އުތުރުގެ އަތޮޅުތަކުން އައިސް ނުލިބި، މަސްވެރިކަން ކުރަން ދަތިވާކަމަށް ބުނެ ބޮޑު ކަންނެލި މަސްވެރިންގެ ޔޫނިއަނުން ކަންބޮޑުވުން ފާޅުކޮށްފިއެވެ.
މިފަދައިން ބުނެފައިވަނީ ބޮޑު ކަންނެލި މަސްވެރިންގެ ޔޫނިއަނުން އެކްސްގައި ކުރި ޕޯސްޓެއްގައެވެ.
އެގޮތުން އެ ޔޫނިއަނުން ބުނީ މި ދުވަސްވަރު ގިނަ އަދަދެއްގެ ދޯނިތަކުން ދަނީ އުތުރުގައި ކަންނެލީގެ މަސްވެރިކަން ކުރަމުން ކަމަށެވެ.
އެހެންނަމަވެސް އެ ދޯނިތަކަށް އައިސް ލިބޭނެ ގޮތެއް ނެތް ކަމަށެވެ.
އެ ޕޯސްޓުގައި ފިޝަރީޒް މިނިސްޓާރ އަހުމަދު ޝިޔާމް ޓެގްކޮށް އިތުރަށް ބުނެފައިވަނީ ހއ. ހޯރަފުށި އައިސް ޕްލާންޓުން އައިސް ނުލިބޭތާ އެތައް ދުވަހެއް ފާއިތުވެފައިވާ ކަމަށެވެ.
އަދި އެ އަތޮޅު އިހަވަންދޫގައި ހުންނަ އައިސް ޕްލާންޓުން ވެސް އައިސް ލިބޭނެ ކަމުގެ އުންމީދެއް ނެތް ކަމަށްވެސް އެ ޕޯސްޓްގައި ވަނީ ފާހަގަކޮށްފައެވެ.
މިފަހަކަށް އައިސް ރާއްޖޭން މަސް އެކްސްޕޯޓް ކުރާ މިންވަރުވެސް ވަނީ ދަށަށް ވެއްޓިފައެވެ.
