އިންޑިއާއާ އެކު ވެފައިވާ ގޮތް ނޭނގޭ އެއްބަސްވުންތައް ހާމަނުކުރުމަށް ދިވެހި ސަރުކާރުން ތަފާތު އުޒުރުތައް ދައްކަން ފައްޓަވައިފިއެވެ.

ނިމިދިޔަ ސަރުކާރުން ދިވެހިންނަށް ގެއްލުންވާ ގޮތަށް އެތައް ސަތޭކަ އެގްރިމަންތުތަކެއް ހަދާފައިވާ ކަމަށާ އެ އެގްރިމަންޓުތައް ވެރިކަމަށް އައުމަށް ފަހު ހާމަކުރައްވާނެ ކަމަށް ރައީސް ޑރ. މުހައްމަދު މުއިއްޒު ވަނީ ރިޔާސީ އިންތިހާބުގެ ކެމްޕެއިން ތެރޭގައި ރައްޔިތުންނަށް ވައުދުވެވަޑައިގެންފައެވެ.

ނަމަވެސް ވެރިކަމުގެ ހުވާ ކުރެއްވުމަށްފަހު 6 މަހާ ގާތްވެފައިވާއިރުވެސް އަދިވެސް އެއިން އެއްވެސް އެގްރިމަންޓެއްގެ ހިލަމެއް ރައްޔިތުންނަށް ހަމައަށް ފޯރުކޮށްދީފައިނުވެއެވެ. ސަބަބަކީ ކޮބައިތޯ ކަމަާ އަދި އެގްރިމަންޓުތައް ހާމަކުރައްވާނެ ތާރީޚަކާ ގުޅޭގޮތުން ނޫސްވެިރއަކު ރައީސް އޮފީހުގެ ޗީފު ސްޕޯކްސް ޕާސަން ހީނާ ވަލީދާ ސުވާލުކުރުމުން ވިދާޅުވީ، އިންޑިއާއާއެކު މިދިޔަ ސަރުކާރުން ގާއިމުކުރި އެއްބަސްވުންތަކުގެ ގޮތުން، މުޅި އެއްބަސްވުން ހާމަކުރޭވޭނީ ރައްޔިތުންގެ މަޖިލީހަށް ކަމަށެވެ.

ހީނާ ވިދާޅުވީ، ސަރުކާރުތަކުން އެކުލަވާލާފައި ހުންނަ އެ ފަދަ އެގްރިމަންޓުތައް ހުންނަ ގޮތުން އެކަންކަން ހާމަކުރެވެނީ ވަކި އުސޫލުތަކުގެ ދަށުން ކަމަށެވެ.

ހީނާގެ މި ވާހަކަތަކާ އެކު ގިނަ ބަޔަކުވަނީ ފާޑުކިޔަން ފަށާފައެވެ. އެގޮތުން ދައުލަތުގެ ތަރުޖަމާނުގެ ވާހަކަ އެހެން ހުރުމުން ދޭހަވގެެން ދަނީ ރިޔާސީ އިންތިހާބުގެ ތެރޭގައި ރައްޔިތުންނަށް ވެފައިވަނީ ދޮގު ވައުދުތަކެއް ހާމަވާން ފަށައިފި ކަމަށާ ކުރީ ސަރުކާރުން އެގްރިމަންޓުތައް ހާމަނުކުރަނީ އެކަމުގައި އެމްޑީޕީއަށް ފައިދާ އޮތުމުން ކަމަށް ބުނި ބުނުމަކީވެސް ދޮގެއްކަން ހާމަވާ ކަމަށެވެ.

ހީނާ ވަނީ އެއްބަސްވުންތައް ހާމަކުރުމަށް ވި ވައުދު އޮޅުވާލައްވަން ވެސް މަސައްކަތްކުރައްވާފައެވެ. އެގޮތުން ހީނާ ވިދާޅުވީ، އެފަދަ އެއްބަސްވުންތަކަކީ ރައްޔިތުންގެ މަޖިލީހުގެ ކަމާ ގުޅޭ ވަކި ހާއްސަ ކޮމިޓީއަކަށް ހާމަކުރެވޭނެ މައުލޫމާތު ކަމަށްވުމުން އޭރު ވަކާލާތު ކުރަމުން ދިަޔއީ އެކަން މަޖިލީހުން ނުކުރާ ސަބަބު ހޯދުމަށް ކަމަށެވެ.

ހީނާ މިފަދައިން ވިދާޅުވެފައިވާއިރު، އެއްބަސްވުންތަކުގައި ދިވެހި ދައުލަތުގެ މިނިވަންކަމާއި ސިޔާދަތަށް އަސަރު ކުރާ މައުލޫމާތެއް ހިމެނޭ ނަމަ ރައްޔިތުންނަށް ހާމަކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. މި ސަރުކާރުގެ ފުރަތަމަ ޕްރެސް ކޮންފެރެންސްގައި، ސަރުކާރުގެ ސިޔާސަތު ތަފުސީލުކޮށްދިނީ ވެސް އެ ގޮތަށެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އިންޑިއާއާއެކު އެކުލަވާލި އެއްބަސްވުންތަކުގެ ތެރެއިން އަސްކަރީ ބައެއް އެއްބަސްވުންތަކާ ގުޅޭ ގޮތުން އޭރުގެ އިދިކޮޅު ފަރާތްތަކުން ކަންބޮޑުވުން ފާޅުކޮށްފައިވެއެވެ. ހާއްސަކޮށް އުތުރުތިލަފަޅު އެއްބަސްވުމާއި ހައިޑްރޯގްރަފީ އެއްބަސްވުމަށެވެ.