އިސްރާއިލްގެ ޕާސްޕޯޓްގައި ރާއްޖެއަށް މީހުން އެތެރެވުން މަނާކުރަން ސަރުކާރުން ފަސްޖެހޭތީ ރައްޔިތުންގެ މަޖިލީހުގެ އަލިފުށި ދާއިރާގެ މެމްބަރު މުހައްމަދު ރަޝީދު (ބިގޭ) ކަންބޮޑުވުން ފާޅުކޮށްފިއެވެ.
ރައްޔިތުންގެ މަޖިލީހުގެ ހޯރަފުށި ދާއިރާގެ މެމްބަރު އަހުމަދު ސަލީމް މަޖިލީހުގެ މިއަދުގެ ޖަލްސާއަށް ހުށަހެޅުއްވި ކުއްލި މައްސަލައިގެ ބަހުސްގައި އަލިފުށި ދާއިރާގެ މެމްބަރު މުހައްމަދު ރަޝީދު ވިދާޅުވީ އިސްރާއިލް ޕާސްޕޯޓް މަނާކުރަން ރާއްޖޭން ފަސްޖެހޭ މަންޒަރު ފެންނަކަމަށެވެ.
އޭނާ ވިދާޅުވި ގޮތުގައި ޓޫރިޒަމް ކުރިއަރުވަން ނުވަތަ އެހެން ސަބަަބަކާ ހެދި ނަމަވެސް ބާރުވެރި ގައުމުތަކަށް ރާއްޖެއިން ވެފައިވާ އަޅުވެތިކަމެއް ކަމަށެވެ.
އިސްރާއިލްގެ ފަތުރުވެރިން ރާއްޖެ އައުން މަނާކޮށް އެ ގައުމުގެ އުފެއްދުންތައް ރާއްޖެ ގެނައުން މަނާކުރަން ގޮވާލާ ގަރާރެއް ރައްޔިތުންގެ މަޖިލީހުން ފާސްކުރީ އޭޕްރިލް 1 ގައެވެ.
