އިންޑިޔާ ސިފައިންގެ ދެވަނަ ބެޗް އެ ގައުމަށް އަނބުރާ ފޮނުވާލަން ބުނި ދުވަހަކީ މެއި މަހުގެ 10 ވަނަ ދުވަހެވެ. ނަމަވެސް އިންޑިޔާ ސިފައިން އެ ގައުމަށް މެއި މަހުގެ 9 ވަނަ ދުވަހު ގޮސްފިކަމަށް ދިވެހި ސަރުކާރުން ހާމަކޮށްފިއެވެ. މިހާ ހިސާބުން އުފެދުނީ އެންމެ ސުވާލެކެވެ. ހަގީގަތުގައިވެސް ދިޔައީހެއްޔެވެ؟

އިންޑިޔާ ސިފައިންގެ ދެވަނަ ބެޗް އަނބުރާ އެ ގައުމަށް ފޮނުވާލުމަށް ނިންމާފައިވާކަން ޚާރިޖީ ވުޒާރާގެ ނޫސްބަޔާނެއްގައި މީގެ މަސް ދުވަސް ކުރިން ވަނީ ހާމަކޮށްފައެވެ. އެގޮތުން ރާއްޖެއާއި އިންޑިއާގެ ގުޅުން ބަދަހި ކުރުމަށް ދެ ގައުމުގެ މެދުގައި އުފެއްދި ކޯ-ގްރޫޕްގެ ތިންވަނަ ބައްދަލުވުމުގެ މައުލޫމާތު ވަނީ ހިއްސާކޮށްފައިވެއެވެ.

އިންޑިޔާ ސިފައިންގެ ފަހު ބެޗް ރާއްޖޭން ފުރައިފިކަމަށް ސަރުކާރުން ބުނާއިރު ފުރިކަމުގެ އެއްވެސް ހެއްކެއްް ސަރުކާރަކަށް ނުދެެއްކެއެވެ. ހެއްކެއް ދެއްކުމަށް އެދުމުން ރައީސް އޮފީހުން ބުނީ އެމްއެންޑީއެފް އަށް ސުވާލު ކުރުމަށެވެ. އެމްއެންޑީއެފްއާ ސުވާލުކުރުމުން ބުނީ ރައީސް އޮފީހަށް ސުވާލު އަމާޒުކުރުމަށެވެ. ދެން އިންޑިޔާ ސިފައިން ފޭބިކަމެއް ނުވަތަ ނޫންކަމެއް ވެސް އެނގޭނީ ކިހިނަކުން ހެއްޔެވެ. ހެއްކެއް ހޯދުމަށްޓަކައި ދާންވީ ކޮންތަނަކަށްތޯއެވެ. ސަރުކާރުން އިންޑިޔާ ސިފައިން ނުފޮނުވާ ފޮނުވާލިކަމަށް ބުނަނީ ކަންނޭނގެއެވެ.

އިންޑިޔާ ސިފައިންގެ ބެޗް އެ ގައުމަށް އަނބުރާ ފޮނުވާލި ނަމަވެސް ބަދަލުގައި މަދަނީންގެ ބެޗެއް ވަނީ ރާއްޖެ ގެނެސްފައެވެ. މިކަން އެ ގައުމުން ވެސް ވަނީ ކަށަވަރުކޮށްދީފައެވެ. މިއީ ކިހިނެއްވާ ކޮންތާކު އުޅޭ ބައެއް ކަމެއްވެސް ނޭނގެއެވެ. އެމީހުންގެ ވަނަވަރު ވެސް ވަނީ ސިއްރުކޮށްފައެވެ. ކީއްކުރަންތޯއެވެ. ރާއްޖޭގައި އެމީހުންގެ ބޭނުމެއް މިހާރަކު ހަގީގަތުގައި ނެތެވެ. ޑޯނިއާރ ދުއްވުމަށްޓަކައި އިންޑިޔާ ސިފައިން ވިޔަސް މަދަނީންގެ ބައެއް ވެސް ދިވެހީންނެއް ބޭނުމެއްނުވެއެވެ. ރައީސް މުއިއްޒު ވެރިކަމަށް އައުމަށްފަހު މިވަނީ އެއާރ އެމްބިޔުލާންސް ތައާރަފްކޮށް، ތުރުކީން ޑްރޯންތަކެއްވެސް ރާއްޖެ ގެނެސްފައެވެ. އެހެންނަމަވެސް ޑްރޯން އަށް ވުރެ ޑޯނިއާރ ފާސްޓް ވާނެކަމަށް ބުނެ ޑޯނިއާތައް ފޯނުވާނުލާއިރު، އެ ޑޯނިއާ ދުއްވަން ދިވެހި ސިފައިން ތަމްރީނު ކުރަން ދިވެހި ސަރުކާރުން ޖެހިލުންވަނީ ކީއްވެގެންތޯއެވެ.

ހައްތަހާވެސް އުފެއްދޭނެ ސުވާލުތަކެވެ. އިންޑިޔާ ސިފައިން ފޮނުވާލާ ކޮންމެ ފަހަރަކު އެ ގައުމުން މަދަނީންގެ ބެޗެއް ގެންނަނީ ކީއްވެގެންތޯ؟

މި ސަރުކާރުން ވެރިކަމަށް އައުމަށްޓަކައި ވިއްކި އެންމެ ބޮޑު އެއް ވައުދަކީ ރާއްޖޭގެ އެކި ސަރަހައްދުތަކުގައި ގާއިމްވެފައި ތިބި އިންޑިޔާ ސިފައިން އެ ގައުމަށް އަނބުރާ ފޮނުވާލާނެ ކަމުގެ ވައުދެވެ. ވެރިކަމަށްް އައުމަށްފަހު ރާގު ބަދަލުވެގެންދިޔައީ އިސާހިތަކުއެވެ.

އިންޑިޔާ ސިފައިންގެ ސީދާ އަދަދު އަދިވެސް ސަރުކާރަށް ހާމަނުކޮށްދެވެއެވެ. ދެފަހަރު މަތިން ބުނަނީ ދެ އަދަދެކެވެ. އަތައް ގޮވިކަން އިހުސާސް ވުމުން ރައީސް އޮފީހުގެ މިނިސްޓާރ ނާޒިމް ވިދާޅުވީ މުހިންމީ އިންޑިޔާ ސިފައިންގެ އަދަދު ނޫންކަމަށެވެ. ބައްލަވާ ނާޒިމެވެ. އަދަދުވެސް މުހިންމެވެ. އެ ސިފައިން އަނބުރާ ފޮނުވާލުންވެސް އެހާމެ މުހިންމެވެ. ރައްޔިތުންނަށް ވަރަށް ކަންކަން ތިލަ ކޮށްދެއްވާނެ ކަމުގެ ދައުވާ ކުރީމެނޫންތޯއެވެ. މިއަދު ކަންކަން ތިލަކޮށްދެއްވަން ފަސްޖެހިވަޑައިގަންނަވަނީ ކީއްވެތޯއެވެ.

މިއަދު ވެރިކަމުގައި ތިއްބެވި އިއްޒަތްތެރީން މެއި މަތީ "އިންޑިޔާ އައުޓް" ޖައްސަވާފައިހުރި ޓީޝާރޓް ތުރުކުރައްވައިގެން މަގުމައްޗައް ނިކުމެ އަޑުގެ ނެއްކޮޅަށް އިންޑިޔާ އައުޓް ގޮވި އިރު މިއަދު އިންޑިޔާ ސިފައިން ދިޔަ ކަމުގެ ހެއްކެއް ދެއްކުމަށް ފަސްޖެހިވަޑައިގަންނަންވީ އެއްވެސް ސަބަބެއް އަޅުގަނޑަކަށް ނުފެނެއެވެ..