ޓޫރިޒަމް މިނިސްޓަރު އިބްރާހީމް ފައިސަލަކީ ސޯޝަލް މީޑިއާގައި އާންމުންގެ ފާޑުކިޔުން އެންމެ ބޮޑަށް އަމާޒުވަމުންދާ މިނިސްޓަރެވެ. އެމަނިކުފާނަށް ފާޑުކިޔަން ފެށުމާއެކު، އެ ފާޑުކިޔުންތައް އަމާޒުވާ ސަބަބެއްކަމަށް ފައިސަލަށް ފެނިވަޑައިގަންނަވާ ސަބަބުތައްވެސް ކޮންމެވެސް މިންވަރަކަށް ހާމަކުރެއްވިއެވެ.

އެއީ އޭނާގެ އާއިލާއަކީ ހައްދުންމަތީގެ ނިކަމެތި އާއިލާއަކަށްވުމެވެ. މަޖިލިސް އިންތިޚާބުގައި ސަރުކާރު ހިންގާ ޕީއެންސީއަށް ލިބުނު ކާމިޔާބީ އިހުތިފާލުކުރަން ލ.ފޮނަދޫގައި ބޭއްވި ސައިކަލު ބުރު ނިންމައިލުމަށްފަހު، އެ ހަރަކާތުގެ ބައިވެރިންނާ ވާހަކަދައްކަވަމުން ފައިސަލު ވިދާޅުވީ، އޭނާއަކީ ނިކަމެތި އާއިލާއަކަށް އަދި ރަށަކަށް ނިސްބަތްވާ މީހަކަށްވީތީ މަލާމާތްކުރިއަސް ފަރުވާލެއް ނެތް ކަމަށެވެ.

ފައިސަލެވެ. ނިކަމެއްޗަކަށްވެގެން މަނިކުފާނަށް ނުވަތަ އެހެން މީހަކަށް މަލާމާތްކުރިޔަސް އެއީ މައްސަލައެކެވެ. އެމީހަކު ނިސްބަތްވާ އާއިލާއާއި ތަނަވަސްކަމަށް ބަލައި މަލާމާތްކުރުމަކީ އެއްގޮތަކަށްވެސް ބަލައިގަނެވޭނެ އަދި މިމުޖުތަމައުން ޖާގައެއް އޮންނަންވާނެ ކަމެއް ނޫނެވެ. ނަމަވެސް ސުވާލަކީ މަނިކުފާނަށް މީހުން ފާޑުކިޔަނީ މަނިކުފާނު ނިކަމެތި އާއިލާއަކަށް ނިސްބަތްވެވަޑައިގަންނަވާ ނިކަމެއްޗަކަށް ވެވަޑައިގަންނަވާތީތޯ ނުވަތަ އެހެން ސަބަބަކާ ހުރެތޯއެވެ؟ އިއްޒަތްތެރި ވަޒީރެވެ. މަނިކުފާނު މިއަދު ތިޔަ ހުންނެވީ ރާއްޖޭގެ އެންމެ މުހިއްމު އަދި އެންމެ ހައްސާސް ސިނާއަތު ހޭރިޔާކުރައްވަން ހަވާލުވެވަޑައިގެން، އެ ސިނާއަތުގެ ކައްޕިތާނަށް ވެވަޑައިގެންނެވެ.

ރާއްޖޭގެ ޚާރިޖީވަޒީރެކޭ އެއްފަދައިން ރާއްޖެއިން ބޭރުގައި ރާއްޖެ ތަމްސީލުކުރެއްވުމުގެ ކޮންމެވެސް މިންވަރެއްގެ ޒިންމާއެއްވެސް ތިޔަ މަގާމާއެކު މަނިކުފާނުގެ އިސްތަށިފުޅުގައި އެޅިއްޖެއެވެ. މަނިކުފާނަކީ 50 އަހަރަށްވުރެ ދޮށީ ދިވެހި ފަތުރުވެރިކަމުގެ މޫނެވެ. އެހެންވީމާ މިދެންނެވި ޒިންމާތަކާއި ވާޖިބުތަކުގެ ތަރާދުގައި މަނިކުފާނު މިނެކިރައި އެ މިނެކިރުމުން ފެންނަ ބުރަދަނެއްގެ ވާހަކަދެއްކުމަކީ ޒާތީވުމެއް ނޫނެވެ. އެއީ ރައްޔިތުންގެ ހައްގެކެވެ. ފައިސަލެވެ. ދިވެހިރާއްޖެއަކީ ދެކުނު އޭޝިޔާގެ އެންމެ ތައުލީމީ ޤައުމެވެ. 98 އިންސައްތައަށްވުރެ ގިނަ މީހުންނަކީ ލިޔަންކިޔަން ދަންނަ މީހުންނެވެ. އުމުރުން 50 އަހަރުން މަތީ އާބާދީގެ ބޮޑުބަޔަކީ ދެ ބަހުން ނުވަތަ އެއަށްވުރެ ގިނަ ބަހުން ވާހަކަދައްކަން ލިޔެކިޔަން އެނގޭ މީހުންނެވެ.

1990 ގެ އަހަރުތަކުން ފެށިގެން ނިކަމެތިންގެ ދަރިން އަންނަނީ އޯލެވެލް އޭލެވެލް އިމްތިހާނުތަކުގައި ރާއްޖޭގެ އަޝްރާފުންގެ ދަރިންނާ ވާދަކޮށް ކާމިޔާބުތައް ހޯދައި، ރައީސުލްޖުމްހޫރިއްޔާ ދެއްވާ ސްކޮލާޝިޕްތަކާއި އެނޫންވެސް މަތީ ތައުލީމުގެ ފުރުސަތުތައް ހޯދައިގެން ދުނިޔޭގެ އެންމެ ފެންވަރު ރަނގަޅު ޔުނިވާސިޓީތަކުން ކިޔަވަމުންނެވެ. ޗޯވްނިން ސްކޮލާޝިޕް އަދި ފުލްބްރައިޓް ސްކޮލާޝިޕުތައް ފަދަ "ޕްރިސްޓިޖަސް" ސްކޮލާޝިޕް ފުރުސަތުތައް ހޯދައިގެން ކިޔެވި ދިވެހިން މަދުނޫން އަދަދަކަށް މި ފަސްގަނޑުގައި އެބަތިއްބެވެ.

މަނިކުފާނު އެ ސިނާއަތެއްގެ ސިޔާސަތުތައް އެކުލަވައިލާ ތަންފީޒުކޮށް ހިންގުމާ ހަވާލުވެވަޑައިގެން ތިޔަ ހުންނެވި ސިނާއަތުގެ އެންމެ މަތީ ފަންތީގައި، ދުނިޔޭގެ ޔުނިވާސިޓީތަކުން މަތީ ފާސްތަކާއި ރަންވަނަތައް ހޯދާފައިތިބި ދިވެހިން މަދެއް ނުވާނެއެވެ. ރާއްޖެއާއި ރާއްޖެއިން ބޭރުން އެ ދާއިރާގެ ތަޖުރިބާ ހާސިލުކޮށް އެންމެ ބޮޑެތި ހޮޓާ ޗެއިންތަކުގައި މަތީ ފެންވަރުގެ މަގާމުތައް އަދާކުރި ދިވެހިން ރާއްޖޭގައި އެބަތިއްބެވެ. އޭގެ ތެރޭގައި މަނިކުފާނު ނިސްބަތްވެވަޑައިގަންނަވާ ޕީއެންސީއަށް ތާއީދުކުރާ، މަނިކުފާނާ އެއް އުމުރެއްގެ ނުވަތަ މަނިކުފާނަށްވުރެ ހަނގު މީހުންވެސް އެބަތިއްބެވެ. އެ އެންމެން އެކަހެރިކޮށްފައި މަނިކުފާނަށް މިހާރު ތިޔަ ހުންނެވި މަގާމު ލިބިވަޑައިގަތީ ކޮން ސަބަބަކާހުރެކަން މަނިކުފާނު ސާފުކޮށްދެއްވަންވީ ނޫންތޯއެވެ؟

މަނިކުފާނަށް ފާޑުކިޔުން އަމާޒުވަނީ އެހެންވެއެވެ. މަނިކުފާނު ނިކަމެތިވެގެން ނިކަމެތި އާއިލާއަކަށް ނިސްބަތްވެގެނެއްނޫނެވެ. އާއިލީ ގުޅުން ފިޔަވައި ތިޔަ މަގާމު މަނިކުފާނަށް ލިބިވަޑައިގަންނަވަންޖެހޭ ސަބަބެއް ނެތީއެވެ. ތިޔަ މަގާމަށް މަނިކުފާނު ކުފޫހަމަވެވަޑައިގަންނަވާކަން ސާބިތުކުރެއްވުމަށް ދައްކަވާނެ އެއްވެސް އެއްޗެއް މަނިކުފާނުގެ އަތްޕުޅުގައި ނެތަތީއެވެ. ދެން އޮތީ މަގާމާ ހަވާލުވެވަޑައިގަތުމަށްފަހު ޕާފޯމްކުރައްވާ ކުރެއްވުމެވެ. ބައްލަވާށެވެ. 2023 ވަނަ އަހަރު ރާއްޖޭގެ ފަތުރުވެރިކަން ވަޒަންކޮށް ދިން އެވޯޑެއް ބައްލަވައި ވަޑައިގެން އެ އެވޯޑު ލިބިވަޑައިގަތުމުން އެކަމުގެ ކްރެޑިޓު ނަންގަވަން އުޅުއްވުމުން މަނިކުފާނުގެ ވިސްނުންފުޅުގެ ކޮށިކަން ދިވެހިންނަށް ސާފުނުވާނެތޯއެވެ؟ އަދިވެސް ނުނިމެއެވެ. ރާއްޖެއިން ބޭރަށް ވަޑައިގެންފިނަމަ ޕެނަލްތަކުގައި މަނިކުފާނު ބައިވެރިވެވަޑައިގަންނަވަމުއެވެ.

އަދި ބޭރުގެ ނޫސްވެރިންނަށް އިންޓަވިއު ދެއްވަމުއެވެ. އެ ވާހަކަފުޅުތައް އަޑުއަހަންޖެހެނީ އަޅުގަނޑުމެންނަށެވެ. އަޅުގަނޑުމެން ތެރޭގައި ކިޔަވައިގެން ތިބި މީހުން ގިނައެވެ. ފަރިތަކަމާއެކު ރީތިކޮށް އިނގިރޭސިން ވާހަކަދައްކައިލުމަކީ މިހާރު ގިނަ ދިވެހިންނަށް ވަރަށް އާދައިގެ ކަމެކެވެ. މަނިކުފާނު ކޮށަކޮށައިގެން ނުބައިކޮށް ބަސްތައް ވިދާޅުވަމުން، ހަމަޖެހޭ ޖުމްލައެއް ވިދާޅުނުވެވި އިނގިރޭސިން ދައްކަވާ ވާހަކަފުޅު އިވުމުން ލަދުވެތިވަނީއެވެ. އެކަމަށް ފާޑުކިޔެނީ އެހެންވެއެވެ. ދެން މަނިކުފާނު ވިދާޅުވެދާނެއެވެ. އިނގިރޭސިން ވާހަކަދައްކަވަން އެނގިވަޑައިނުގަތުމަކީ މައްސަލައެއް ނޫންކަމަށެވެ.

އާދޭހެވެ. އެކަމަށް ދެބަސްވާކަށް ނެތީމެވެ. ނަމަވެސް ދައްކަވާ ވާހަކައެއް ނުފަރިތަކޮށް ދައްކަވާއިރު އެ ވާހަކައަކީ އާރުލާ ފެންހިފާ ވާހަކައަކަށްވާނަމަވެސް ތަންފުކެއް މީހުން ފާޑުކިޔާ މިންވަރު މަދުވީހެވެ. ފައިސަލެވެ. އައުދާނަ މިނިސްޓަރެވެ. މަނިކުފާނުގެ ވާހަކަފުޅުގެ އިބާރާތުގެ ކޮށިކަމާ އެއްވަރަށް އެ ދައްކަވާ ވާހަކަފުޅުގެ ކޮލިޓީވެސް ނެތެވެ. އިންޑިއާ ފަތުރުވެރިންނާ ގުޅޭ ގޮތުން ސުވާލުކުރުމުން، އިންޑިއާ ފަތުރުވެރިން މުހިއްމުވަނީ ބޮޑު އާބާދީއެއް އެ ޤައުމުގައި އޮންނާތީކަމަށް މަނިކުފާނު ވިދާޅުވިއިރު، އިންޑިއާއަކީ މިހާރު އެންމެ ހަލުއިކޮށް ކުރިއަރަމުންދާ އެއް އިގުތިސޯދުކަމާއި އިންޑިއާގެ މެދުފަންތީގެ އާބާދީ ބޮޑުވަމުންދާތީ ތަނަވަސް މީހުން އިތުރުވެ ދަތުރުވެރިން ގިނަވަމުންދާތީ، އިމާޖިން ސޯސް މާކެޓެއްގެ ގޮތުގައި ރާއްޖެއަށް އިންޑިއާގެ ބޭނުންތެރިކަން ވިދާޅުވެދެއްވަން މަނިކުފާނަށް އެނގިވަޑައނުގަތެވެ. ރާއްޖެއާއި އިންޑިއާ ކައިރިވުމުން ދަތުރުފަތުރުގެ ހަރަދުތައް ކުޑަވުމުން ޗުއްޓީ ހޭދަކުރަން ހަރަދުކުރާނެ ފައިސާ އިންޑިއާ ފަތުރުވެރިން އަތުގައި ދުރު ގައުމުތަކުން އަންނަ ފަތުރުވެރިންގެ އަތުގައި ހުންނަ މިންވަރަށް އިތުރަށް ހުންނާނެކަން މަނިކުފާނަށް އެނގިވަޑައިނުގަތެވެ.

އަދި ދެމެހެއްޓެނެވި ފަތުރުވެރިކަމާއި ފަތުރުވެރިކަން ޑައިވަސިފައިކުރާ ވާހަކަދައްކަވާއިރު، ތިމާވެށި ރައްކާތެރިކުރުމަށް ސަރުކާރުން ތަންފީޒުކުރާ ސިޔާސަތެއް، ސްޕޯޓްސް ޓޫރިޒަމާއި ކަލްޗަރަލް ޓޫރިޒަމް ގެނައުމަށް ކުރާނެކަމެއް މަނިކުފާނަށް ވިދާޅުވެނުދެއްވެއެވެ. އޯވާ ޓޫރިޒަމް، އިކޯސައިޑް، ސަގާފަތުތައް އެކްސްޓިންޓުވުން ފަދަ މައުލޫއެއްގައި މަނިކުފާނު ވިދާޅުވާނެ އަދި މަނިކުފާނަށް ވިދާޅުވެވޭނެ ބަސްފުޅެއް ނޯވެއެވެ. އެހެންކަމުން ކޮށަމުން އޮޅެމުން ދެބަހުން އެއްބަސް ނުގުޅިވެސް މިފަދަ އޮއްޓަރުހުރި ވާހަކައެއް މަނިކުފާނު ދެއްކެވިނަމަ މީހުންގެ އިހުތިރާމު ލިބިވަޑައިގަތީހެވެ. ފާޑުކިޔާ މިންވަރު މަދުވީހެވެ. ނަމަވެސް އެ އެއްޗަކުން ނުކުންނާނީ އޭގައި ހުރި އެއްޗެއްތާއެވެ. ވަޒީރެވެ. މަނިކުފާނަށް މަލާމާތްކުރަނީ ފަތުރުވެރިކަމުގެ ސިނާއަތް އެނގިވަޑައިނުގަންނަވާތީއެވެ.

ކިޔަވައިވިދާޅުވީ ނަމަކަށް ކަމުގައިވާތީ ކޮމްޕްލެކްސް މައްސަލަތަކުގައި ވާހަކަދައްކަވަން އެނގިވަޑައިނުގަންނަވާތީއެވެ. ސިޔާސަތުތައް ތަފުސީލުކުރައްވާއިރު އޮއްޓަރުހުރި ވާހަކައެއް ނުދެއްކެވޭތީއެވެ. ބިދޭސީ ބަހަކުން މަނިކުފާނު ވާހަކަދައްކަވާ ކޮންމެ ފަހަރަކު ދިވެހިން އެކުއެކީ ލަދުގަންނަވައިލައްވާތީއެވެ. ކުރުކޮށް ދަންނަވަނީނަމަ ނާގާބިލުވީމައެވެ. އެއީ މަނިކުފާނުގެ އިޖުތިމާއީ "ސްޓެޓަސް"އާއި އާއިލާގެ ފަންތިއަކާ ގުޅުންހުރި ކަމެއް ނޫނެވެ. މަނިކުފާނުގެ ކުރިން މަނިކުފާނަށްވުރެ މާ ނިކަމެތި މީހުން ރާއްޖޭގައި މިނިސްޓަރުކަންކޮށްފިއެވެ.

އައްޑޫގެ އާދައިގެ އާއިލާއަކުން ވަޑައިގެންނެވި ޑރ.ހަސަން ސައީދާއި ފުވައްމުލަކުގެ ނިކަމެތި އާއިލާއަކަށް ނިސްބަތްވާ ޑރ.މުހައްމަދު ޖަމީލް އަހްމަދާއި، އަތޮޅު ތެރޭގެ އާދައިގެ ދެ ރަށަކަށް ނިސްބަތްވާ މަންމައަކާއި ބައްޕައެއްގެ ދަރިއެއްކަމަށްވާ މުހައްމަދު ނަޝީދު (ކުއްޓި) ފަދަ ބޭފުޅުންނެވެ. އެއިން އެއްވެސް ބޭފުޅަކު މަގާމަށް ވަޑައިގަތީ އިސްވަޒީރުކަމުގައި ހުންނެވި ބައްޕާފުޅުގެ ފަސްބައިގައި އެލިވަޑައިގެންނެއް ނޫނެވެ. އެތައް އަހަރަކު ދައުލަތަށް ކުރެއްވި ހިދުމަތާއި އޭގެ ކުރިން ހާސިލުކުރެއްވި ތައުލީމާއި ތަޖުރިބާއިންނެވެ. މަނިކުފާނަށް މަލާމާތްކުރަނީ އަދި ފާޑުކިޔަނީ އިސްވަޒީރުގެ ދަރިކަލުންނަށް ނުވިނަމަ ވަޒީރުކަން ކީއްކުރަންތޯ، ރިސޯޓެއްގެ ޑިޕާޓުމެންޓެއްގެ މެނޭޖަރުކަމަށްވެސް މަނިކުފާނު ކުފޫހަމަނުވާތީއެވެ.