އދ. ދިގުރަށުގައި ވިހެއުމަށްފަހު، މަރާލާ ކުނިގޮްނޑަށް އެއްލާލާފައި އޮތް ކުއްޖާގެ މަންމަގެ މައްޗަށް ދައުވާކޮށްފިއެވެ.

ވިހެއުމަށް ފަހު ޕްލާސްޓިކު ކޮތަޅަކަށް ލާ ފެނުނީ މިދިޔަ އަހަރުގެ ޑިސެމްބަރު މަހުގެ ތިން ވަނަ ދުވަހު ދިގުރަށު ކުނިގޮނޑުންނެވެ. އެކުއްޖާގެ މަރުގެ މައްސަލައިގައި ސްރީލަންކާގެ އަންހެނެއް ބަންދުގައި ބަހައްޓައިގެން އޭނާގެ ޝަރީއަތް ކުރިއަށް ގެންދިޔައެވެ.

ޕީޖީ އޮފީހުން އާންމުކޮށްފައިވާ ހަބަރުގައި ބުނެފައިވަނީ މި ކުއްޖާގެ މަރުގެ މައްސަލައިގައި ހައްޔަރުކޮށްފައިވަނީ. ސްރީލަންކާގެ ރައްޔިތެއްކަމަށްވާ ހިރަންޏާ ކުމުދުމާލި ޑި އަލްވިސްއެވެ.

ޕްރޮސިކިއުޓާ ޖެނެރަލް އޮފީހުން އޭނާގެ މައްޗަށް އުފުލާފައިވަނީ 3 ދައުވާއެކެވެ. އެއީ، ކުޑަކުއްޖަކަށް ރައްކާތެރިކަން ފޯރުކޮށްދިނުމުގެ ޒިންމާ އޮތް ފަރާތެއް ކަމުގައިވެ ހުރެ، އެ ކުއްޖާގެ ސިއްހަތަށް އުނިކަން އަތުވެދާނެ ފަދަ އަމަލެއް ގަސްދުގައި ހިންގުމުގެ ކުށުގެ ދައުވާއާއި، ގަސްދުގައި މަރެއް ފޮރުވުމުގެ ދައުވާއާއި އަދި ގަސްދުގައި މީހަކު މެރުމުގެ ކުށުގެ ދައުވާއެވެ.

މި ދައުވާތައް ސާބިތުވެއްޖެ ނަމަ އޭނާގެ މައްޗަށް 15 އަހަރަށް ވުރެ ދިގު މުއްދަތެއްގެ ޖަލު ހުކުމެއް އަންނާނެއެވެ.

ޕީޖީ އޮފީހުން ބުނެފައިވާ ގޮތުގައި މި އަންހެން މީހާ ވިހާފައިވަނީ 01 ޑިސެންބަރު 2023 ދުވަހުގެ 22:00 އާއި 03 ޑިސެންބަރު 2023 ދުވަހުގެ 05:00 އާ ދެމެދުގެ ވަގުތެއްގައިއެވެ.

އަދި ކުއްޖާ ވިހެއުމަށްފަހު، ފާހާނާތަށި ތެރެއިން ކުއްޖާ ނަގައި, ކޮތަޅުތަކަކަށް ލައިގެން ގެންގޮސް މިކޮތަޅު އދ. ދިގުރަށް ފަރީދީ މަގަށްވާގޮތަށް ހަދާފައި ހުންނަ ފަން ކޮށިގަނޑުގެ ބޭރުގައި ހުންނަ ކުނިވާ ބާވަތުގެ ކުނި އެޅުމަށް ހާއްސަ ކޮށްފައިވާ ފެހި ޑަސްބިނަށް އެއްލާލާފައިވަނީ، 03 ޑިސެންބަރު 2023 ދުވަހުގެ 05:31 އެހައިކަށްހައިއިރުކަމަށްވެސް ޕީޖީ އޮފީހުން ވަނީ ހާމަކޮށްފައިއެވެ.

މި ތުއްތު ކުއްހާގެ ހަށުގަނޑު މިހާރު ވަނީ ޕޯސްޓުމޯޓާމްއަށް ފަހު މާލެ ގެނެސް ވަޅުލެވިފައިއެވެ.