ހއ. ދިއްދޫގެ އައު އިންޖީނުގެ އެޅުމަށް ކަމަށް ބުނެ ކުރީ ސަރުކާރުން ކޮންޓްރެކްޓު އުސޫލުން ރިޔާސީ އިންތިހާބާ ދިމާކޮށް ނެގި މުވައްޒަފުންގެ ކޮންޓްރެކްޓު އައު ނުކުރަން ނިންމި ނިންމުން ރައްޔިތުންގެ މަޖިލީހަށް ހުށަހަޅައިފިއެވެ.

މައްސަލަ މަޖިލީހަށް ހުށަހެޅީ، ދިއްދޫ ދާއިރާގެ މެމްބަރު އަބްދުﷲ ވަހީދު (ވައްޑެ)އެވެ.

އެގޮތުން ވައްޑެ މަޖިލިހުގެ ރައީސް މުހައްމަދު އަސްލަމަށް ފޮނުއްވި ސިޓީގައި ބަޔާންކޮށްފައިވަނީ އެމްޑީޕީގެ ސަރުކާރުން އިމާރާތް ކުރަން ފަށާފައިވާ ދިއްދޫ އާ އިންޖީނުގެއާއި އައިސް ޕްލާންޓްގެ މަސައްކަތަށް ފެނަކަ އިން ވަޒީފާ ދީފައިވާ 57 ކޮންޓްރެކްޓް މުވައްޒަފުން އެއްވެސް ނޯޓިސްއެއް ދިނުމަކާ ނުލައި ކުއްލި ގޮތަކަށް އެ މުވައްޒަފުން ވަޒީފާތަކުން ވަކި ކުރި ކަން މުވައްޒަފުންގެ ފަރާތުން އޭނާގެ ސަމާލުކަމަށް އައިސްފައިވާ ކަމަށެވެ.

އެހެންކަމުން މުވައްޒަފުންގެ ފަރާތުން ނުތަނަވަސްކަމެއް ލިބި އެކަމުގެ ޝަކުވާ އާއި ކަންބޮޑުވުން އިންތިހާއަށް އެބައޮތް ކަމަށާ އަދި ދިއްދޫގައި ކުރަމުން އަންނަ މަސައްކަތް ނިމިފައި ނުވާ އިރު، އެ މުވައްޒަފުން ވަކިކޮށްލުމުން އެ މަސައްކަތް ހުއްޓި، މުވައްޒަފުންގެ އާއިލާތައް ނިކަމެތިކަންލިބޭނެ ކަމަށް ސިޓީގައިވެއެވެ.

މީގެ އިތުރުން މުވައްޒަފުން ވަކިކުރުން ކުށްވެރި ކުރާ ކަމަށް ވެސް ސިޓީގައިވެއެވެ.

''ވީމާ، މި މައްސަލައިގައި ކަން ހިނގާފައިވާ ގޮތް ބެލުމަށާއި، ދިއްދޫ އާ އިންޖީނުގެއާއި، އައިސްޕްލާންޓްގެ މަސައްކަތް އަވަހަށް ނިންމަން ބާރު އެޅުމަށާއި، އެ މަސައްކަތް ނިމެންދެން މުވައްޒަފުން ވަޒީފާގައި ބޭތިއްބެވުމަށް ފެނަކައަށް ދެންނެވުމަށްޓަކައި މި މައްސަލަ ރައްޔިތުންގެ މަޖިލީހުގެ ކަމާބެހޭ ކޮމެޓީއަށް ފޮނުވައިދިނުމަށް އަޅުގަނޑު ހުށަހަޅަމެވެ.'' ސިޓީގައި ބަޔާންކޮށްފައިވެއެވެ.

ފެނަކައިން ދިއްދޫގައި އިމާރާތް ކުރާ އާ އިންޖީނުގޭގެ މަސައްކަތަށް ކޮންޓްރެކްޓަށް ނަގާފައި ތިބި މުވައްޒަފުންގެ ކޮންޓްރެކްޓް އާ ނުކުރަން ނިންމުމުން އޭގެ ތެރެއިން ބައެއް މުވައްޒަފުންވަނި އިހުތިޖާޖުވެސްކޮށްފައެވެ.

މިކަމާ ގުޅިގެން ފެނަކަ ކޯޕަރޭޝަންގެ މެނޭޖިން ޑިރެކްޓަރ މުއާޒު މުހައްމަދު ރަޝީދު ޗެނަލް13 އަށް ވިދާޅުވީ މިހާރުވެސް މުވައްޒަފުންގެ ޚަރަދަށް އެކަނިވެސް 23 މިލިއަންއަށް ވުރެ ގިނަ ރުފިޔާ ޚަރަދުވެފައިވާއިރު އެއީ ކުންފުނިން ކުރި ދިރާސާއަށް ބަލާއިރު މުޅި ޕްރޮޖެކުޓު ނިންމާލެވޭ ވަރު އަދަދެއް ކަމަށެވެ. ނަމަވެސް މިހާތަނަށް އައިއިރު މުޅި ޕްރޮޖެކުޓަށް 49 މިލިއަން ރުފިޔާ ޚަރަދުވެފައިވާއިރު ޕްރޮޖެކުޓުގެ ނިމިފައިވަނީ 70 އިން ސައްތަކަމަށާ އެހެންކަމުން އެ ސްޓާފުން އެގޮތަށް ލައިގެން ޕްރޮޖެކްޓު ނިންމަން 150 މިލިއަނެއްހާ ރުފިޔާ އަރާނެކަމަށެވެ. އެހެންކަމުން އެވަރު ބޮޑު ގެއްލުމަކާ އެކު ކުރިއަށް ގެންދަން އުނދަގުލީކަމަށް މުއާޒު ވިދާޅުވެފައިވެއެވެ.

މުއާޒު ވަނީ ގޮތުގައި ކޮންޓްރެކްޓު ހަމަވެގެން ފެނަކައިން 904 މުވައްޒަފުން ދޫކޮށްލަން ޖެހުނުކަން ފާހަގަކުރައްވާފައެވެ. އަދި އެކަމުގެ ސަބަބުން ވެސް 5.3 މިލިއަން ރުފިޔާ ސަލާމަތް ކުރެވުނުކަމަށްވެސް އޭނާ ވިދާޅުވިއެވެ.