ރައްޔިތުންގެ މަޖިލީހުގެ މެމްބަރެއްގެ ހައިސިއްޔަތުން ލިބޭ މުސާރައާއި އިނާޔަތް މިއަހަރު ޖެނުއަރީ މަހުން ފެށިގެން ނުނަންގަވާ ކަމަށް ވިދާޅުވެ ކުރީގެ ރައީސް މުހައްމަދު ނަޝީދު އިތުރުފުޅު ހައްދަވައިފިއެވެ.

އޮންލައިން ނޫހެއް ކަމަށްވާ ''ދަ މޯނިން'' އަށް  ދެއްވި އިންޓަވިއުގައި މަޖިލީސް މެންބަރެއްގެ ގޮތުގައި ހުންނަވައި ސީވީއެފްގެ ސެކެރެޓަރީ ޖެނެރަލްގެ މަގާމު އަދާކުރައްވަމުން ގެންދެވުމާއި ގުޅޭ ގޮތުން ނަޝީދާ ސުވާލުކުރުމުން އޭނާ ވިދާޅުވީ ފެބްރުއަރީ މަހު ސީވީއެފްގެ ސެކެރެޓަރީ ޖެނެރަލްގެ މަގާމަށް ހަވާލުވެވަޑައިގެންފައިވާއިރު ޖެނުއަރީން ފެށިގެން މެމްބަރެއްގެ ހައިސިއްޔަތުން ލިބިވަޑައިގަންނަވާ މުސާރަ ނުނަންގަވާ ކަމަށެވެ.

ނަމަވެސް ދައުރުގެ ބާކީ އޮތް މުއްދަތަށް ލިބޭ މުސާރަ އުނިކޮށްދެއްވަން ނަޝީދު ރައްޔިތުންގެ މަޖިލީހުގެ ރައީސް މުހައްމަދު އަސްލަމްއަށް ފޮނުއްވި ސިޓީއެއް އޭޕްރީލް މަހުގެ އެއްވަނަ ދުވަހު އޭނާ ވަނީ 'އެކްސް' ގައި ހިއްސާކުރައްވާފައެވެ.

އެ ޕޯސްޓްގައި ނަޝީދު އެދިވަޑައިގެންފައިވަނީ މި ދައުރުގެ ބާކީ އޮތް މުއްދަތު ގެ މުސާރަ އުނިކޮށްދެއްވުމަށެވެ.

މަޖިލީހުގެ ކޮމިއުނިކޭޝަން ޑިރެކްޓާ ހަސަން ޒިޔާއު ވެސް ވަނީ އެކަން ކަށަވަރުކޮށްދެއްވައިފަ އެވެ.

އެގޮތުން ޒިޔާއު ވިދާޅުވީ ނަޝީދުގެ މުސާރަ އުނިކޮށްދޭން ރަސްމީކޮށް އެދިވަޑައިގެންފައިވަނީ އޭޕްރީލް މަހުގައި ކަމަށެވެ.