރުންނާއި އެއަށްވުރެ ގިނަ މިނިސްޓަރު ފެންވަރު ބޭފުޅުން އައްޔަންކޮށްގެން ނޫނީ ސަރުކާރު ހިންގޭކަމަށް ނުވިއެވެ.

700އަށް ވުރެ ސިޔާސީ މަގާމުތައް ނުކުރާނެ ކަމަށް ވިދާޅުވި ސަރުކާރުން މިހާތަނަށް 13000އަށް ވުރެ ގިނަ ސިޔާސީ ވަޒީފާ އުފައްދަވާފައިވާއިރު، މި ބޭފުޅުންނަށް އޮތް މަސްއޫލިއްޔަތަކީވެސް ކުޑަ މަސްއޫލިއްޔަތެއް ނޫނެވެ.

ކުރީ ސަރުކާރުތަކަށް ބަލާއިރު ސިޔާސީ މަގާމުތައް އުފެއްދީ ރައްޔިތުންނަށް ޚިދުމަތް ކުރުމަށެވެ. ސަރުކާރުގެ ސިޔާސަތުތައް ތަންފީޒުކުރުމަށް ބާރުއެޅުމަށެވެ. އަދި އެކަންކަން ސިވިލް ސާވިސް މުވައްޒަފުން ލައްވާ ކުރުވުމަށެވެ.

ނަމަވެސް އެއާ ޚިލާފަށް މިހާރު ސިޔާސީ މަޤާމުތަކުގައި ތިއްބަވާ ބޭފުޅުންެ އެންމެ ބޮޑު މަސްއޫލިއްޔަތަކީ ސަރުކާރު ދިފާއުކުރުންމެވެ. ސަރުކާރުގެ ވުޒާރާތަކުން ހިންގާ ނޭއްގާނީ ކަންކަން ފޮރުވުމެވެ. ވައްކަންތަކުގައި މަތިޖަހައިދިނުމެވެ. ދެންވެސް ސރުކާރަށް ހަޑި ނަމެއް ލިބިދާނެ ކަންކަން ފޮރުވައިދީ ރައްޔިތުންނަށް މަންޒަރު ރީތިކޮށް ދެއްކުމެވެ. އެންމެ ބޮޑު ކަމަކަށް ރައީސުލްޖުމްޙޫރިއްޔާ މުހައްމަދު މުއިއްޒަށް ސަނާ ކިޔުމެވެ.

އެމަނިކުފާނުގެ ސަޚުސިއްޔަތު ވަރުގަދަކަން ދެއްކުމެވެ. އެމަނިކުފާނަށް ހުޝާމަދުކުރާނެ ބަޔަކު އިސް ސަފަށް ނެރުމެވެ.

ސަރުކާރުގައި މިއަދު ތިއްބެވި 13000 އަށް ވުރެ ގިނަ ސިޔާސީ މުވައްޒަފުންގެ މަސައްކަތަކީ އެއީއެވެ. ހެނދުނު އޮފީހަށް ވަޑައިގެން ޓްވީޓާގައި ރައީސް މުއިއްޒަށް ތައުރީފުކުރުމެވެ. އެމަނިކުފާނު ކޮށްދެއްވި ކަންކަމާއި، ކޮށްދެއްވާނެކަމަށް ވީ ވައުދުތަކާއި، އެމަނިކުފާނުގެ ކާމިޔާބީތަކުގެ ވާހަކަދެއްކުމެވެ.

ސިޔާސީ މީހުންގެ މަސްއޫލިއްޔަތަކީ މިއީކަމުގައި ދަންނަވަން ޖެހޭ އެންމެ ބޮޑު އެއް ސަބަބަކީ މި ނޫންގޮތަކަށް އަމަލުކުރާ މީހަކަށް ސަރުކާރުގެ ސިންގާ ސަނާއިން ގާޖަ ގެއްލިގެންދާތީއެވެ.

ކޮންމެ އަކަސް ސަރުކާރު ދިފާއުކޮށް ޓްވީޓުކުރުމާ ކޮމްންޓުކުރުމަށް މިހާ ގިނަ އަދަދެއްގެ ބޭފުޅުން ތިއްބެވިއިރު 700 އަށް ވުރެ ގިނަ ނުވާނެ ކަމަށް ވިދާޅުވި މަގާޟުތައް އަތް ނުފޯރާ ފަށަށް އަރައިގެން އަތު ފަތު ނުޖެހި އެއޮއްގެން ދަނީއެވެ. 13000 700 ހުރި ފަރަގު ދިވެހީންގެ ރާއްޖޭގައި ތަފާތީ ކަމުގައި ވެސްދާނެއެވެ. އެހެނީ އިސް ވަޒީރަކީ 50 ގުނަ 4 ކުރީމާ 2 ލައްކައިގެ ހިސާބު ޖައްސަވާ ބޭފުޅަަށްވެފައި އެޑްވައިޒަރގެ ހިސާބު ޗާޓަށް އަދި ސިޔާސީ މަގާމުތަކުގެ އަދަދު 700 އަށް ނާރަނީ ތޯއްޗެކެވެ. ނަމަވެސް މިއީ ދެން ބޮޑު ވަރު އެހެން ނޫންތޯއެވެ؟

ސިޔާސި މަގާމުތަކުގެ މުސާރައަށް ދައުލަތުން އެތައް މިލިއަނެއް ޚަރަދުކުރާއިރު ދައުލަތުގެ ހަރަދުތައް ކުޑަކުރަން މަޖުބޫރު ކަމަށް ބުނެ ބައެއް މިނިވަން މުއައްސަސާތަކާ އަދި އިދާރާތަކުގެ ބަޖެޓުން އެތައް ރުފިޔާއެއް އުނިކޮށްފިއެވެ. މިކަން ފިނޭންސް މިނިސްޓްރީއަށް ދޮގު ނުކުރެވޭނެއެވެ.

އެހެންކަމުން ބުނެލަން ޖެހެނީ މި ފަހަރު ރައީސް މުއިއްޒުގެ ސަރުކާރުގެ ސިޔާސީ މަގާމުތަކުގެ އަދަދު ވެގެން މިދިޔައީ އަދުރޭގެ ހިސާބު ޖެހުމަށް ކަމަށެވެ.