ދިވެހިންގެ މިނިވަންކަމާ އިސްތިގުލާލަށް އޮތް ނުރައްކަލެއްގެ ބޮޑުކަމުން، ރައީސް އަބްދުﷲ ޔާމީން ފެއްޓެވި ގައުމީ ބޮޑު ކެމްޕެއިން، "އިންޑިއާ މިލިޓަރީ އައުޓު"ގެ ދަށުން އިންޑިއާ ސިފައިން މިގައުމުން ބޭލުމަކީ އެމަނިކުފާނުގެ ހުސްގޮނޑު ދައްކައިގެން ވެރިކަމަށް އައި ސަރުކާރުގެ ވަލިއްޔުލްއަމުރުގެ ރިޔާސީ ވައުދެކެވެ.

އެ ވައުދު ފުރަތަމަ ދުވަހުވެސް ފުއްދަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވިއެވެ. ނަމަވެސް އެކަމަށް އަމަލީ ސިފައެއް ގެނެވިއްޖެ ކަމަށް ސަރުކާރުން އިއުލާން ކޮށްފައިވަނީ ވެރިކަމަށް 175 ދުވަސް ފަހުންނެވެ.

ނަމަވެސް އެކަމުގެ ހަގީގަތް ބަލާލިއިރު އެއީ ނަމެއްގައި ކުރިކަމެކެވެ. އެގޮތުން ރާއްޖޭއަށް އިންޑިއާއިން ހަދިޔާކޮށްފައި އޮންނަ ކަމަށް ބުނާ އަސްކަރީ ދެ އުޅަނދު ބެލެހެއްޓުމަށާ އޮޕަރޭޓުކުރުމަށް ތިބި އިންޑިއާ ސިފައިންނާ އެކު ޖުމްލަ 87 ސިފައިން ފޮނުވާލެވިއްޖެ ކަމަށް ޚާރިޖީ ވަޒީރު މެޑަލް ޖައްސަވަމުން ވިދާޅުވާއިރު އަދިވެސް އެ އުޅަނދުތަކުގައި އަތްލުމުގެ ހައްގު ދިވެހި އަސްކަރިއްޔާއަށް ނުލިބއެވެ. ދިފާއީ ވަޒީރު ވިދާޅުވާ ގޮތުގައި ދިވެހިން އެކަމަށް އަރާ އަރަފޯދިގެން ނުވަނީ ޔޯލައެވެ. ނަމަވެސް މިއީ ނިމި ދިޔަ ފަސް އަހަރު މިކަމާ ގުޅިގެން އެންމެ ބޮޑަށް ރައްޔިތުންނާ ވާހަކަ ދެއްކެވި އެއް ބޭފުޅާއެވެ. އިންޑިއާ ސިފައިން ފޮނުވާލިޔަސް ދިވެހި އަސްކަރިއްޔާގައި އެ އުޅަނދުތައް އޮޕަރޭޓުކުރާނެ ގާބިލު ޕައިިލެޓުން އެބަ ތިބި ކަމަށް ވިދާޅުވި ބޭފުޅުންގެ ސަރުކާރުން ދިވެހިންނަށް އެކަން ސާބިތުކޮށްދޭން ވީއިރު މި ދުއްވާލީ ޗޮކުންނެވެ. ދިވެހިންގެ އަގު ވައްޓާލައިފިއެވެ.

މީގެ އިތުރުން ދިވެހިރާއްޖޭގެ ރައްޔިތުންނަށް ވަނި ބޮޑު އޮޅުވާލުމެއް އޮޅުވާލާފައެވެ. އެގޮތުން އިންޑިއާ ސިފައިން ބާލައިފިކަމަށް ބުނާ އިރު މިހާރު ގެނެސްގެން އެ އުޅޭ ކަމަށް ބުނާ "މަދަނީ" މީހުންނަކީ ކޮންބައެއްކަން ދިވެހި ސަރުކާރުން ވަނީ ސިއްރުކޮށްފައެވެ.

ނަމަވެސް ތޭރަ އޮންލައިންއިން ކުރި ދިރާސާއަކުން ހާމަވެފައިވަނީ އެ އުޅަނދު އުފެއްދި ކުންފުނީގެ މުވައްޒަފުން ކަމަށްބުނެ އިންޑިއާއިން ރާއްޖެ ފޮނުވާފައިވާ "މަދަނީ" މީހުންނަކީ ހިންދުސްތާނު ދައުލަތުގެ ވައިގެ އުޅަދު ފަހަރާއި ސަލާމަތީ އުޅަދު ފަހަރު އުފައްދާ ހިންގާ ބަލަހައްޓާ ކުންފުނީގެ މީހުންނެވެ.

ސަރުކާރުގެ ރަސްމީ އޮނިގަނޑުގެ ތެރެއިން ވިޔަފާރި ނުކުރެވޭތީ ކޮންމެ ދައުލަތަކުން ވެސް ސަރުކާރުގެ ކުންފުނިތައް ހަދައިގެން ވިޔަފާރި ކުރެއެވެ. ސައްތައިން ސައްތަ ސަރުކާރުގެ ހިއްސާގައި ހިންގާ ކުންފުނިތަކާ ސަރުކާރާ އެއްވެސް ތަފާތެއް ނޯވެއެވެ.

ވައިގެ އުޅަނދު އުފެއްދުމުގެ ގާބިލުކަން ލިބިފައިވާ އިންޑިއާއިން އެގައުމުގެ ބޭނުމަށް އުފައްދަންވާ ވަރަށް ވައިގެ އުޅަނދު އުފައްދަމުން ސަރުކާރު ނޫން އަމިއްލަ ކުންފުނިތަކާއި އެހެން ގައުމުތަކާއެކު މަދަނީ އަދި އަސްކަރީ ވައިގެ އުޅަނދުގެ ވިޔަފާރި ކުރުމުގެ ބޭނުމުގައި ކުރަމުން އަންނަ ކަމކެވެ.

އެގޮތުން ހިންދުސްތާން އެރޮނޮޓިކްސް ލިމިޓެޑް (އެޗްއޭއެލް) އަކީ އިންޑިއާގެ ހަނގުރާމަ މަތީ ވައިގެ އުޅަނދު ފަހާރާއި ޖާސޫސީ ވައިގެ އުޅަދުފަހަރު އުފައްދަނީ އިންޑީއާގެ ހަލް އިންނެވެ. ހިންދުސްތާން އެރޮނޮޓިކްސް ލިމިޓެޑް (އެޗްއޭއެލް) އަކީ މައި އޮފީސް ބެންގަލޫރުގައި ހުންނަ ސައްތައިން ސައްތަ އިންޑިއާ ސަރުކާރުގެ (ދައުލަތުގެ) ކުންފުންޏެކެވެ. 23 ޑިސެމްބަރ 1940 ގައި އުފެދުނު އެޗް.އޭ.އެލް އަކީ ދުނިޔޭގެ އެންމެ ދުވަސްވީ އަދި އެންމެ ބޮޑު އެއް އެއަރޮސްޕޭސް އާއި ދިފާއު އުފައްދާ އެއް ކުންފުންޏެވެ.

އިންޑިއާ ސަރުކާރުގެ ޑިފެންސް މިނިސްޓްރީ މެދުވެރިކޮށް އިންޑިއާގެ ރައީސް އައްޔަންކުރާ ޑިރެކްޓަރުންގެ ބޯޑަކުން ހިންގާ ހަލް މިހާރު ބޮޑަށް ހަރަކާތްތެރިވަނީ ފަޔަރ ޖެޓާއި ހެލިކޮޕްޓަރާއި ޖެޓް އިންޖީނާއި މެރިން ގޭސް ޓަރބައިން އިންޖީނު ޑިޒައިންކޮށް އުފެއްދުމާއި އެވިއޮނިކްސްއާއި ސޮފްޓްވެއަރ ޑިވެލޮޕްމަންޓާއި ސްޕެއަރ ސަޕްލައި ކުރުމާއި އިންޑިއާގެ އަސްކަރީ މަތިންދާބޯޓުތައް އޯވަހޯލްކޮށް އަޕްގްރޭޑް ކުރުމުގައެވެ. ހަލްއާއި ގުޅޭގޮތުން މިއީ އާއްމުކުރެވިފައި ހުރި މައުލޫމާތެވެ. ޖާސޫސީ މައުލޫމާތު އެއްކުރުމުގެ ކެޕޭސިޓީ ހުރިވަރެއް އަންދާޒާވެސް ކޮށްނުލެވޭނެއެވެ. އެހެން އިބާރާތަކުން ބުނާ ނަމަ ހަލްއަކީ އިންޑިއަން އެއަރފޯހުގެ ހިތެވެ.

އެޗްއޭއެލް އިން މަތިންދާބޯޓު އުފައްދަން ފެށީ 1942 ވަނަ އަހަރުގެ ކުރީކޮޅު އިންޑިއާގެ ވައިގެ ސިފައިންނަށް ހާރލޯ ޕީސީ-5އާއި ކަރޓިސް ޕީ-36 ހޯކް އާއި ވަލްޓީ އޭ-31 ވެންޖަންސް އުފެއްދުމުގެ ލައިސަންސް ލިބިގެންނެވެ. 4 ޕްރޮޑަކްޝަން ޔުނިޓެއްގެ ދަށުން 11 ހާއްސަ ރިސާރޗް އެންޑް ޑިވެލޮޕްމަންޓް (އާރްއެންޑްޑީ) ސެންޓަރާއި 21 މެނުފެކްޗަރިންގ ޑިވިޒަން މުޅި އިންޑިއާގައި ފެތުރިފައިވެއެވެ.

އެޗްއެފް-24 މާރޫތު ފަޔަރ-ބޮމްބަރ އަކީ އިންޑިއާގައި އުފެއްދި ފުރަތަމަ ހަނގުރާމަ މަތިންދާބޯޓެވެ. އެޗްއެފް-24 މާރޫތު ފަޔަރ-ބޮމްބަރ އަކީވެސް "ހަލް"ގެ އުފެއްދުމެކެވެ

އެހެންކަމުން އިންޑީއާ ސިފައިންގެ މީހެއްގެ ބޫޓް ކިބައެއް ހުރެގެންވެސް ގައުމީ ސަލާމަތަށް ނުރައްކާ ވަންޏާ ޖެހޭނީ ތިބި ތާކުން އެމިހުން ބާލާ ފައްސާ ނަގާލަން ކަމަށް ވާިއރު އެކަން ކުރަން އައި ސަރުކާރުން މިހެދީ ކިހިނެއް ހެއްޔެވެ.

"ހަޖަމް" ނުވަނީ ކަމަށް ބުނެ ސަރުކާރުގެ ދިފާއުގައި ޕޯސްޓުކުރާ ބޯއިސް ކޮޅާ ގާރލަސްކޮޅުތައް މިކަމަށް ރައްދު ދިނަސް މިއީ ބޮޑު އޮޅުވާލުމެކެވެ. ދިވެހި ދައުލަތުން ދިވެހި ރައްޔިތުންނަށް އޮޅުވާލާ ހިނގި ބޮޑު "ސްކޭމް"އެކެވެ.

އެންމެ ރަނގަޅެވެ. އިންޑިއާ ސިފައިން ބޭލިއްޖެއެވެ. އިންޑިއާ ސިފައިން ބާލާފައި ދެ ހެލްކޮޕްޓަރާއި ޑޯނިއާ ދުއްވަން އެރުވުނީ ވަކި ކޮންބައެއް ހެއްޔެވެ. މަދަނީންގެ ނަމުގައި ގެނައީ ކުރިން ތިބި އަދައިގެ ސިފައިންނަށް ވުރެ މާނުރައްކާތެރި ބައެކެވެ. ދެ ހެލްކޮޕްޓަރާއި ޑޯނިއާ މަތިންދާ ބޯޓް ދުއްވާ ބެލެހެއްޓުމާއި ހަވާލުވެގެން ރާއްޖެއައީ ހިންދުސްތާން އެރޮނޮޓިކްސް ލިމިޓެޑް (އެޗްއޭއެލް)އެވެ.

އިންޑިއާ ސިފައިން ބާލާ މަދަނީން ގެންނަ ނަމުގައި ޑރ. މުއިއްޒު މިހެދީ މާބޮޑު ގޯހެކެވެ. އިންޑިއާ ސިފައިން ބޭލިކަމަށް ބުނެ އިންޑިއާ ސަރުކާރުގެ ޑިފެންސް މިނިސްޓްރީ މެދުވެރިކޮށް އިންޑިއާގެ ރައީސް އައްޔަންކުރާ ޑިރެކްޓަރުންގެ ބޯޑަކުން ހިންގާ ހަނގުރާމަ މަތީ ވައިގެ އުޅަނދު އުފައްދާ ހިންގާ ބަލަހައްޓާ ކުންފުނިން ރާއްޖޭގައި ދެ ހެލްކޮޕްޓަރާއި ޑޯނިއާ މަތިންދާ ބޯޓު ދުއްވަން ހަވާލު ކުރުމުން ގައުމީ ސަލާމަތަށް އޮތް ނުރައްކާ މާބޮޑެވެ.