އިންޑިއާ ސިފައިން ދިވެހިރާއްޖެއިން ނުދާ ކަމަށް ބުނެ ކުރީގެ ހޯމް މިނިސްޓަރު އުމަރު ނަޞީރު ސަރުކާރަށް ފާޑު ވިދާޅުވެއްޖެއެވެ.

އުމަރު ނަޞީރު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ އިންޑިއާ އިން އަނެއްކާވެސް ދިވެހިރާއްޖޭގެ ސަރުކާރު މޮޔަ ހައްދައިފި ކަމަށާއި، އިންޑިއާ ސިފައިން އަދިވެސް ރާއްޖޭގައި ގާއިމުވެ ތިބިކަމަށެވެ.

އުމަރު މިހެން ވިދާޅުވީ އިންޑިއާ ސިފައިން ރާއްޖެއިން ބާލާފައިވާ ކަމަށް ބުނެ މި ސަރުކާރުގެ ސަޕޯޓަރުން އިއްޔެ އިން ފެށިގެން ސޯޝަލް މީޑިއާގައި އެކަމާއި ގުޅިގެން ޕޯސްޓް ކުރަމުން ދަނިކޮށެވެ.

މީގެ އިތުރުން، އިންޑިއަން ނޭވީ، ޑޯނިއަރ އެއާކްރާފްޓް، ރާޑާ ސްޓެޝަންތައް އޮޕަރޭޓް ކުރާ އިންޑިއާ ސިފައިން އަދިވެސް ރާއްޖޭގައި ހަރަކާތްތެރިވަމުން އަންނަ ކަމަށް އުމަރު ފާހަގަކޮށްފައިވެއެވެ. މިކަމާއި ގުޅޭ އިތުރު މަޢުލޫމާތު މާދަމާ ހިއްސާ ކުރާނެ ކަމަށްވެސް އުމަރު ނަސީރުގެ ޕޯސްޓްގައިވެއެވެ.

އިންޑިއާ ސިފައިން ރާއްޖެއިން ބޭލުމަކީ ރައީސް ޑރ މުއިއްޒުގެ ރިޔާސީ ވަޢުދެކެވެ.