މެދު ރާއްޖެތެރެއަށް މޫސުން ގޯސްވެ، މޫސުމާ ބެހޭ ގައުމީ އިދާރާ (މެޓް އޮފީސް)އިން މި ސަރަހައްދަށް ޔެލޯ އެލާޓް ނެރެފިއެވެ.

މި އިދާރާއިން ޔެލޯ އެލާޓް ނެރެފައިވަނީ  އއ. އަތޮޅުން ފެށިގެން ތ. އަތޮޅަށް މިރޭ 21:30އިން 1:30ގެ ނިޔަލަށެވެ. އެ ވަގުތުތަކުގައި ބޯކޮށް ވާރޭވެހުމާއެކު ގުގުރުން އެކަށީގެންވާ ކަމަށާއި ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށް އެ އިދާރާއިން ހާމަކޮށްފައިވެއެވެ.

މެޓް އޮފީހުން އިތުރަށް ހާމަކޮށްފައިވަނީ ވިލާގަނޑުގައި ވައިގަދަވެ ކަނޑަގަދަވުން އެކަށީގެންވާ ނަމަވެސް އާންމު ގޮތެއްގައި ކަނޑުތައް ގަދަވާނީ އާދައިގެ ވަރަކަށް ކަމަށެވެ. އަދި މިހާރު ވެސް ކުރަމުން އަންނަނީ، އިރުވައި މޫސުން ނިމި ހުޅަނގު މޫސުން ފެށޭތީ ދެ މޫސުން ބެދޭ ވިއްސާރަކަން އެ އިދާރާއިން ފާހަގަކޮށްފައިވެއެވެ.

މާލެއަށް މިއަދު ބޯކޮށް ވާރޭ ވެހުމުގެ ސަބަބުން ބައެއް މަގުތަކުގައި ފެންބޮޑުވުމާ ގުޅިގެން، މަގުތަކުން ފެން ހިންދުމުގެ މަސައްކަތް އެމްއެންޑީއެފުން ކޮށްފައިވެއެވެ.