ކުރީގެ ސަރުކާރުގައި ރައްޔިތުންނަށް ދޭން ނިންމައި، މިދިޔަ ނޮވެމްބަރު މަހު ތެރޭގައި އެޕްލިކޭޝަންސްތަކަށް ހުޅުވާލި ވިނަރެސް ފްލެޓްތަކުގެ ފޯމުތައް ބާޠިލް ކުރުމަށްފަހު، މިހާރު ވެރިކަންކުރާ ޕާޓީ ޕީ.އެން.ސީ އިން ފާސްކޮށްފައިވާ ލިސްޓަކަށް ބާކީ ހުރި ވިނަރެސް ފްލެޓްތައް ބަހާ ނިންމާފައިވާ ކަމުގެ ވާހަކަތައް ފެތުރިއްޖެއެވެ.

މަޢުލޫމާތު ލިބިފައިވާ ގޮތުގައި ދެންނެވިފައިވާ ލިސްޓަށް ފްލެޓްތައް ބަހާފައިވަނީ، ސީލައިފް ސްކޭމްގައި ގެއްލުން ލިބުނު ފަރާތްތައް ހިމަނައިގެން ކަމުގައި ވާހަކަ ދެކެވިފައިވީ ނަމަވެސް ވިނަރެސް ފްލެޓްތައް ލިބިފައިވާ މީހުންގެ ތެރޭގައި ސީލައިފް އަދި ކޭޕާކް މައްސަލައިގައި އެއްވެސް ގުޅުމެއް ނެތް ފަރާތްތަކަށެވެ. މީގެ އިތުރުން، ފާއިތުވި ދެ އިންތިޚާބުގައި މިހާރުގެ ވެރިކަން ގެންނަން އެންމެ ބޮޑަށް ފައިވިއްދާލާފައި ހުރި މިހާރުގެ އިސް ވަޒީރު އަބްދުއްރަޙީމް އަބްދުﷲގެ އަރިސް 10 ފަރާތަކަށްވެސް ފްލެޓް ދީފައިވާކަމަށް ހޯދިފައިވެއެވެ.

މިދިޔަ އަހަރު ނޮވެމްބަރު މަހު އޮންލައިން ކޮށް ވިނަރެސް ފްލެޓްތަކަށް ހުށަހެޅުމަށް ފޯމު ފޮނުފައިވާ ފަރާތްތަކުގެ ފޯމުތައް ބާޠިލް ކޮށްފައިވަނީ މިދިޔަ ހަފްތާގެ ތެރޭގައެވެ.

އެޗްޑީސީ އިން ކުރިން ހާމަކޮށްފައިވާ ގޮތުން މި ފޯމުތައް ބާޠިލްކުރީ ފޯމު ހުށަހެޅުމަށް ހުޅުވާލި ފުރުސަތުގައި ދިމާވި ޓެކްނިކަލް މައްސަލަތަކުގެ ސަބަބުން ކަމުގައެވެ. ނަމަވެސް އާ ސަރުކާރު ހަވާލުވެ، މަޖިލިސް އިންތިޚާބާއި ދިމާކޮށް، ފްލެޓްގެ ޙައްޤުވެރިން އަތުން އެމީހުންނަށް ލިބެންޖެހޭ ފްލެޓް އަތުލާ ސަރުކާރުގެ މަތީ ފަޑީގެ ބޭފުޅުންގެ އަރިސް ފަރާތްތަކަށް ވަނީ ބަހާ ނިންމާފައެވެ. ކޮރަޕްޝަނުން ފުރިފައިވާ ޑރ މުއިއްޒުގެ މި ވެރިކަމުގެ 05 އަހަރު ކުރިއަށް އޮތް އިރު ނިކަމެތި ރައްޔިތުންގެ ހާލު ތަސައްވަރު ކޮށްލައްވާށެވެ.