ރާއްޖޭގައި ގާއިމްވެފައި ތިބި އިންޑިޔާ ސިފައިންގެ ދެވަނަ ބެޗް ރާއްޖޭން ފޭބިކަމުގެ ހެކި ސަރުކާރަށް ނުދެއްކުނުކަން ހާމަވެއްޖެއެވެ.
ޗެނަލް 13 ގެ ފަރާތުން ރައީސް އޮފީހުގެ ކޮމިޔުނިކޭޝަން މިނިސްޓާރ އިބްރާހިމް ހަލީލްގެ އަރިހުން ހެއްކެއް ދެއްކުމަށް އެދުމުން ހަލީލް ވަނީ ހެކި ހޯދުމަށް އެމްއެންޑީއެފްއާ ސުވާލުކުރުމަށް ވިދާޅުވެފައެވެ.
މިކަމާ ގުޅިގެން ޗެނަލް 13 އިން އެމްއެންޑީއެފްއާ ސުވާލުކުރުމުން އެމްއެންޑީއެފުން ބުނީ އިންޑިއާ ސިފައިން ފޮނުވާލުމުގެ ކަންކަން ނިންމަނީ ސަރުކާރުގެ ހައިލެވެލް ކޯރގުރޫޕަކުން ކަމަށް ވެފައި އެކަމުގެ މައުލޫމާތު ހިއްސާކުރައްވާނީ ފޮރިން މިނިސްޓްރީ ނުވަތަ ރައީސް އޮފީހުން ކަމުގައިއެވެ.
އެމްއެންޑީއެފްގެ ޖަވާބާއެކު ސާބިތުވެގެން ދިޔައީ ރައީސް އޮފީހުން ގަސްތުގައި ހެކި ނުދައްކަން އުޅުނުކަމެވެ.
އިންޑިޔާ ސިފައިން ފޭބިކަމަށް އެ ގައުމުން ވެސް ވަނީ ބުނެފައެވެ. އެހެން ނަމަވެސް އޭގެ ބަދަލުގައި މަދަނީންގެ ޓީމެއް ރާއްޖެ ފޮނުވާފައިވާކަމަށް އެ ގައުމުން ވަނީ ބުނެފައެވެ.
އިންޑިޔާ ސިފައިން ފޭބިކަމަށް ސަރުކާރުން ވެސް ބުނަމުންގެންދާއިރު ފޭބިކަމުގެ ހެއްކެއް ނުދެއްކުނުތާ އެކަމާ ބެހޭ އިތުރު މައުލޫމާތު ހިއްސާކުރުމަށްވެސް ސަރުކާރުން ވަނީ އުޒުރުވެރިވެފައެެވެ.
